បុរសម្នាក់ទំនងជាស្រវឹងស្រា បានបើករថយន្តទៅបុករថយន្តកាមរី ពីក្រោយ ខ្ទាតចូលទៅផ្ទះលក់គ្រឿងសំណង់

ភ្នំពេញ៖ បុរសម្នាក់ទំនងជាស្រវឹងស្រាបានបើករថយន្តទៅបុករថយន្តកាមរីបាទ្បែន ពីក្រោយ ពេញទំហឹង បណ្តាលឲ្យខ្ទាតចូលទៅផ្ទះលក់គ្រឿងសំណង់ នៅក្បែរនោះ បង្កការភ្ញាក់ផ្អើល កាលពីម៉ោង៤ និង៣០ទៀបភ្លឺ ឈានចូលភ្លឺថ្ងៃទី២៩ ខែមេសា ឆ្នាំ២០១៩ នៅតាមបណ្ដោយផ្លូវហាណូយ ខាងមុខក្លោងទ្វារវត្តសំរោងអណ្ដែត ស្ថិតក្នុង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

ប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរស និងស្ត្រី ២នាក់ បើករថយន្តមួយគ្រឿង ម៉ាកតូយ៉ូតា កាមរីបាទ្បែន ពណ៌ស្ករ ពាក់ស្លាកលេខ ភ្នំពេញ 2AF-9012 ធ្វើដំណើរតាមបណ្ដោយផ្លូវហាណូយ ក្នុងទិសដៅពីត្បូងទៅជើង ។ ខណៈមកដល់ចំណុចកើតហេតុ ស្រាប់តែមានរថយន្តមួយគ្រឿងទៀត ម៉ាកហ៊ីយ៉ាន់ដាយ ស្តារិច ពណ៌ស ពាក់ស្លាកលេខ ភ្នំពេញ 2AU-8468 បើកបរដោយបុរសម្នាក់ទំនងជាស្រវឹងស្រា និងមានបុរសម្នាក់ទៀត រួមដំណើរ មកពីក្រោយយ៉ាងលឿនបានជ្រុលបុករថយន្តបាទ្បែន ចំពីក្រោយពេញទំហឹង បណ្តោយឲ្យរថយន្តបាទ្បែនវិលជាច្រើនជុំ ទៅបុកទ្វារផ្ទះលក់គ្រឿងសំណង់យីហោ ជាសួនតារា វៀចទ្វារអស់ចំនួនបី រីឯរថយន្តរងការខូចខាតស្ទើរទាំងស្រុង ចំណែកឯអ្នកបើកបររងរបួសស្រាល ។

បន្ទាប់ពីកើតហេតុ សមត្ថកិច្ចជំនាញបានចុះវាស់វែង រួចស្ទូចយករថយន្តទាំងពីរគ្រឿង ទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំស្រាយគ្នានៅពេលក្រោយ ៕ ជ្រោយពេជ្រ