សារព័ត៌មាន នគរវត្ត តែងតែនាំមុខគេជានិច្ច
ប៉ោយប៉ែត៖ បុរសម្នាក់ស្លាប់នៅនឹងកន្លែង រីឯម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍នៅវេលាម៉ោង ០៨ និង ២៩នាទី ថ្ងៃទី២ ខែឧសភា ឆ្នាំ២០១៩ លើផ្លូវជាតិលេខ៥ ត្រង់ចំណុចខាងកើតវិហារ ឥស្លាម ស្ថិតក្នុង ភូមិនិមិត្ត៣ សង្កាត់និមិត្ត ក្រុងប៉ោយបែត ខេត្តបន្ទាយមានជ័យ ។
សមត្ថកិច្ចចរាចរណ៍ក្រុងប៉ោយប៉ែតប្រាប់ថា មុនកើតហេតុមានរថយន្ត១គ្រឿងម៉ាកហ៊ីយ៉ាន់ដាយ បីតោនកន្លះ ពណ៌ស ពាក់ស្លាកលេខ ភ្នំពេញ 3D-3154 ដឹកទឹកកកបើកឆ្លងកាត់ទទឹងទ្រូងថ្នល់ ពីជើងទៅត្បូង បើកបរដោយឈ្មោះហ៊ឹម ចាន់រុន ភេទប្រុស អាយុ២១ឆ្នាំ មុខរបរអ្នកបើកបររថយន្ត បច្ចុប្បន្នស្នាក់នៅបណ្តោះអាសន្នក្នុងភូមិបាលិលេយ្យ២ សង្កាត់-ក្រុងប៉ោយប៉ែត ខេត្តបន្ទាយមានជ័យ ស្រាប់តែមានម៉ូតូ១គ្រឿង ម៉ាកហុងដា ទ្រីមសង់សេ125 ពណ៌ខ្មៅ ពាក់ស្លាកលេខ បាត់ដំបង 1O-8860 ដោយបើកបរគោលដៅពីទិសខាងកើតទៅទិសខាងលិចជិះគ្នាពីរនាក់បើកបរដោយឈ្មោះ ហេងស៊ីម ភេទប្រុស អាយុ64ឆ្នាំ និងអ្នករួមដំណើរម្នាក់ទៀតពុំស្គាល់អត្តសញ្ញាណ លុះបើកដល់ចំណុចកើតហេតុបណ្តាលឲ្យដៃចង្កូតម៉ូតូ ប៉ះក្បាលរថយន្ត ក៏ដួលបោកក្បាលទៅលើផ្លូវជាតិជួបគ្រោះថ្នាក់ចរាចរណ៍់តែម្តង ។
ករណីខាងលើនេះ បណ្តាលឲ្យជនរងគ្រោះឈ្មោះ ហេងស៊ីម ភេទប្រុស អាយុ៦៤ឆ្នាំ ជាអ្នកបើកបរម៉ូតូបច្ចុប្បន្នរស់នៅក្នុងភូមិព្រះពន្លា ឃុំរូងជ្រៃ ស្រុកថ្មគោល ខេត្តបាត់ដំបង (ស្លាប់នៅកន្លែងកើតហេតុ) ចំណែកអ្នករួមដំណើររងរបួសធ្ងន់មិនស្គាល់អត្តសញ្ញាណ ត្រូវកម្លាំសមត្ថកិច្ចដឹកទៅសង្គ្រោះនៅមន្ទីរពេទ្យ ។
មូលហេតុ ម៉ូតូបើកល្បឿនលឿន ចំណែក រថយន្ត បើកបរឆ្លងផ្លូវខ្វះការប្រុងប្រយ័ត្ន ។
សមត្ថកិច្ចបញ្ជាក់ថា ក្រោយពេលកើតហេតុ អ្នកបើកបររថយន្តត្រូវបានឃាត់យកមកសួរនាំនៅអធិការដ្ឋាន ចំណែកម៉ូតូ និងរថយន្តយកទៅរក្សាទុក្ខ និងប៉ុស្ដិ៍រដ្ឋបាលនិមិត្តរង់ចាំដោះស្រាយតាមផ្លូវច្បាប់ ៕ វណ្ណាប៉ោយប៉ែត
