សារព័ត៌មាន នគរវត្ត តែងតែនាំមុខគេជានិច្ច
រដ្ឋមន្ត្រីការបរទេស អុីរ៉ង់លោកJavadZarifបានបញ្ជាក់ថា អុីរ៉ង់ មានជំនឿជឿជាក់ទៅលើសមត្ថភាពរបស់ខ្លួនដោយអាចដើរទៅមុខមិនខ្វល់ពីការដាក់ទណ្ឌកម្មរបស់អាមេរិក។
នៅក្នុងបទសម្ភាសន៍ជាមួយបណ្តាញព័ត៌មានរ៉យទ័រលោក Javad Zarif បាន លើកឡើងថា ប្រធានាធិបតីដូណាល់ត្រំា ជាមនុស្ស ងាយត្រូវគេអូសទាញបោកបញ្ឆោត ដើម្បីបង្កសង្គ្រាមជាមួយអុីរ៉ង់។
លោក JavadZarif បានលើកឡើងទៀតថា ទីប្រឹក្សាសន្តិសុខជាតិ អាមេរិក John Bolton Netanyahu ជាអ្នកលួងលោមលោកត្រាំ ឲ្យបង្កភាពតានតឹងនិងសង្គ្រាមកើតឡើងជាមួយអុីរ៉ង ។
ជាមួយគ្នានេះដែរអាមេរិកបានបញ្ជូននាវាផ្ទុកយន្តហោះពីរគ្រឿងទៅកាន់ដែនសមុទ្រជិតប្រទេសអុីរ៉ង់ ក្រោយពេលប្រឈមមុខតានតឹងដាក់គ្នាអាចឈានដល់ការផ្ទុះសង្គ្រាម។
ភាពតានតឹងកើនឡើងក្រោយអាមេរិកដាក់គំនាបដល់វិស័យប្រេងអុីរ៉ង់ ។
ជាមួយគ្នានេះលោក Mohammad JavadZarifបានព្រមានថា សហរដ្ឋអាមេរិកត្រូវតែត្រៀមខ្លួន សម្រាប់ផលវិបាកប្រសិនបើនៅតែព្យាយាមបញ្ឈប់អុីរ៉ង់ មិនឲ្យលក់ប្រេង និងមិនឲ្យប្រើប្រាស់ច្រកសមុទ្រ Hor muz។
យោងតាមប្រភពព័ត៌មានពីកាសែត រ៉យទ័រ លោក Zarifបានប្រាប់ព្រឹតិ្តការណ៍មួយ នៅសង្គមអាស៊ីក្នុងទីក្រុងញូយ៉កថា “យើងជឿជាក់ថា ប្រទេសអុីរ៉ង់នឹងបន្តលក់ប្រេងរបស់ខ្លួនទៀត គឺយើងនឹងបន្តស្វែងរកអ្នកទិញសម្រាប់ប្រេងរបស់យើង ហើយយើងក៏នឹងបន្តប្រើប្រាស់ច្រកសមុទ្រ Hormuz ជាច្រកធ្វើដំណើរដ៏សុវត្ថិភាពមួយ សម្រាប់ការលក់ប្រេង របស់យើងផងដែរ”។
គួរបញ្ជាក់ថា សហរដ្ឋអាមេរិកកាលពីថ្ងៃចន្ទ បានទាមទារឲ្យអ្នកទិញប្រេង ពីប្រទេសអុីរ៉ង់ទាំងអស់ ឈប់ទិញតទៅទៀតនៅក្នុងខែឧសភា បើមិនដូច្នោះទេ នឹងប្រឈមមុខនឹងទណ្ឌកម្ម ហើយនេះគឺជាការបញ្ចប់នូវការលើកលែងចំនួន៦ខែ ដែលអនុញ្ញាតឲ្យក្រុមអ្នកទិញប្រេងដ៏ធំបំផុតទាំង៨របស់អីុរ៉ង់ បន្តនាំចូលប្រេងពីអុីរ៉ង់។
ការប្រឈមមុខតានតឹងជាមួយអាមេរិក និងអុីស្រាអែល បានធ្វើឲ្យអុីរ៉ង់ ពង្រឹងទំនាក់ទំនងសម្ពន្ធមិត្តជាមួយប្រទេស ជាច្រើនទៀតក្នុងតំបន់ដូចជារុស្ស៊ី ប៉ាគីស្ថាន ជាដើម។ ពេលថ្មីៗនេះនាយករដ្ឋមន្ត្រីប៉ាគីស្ថានលោក Imran Khan បានបំពេញទស្សនកិច្ចពីរថ្ងៃ និងជាលើកដំបូងគិតចាប់តាំងពីបានឡើងកាន់តំណែងមកនៅប្រទេសអុីរ៉ង់ជិតខាង។ ក្រោយពីបានទទួលជួបពិភាក្សាជាមួយលោកនាយករដ្ឋមន្ត្រី នៅថ្ងៃចន្ទនេះប្រធានាធិបតីអុីរ៉ង់បាន ប្រកាសបង្កើត កម្លាំងប្រតិកម្មរហ័សរួម ទទួលបន្ទុកការពារព្រំដែនដែលខណ្ឌចែកប្រទេសទាំងពីរ។
ក្រោយពីជំនួបពិភាក្សារវាងប្រធានាធិបតីអុីរ៉ង់នឹងនាយករដ្ឋមន្ត្រីប៉ាគីស្ថាននៅទីក្រុងតេអេរ៉ង់ស្តីអំពី “ការប្រយុទ្ធប្រឆាំង នឹងអំពើភេរវកម្ម និងការពារព្រំដែន” ប្រមុខដឹកនាំទាំងពីរបានប្រកាសនៅក្នុងសន្និសីទកាសែតរួមថា នឹងបង្កើត “កងកម្លាំងប្រតិកម្មរហ័សរួមគ្នា” ទទួលបន្ទុកការពារព្រំដែន។ អគ្គមេបញ្ជាយោធាអុីរ៉ង់ និងប៉ាគីស្ថាន កំពុងចាប់ផ្តើមពិភាក្សា រកវិធីសហការការពារសន្តិសុខព្រំដែន។ នេះបើតាមប្រសាសន៍បញ្ជាក់របស់លោក រូហានី ប្រធានាធិបតីអុីរ៉ង់ទៅកាន់អ្នកសារព័ត៌មានដោយបង្ហាញក្តីសង្ឃឹមថា ការបង្កើតកងកម្លាំងរួមនឹងរួមចំណែកនាំទំនុកចិត្តឱ្យគ្នាទៅវិញទៅមក។
ប៉ុន្តែព័ត៌មានលម្អិតទាក់ទងនឹងសកម្មភាពរបស់កងកម្លាំងប្រតិកម្មរហ័សមិនទាន់ត្រូវបានបង្ហើបឱ្យដឹងទេ នាពេលនេះ។
សូមបញ្ជាក់ថា លោកនាយករដ្ឋមន្ត្រីប៉ាគីស្ថាន បានអញ្ជើញមកដល់អុីរ៉ង់តាំងពីថ្ងៃអាទិត្យ ដើម្បីបំពេញទស្សនកិច្ចផ្លូវរដ្ឋ រយៈពេលពីរថ្ងៃ ក្នុងបរិបទនៃភាពតានតឹងនយោបាយការទូតនឹងគ្នាយ៉ាងខ្លាំង ដោយហេតុភេរវកម្ម។ មានព្រំប្រទល់រួមគ្នាប្រវែង ៩០០គីឡូម៉ែត្រ ប៉ាគីស្ថានដែលមានប្រជាជនភាគច្រើនកាន់និកាយសាន់នី នឹងអុីរ៉ង់នីកាយសុីអុីត តែងចោទប្រកាន់គ្នាទៅវិញទៅមកថាបានផ្តល់ទីស្នាក់ការដល់ពួកភេរវជនដែលមកបង្កភេរវកម្មលើទឹកដីខ្លួន។
កាលពីបីថ្ងៃមុន អ្នកដំណើរក្នុងរថយន្តក្រុងបើកក្នុងខេត្ត Baloutchistanរបស់ប៉ាគីស្ថាន ១៤នាក់ ត្រូវក្រុមប្រដាប់អាវុធ ចង់ផ្តាច់ទឹកដីបាញ់សម្លាប់។ ក្រុមនេះធ្វើដំណើរមកពីអុីរ៉ង់ និងបានហាត់ហ្វឹកហ្វឺន ព្រមទាំងមានមូលដ្ឋានស្តុកសម្ភារៈនៅក្នុងទឹកដីអុីរ៉ង់ទៀត។ នេះបើតាមការអះអាង របស់រដ្ឋមន្ត្រីក្រសួងការបរទេសប៉ាគីស្ថាន ដោយបញ្ជាក់ថាមានភស្តុតាងគ្រប់គ្រាន់។
កាលពីខែមករា អុីរ៉ង់បានចោទប៉ាគី ស្ថាននិងអារ៉ាប៊ីសាអូ៊ឌីតជាសម្ពន្ធមិត្តថា អ្នកគាំទ្រក្រុមជីហាដដែលបានមកធ្វើភេរ វកម្មអត្តឃាតប្រឆាំងក្បួនឆ្មាំបដិវត្តន៍អុីរ៉ង់ បង្កឱ្យស្លាប់ទាហានអុីរ៉ង់២៧នាក់។ ការវាយប្រហារបានធ្វើឡើងនៅតំបន់ក្នុងទឹកដីអុីរ៉ង់ ជាប់ព្រំដែនជាមួយប៉ាគីស្ថាន។
ក្រៅអំពីបញ្ហាសន្តិសុខ និងភេរវកម្ម ទស្សនកិច្ចរបស់លោក អុីមរ៉ាន់ ខាន់ ក៏ មានកម្មវត្ថុចង់ស្វែងរកលទ្ធភាពអភិវឌ្ឍ ពាណិជ្ជកម្មនិងសហប្រតិបត្តិការសេដ្ឋ កិច្ច។ តែលោកនាយករដ្ឋមន្ត្រីសុំមិនសន្យាអ្វីជាសាធារណៈជាមួយអុីរ៉ង់ក្នុងវិស័យថាមពលឡើយ ដើម្បីកុំឱ្យប៉ះទង្គិចជាយថាហេតុណាមួយនឹងទណ្ឌកម្មអាមេរិកលើអុី រ៉ង់។ អាមេរិកដែលទើបសម្រេចចិត្តខ្ទប់ការនាំចេញថាមពលប្រេងអុីរ៉ង់ទាំងស្រុងនៅថ្ងៃចន្ទនេះដែរ ដោយមិនបន្តភាពអនុគ្រោះឱ្យប្រទេស៨ (ចិន កូរ៉េខាងត្បូង ក្រិក ឥណ្ឌា អុីតាលី ជប៉ុន តែវ៉ាន់ និងទួរគី) អាចទិញប្រេង ពីអុីរ៉ង់បានទៀតឡើយ៕ ធី រីណា
