សារព័ត៌មាន នគរវត្ត តែងតែនាំមុខគេជានិច្ច
ប្រជាពលរដ្ឋ ក៏ដូចជាមន្ត្រីរាជការ នៅក្រុងសែនមនោរម្យ ទីរួមខេត្តមណ្ឌលគិរី ម្នាក់ៗនាំគ្នាយកដៃរឹតដើមទ្រូង ក៏ព្រោះតែលោកប្រធានមន្ទីរសេដ្ឋកិច្ច និងហិរញ្ញវត្ថុយកដីចិញ្ចើមផ្លូវមុខមន្ទីរឲ្យកូនលក់ខោអាវ ។ ការធ្វើបែបនេះ ក៏ព្រោះតែដើម្បីប្រយោជន៍ផ្ទាល់ខ្លួន ហើយអនាគតអាចនឹងក្លាយទៅជាម្ចាស់កម្មសិទ្ធិលើដីរួមនេះ ។ ក្រុមមន្ត្រីនៅមន្ទីរហិរញ្ញវត្ថុបានត្រឹមដើរគ្រវីក្បាល ពីព្រោះថា លោករឿន ផៃរិទ្ធ ប្រធានមន្ទីរសេដ្ឋកិច្ច និងហិរញ្ញវត្ថុដែលល្បីល្បាញរឿងពុករលួយយូរឆ្នាំមកនោះ បែរជាមកសន្សំកាក់ល្អិតនៅកណ្តាលវាលទៅវិញ ។
ប្រភពរាយការណ៍ថា តម្លៃនៃការអនុញ្ញាតឲ្យកូនសង់តូបលក់ឥវ៉ាន់ នៅមុខមន្ទីរនោះមិនជាថ្លៃប៉ុន្មានទេ ប៉ុន្តែវាជាផលប្រយោជន៍នៃការលក់ទំនិញ ដែលជាកូនរបស់លោកប្រធានមន្ទីរនោះតែម្តង ។ ការតាំងលក់ទំនិញជាតូបនៅមុខមន្ទីរបែបនេះ ក្រៅតែពីធ្វើឲ្យបាត់បង់សោភ័ណ្ឌភាពក្នុងទីក្រុង មុខមន្ទីរនេះ ក៏ត្រូវបានបាំងបិទផងដែរ ។ ប៉ុន្តែព្រោះតែផលប្រយោជន៍ក្រុមគ្រួសារលោកប្រធានមន្ទីរមិនគិតអ្វីសោះឡើយ ។ ប្រភពពីមន្ត្រីនៅក្រោមអំណាចលោក រឿន ផៃរិទ្ធ អះអាងថា ការអនុញ្ញាតឲ្យសាងសង់តូបនៅមុខមន្ទីរនោះ គឺជារឿងអត្តនោម័តរបស់លោកប្រធានមន្ទីរ ដែលគ្មាននរណាហ៊ានតវ៉ានោះឡើយ។ ក្រុមមន្ត្រីនៅក្នុងមន្ទីរនោះបានបន្តថា ក្រៅពីអំពើពុករលួយ ដែលមន្ត្រីនៅជុំវិញសាលាខេត្តសុទ្ធតែដឹងនោះ លោករឿន ផៃរិទ្ធជាមេដឹកនាំដែលធ្វើការ សម្រេចចិត្តដោយអត្តនោម័ត ។
បើតាមប្រភពរាយការណ៍ថា នៅក្រុងសែនមនោរម្យ ដីទំនេរមានច្រើនកន្លែង ហេតុអ្វីបានជាគេមិនទៅជួលដើម្បីលក់ឥវ៉ាន់ ហើយត្រូវមកធ្វើតូបនៅមុខមន្ទីរយ៉ាងដូច្នេះ? វាមិនមែនជារឿងផលប្រយោជន៍លុយកាក់អ្វីទេ ប៉ុន្តែ វាជាផលប្រយោជន៍បុគ្គល លោក រឿន ផៃរិទ្ធ និងអ្នកលក់នោះឯង ។ ដោយសារតែបញ្ហាប្រយោជន៍បុគ្គលនោះហើយ បានជាក្រុមមន្ត្រីនៃមន្ទីរសេដ្ឋកិច្ច ហិរញ្ញវត្ថុខេត្តមណ្ឌលគិរី អះអាងថា មានរឿងអាស្រូវជាច្រើនដែលគេមិនអាចអត់ទ្រាំបាន ហើយសង្ឃឹមថា ថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ នឹងពិនិត្យមើលករណីមិនប្រក្រតីជាច្រើននៅក្នុងមន្ទីរសេដ្ឋកិច្ចហិរញ្ញវត្ថុខេត្តមណ្ឌលគិរី ៕
