សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែងៈ អគ្គិភ័យបានឆេះស្ថានីយប្រេង និងហ្គាស់ មួយកន្លែងយ៉ាងសន្ធោសន្ធៅ និងបានរាលដាលឆេះដល់ ផ្ទះអ្នកជិតខាងមួយខ្នងអស់គ្មានសល់បណ្តាលឱ្យខូចខាតដំបូលផ្ទះ អ្នកជិតខាងជាច្រើនទៀត ដោយសារផ្ទុះធុងហ្គាស់ បានខ្ទាតប៉ើងជាច្រើនបំណែក បណ្តាលមកពីផ្ទុះហ្គាស់ កាលពីវេលាម៉ោង៥ និង៤៥នាទី ថ្ងៃសុក្រ ១៤រោច ខែចេត្រ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣ ខែឧសភា ឆ្នាំ២០១៩ ។
តាមប្រភពនៅកន្លែងកើតហេតុ បានឲ្យដឹងថា គេឃើញរថយន្តស៊ីទែនហ្គាស់ ចូលបាញ់ហ្គាស់ដាក់ក្នុងស៊ីទែន ឲ្យស្ថានីយប្រេង និងហ្គាស់យីហោប៉ាវចិន្តា២ មិនបានប៉ុន្មានផងស្រាប់តែមានអណ្តាតភ្លើងឆាបឆេះ តែម្តង ។ នៅពេលម្ចាស់ឃើញហេតុហេតុការណ៍ ដូច្នេះក៏ស្ទុះវឹងទៅទាញបំពង់ពន្លត់អគ្គិភ័យ មកបាញ់ពន្លត់តែមិនបានសម្រេចបំណងនោះទេ ដោយសារតែអណ្តាតភ្លើងវាឆេះលឿនពេក មិនអាចពន្លត់បានទើបធ្វើឲ្យម្ចាស់ស្ថានីយប្រេងរងរបួសធ្ងន់ធ្ងរដោយសារត់ទៅយកកូន និងរត់ទៅបើកគម្របស៊ីទែនហ្គាស់ ដើម្បីកំុឲ្យផ្ទុះ ។
ចំណែកប្រពន្ធរន្ធត់ចិត្តខ្លាំរហូតដល់សន្លប់ បច្ចុប្បន្នកំពុងសម្រាកព្យាបាលនៅមន្ទីរពេទ្យ ។
ចំណែកភ្លើងដែលបន្តរាលដាលទៅឆេះ ស្ថានីយប្រេងជ័រទឹកនៅក្បែរនោះ ហើយសមត្ថកិច្ចបានជួយពន្លត់ និងបាញ់ទឹកការពារ ផ្ទះអ្នកជិតខាងកុំឲ្យឆេះរាលដាលបន្តទៀត ។ ចំណែករថយន្តពន្លត់អគ្គិភ័យរបស់ស្នងការដ្ឋាននគរបាលខេត្តស្ទឹងត្រែងបានបាញ់ទឹកពន្លត់ភ្លើង អស់ជាច្រើនគ្រឿងខណៈភ្លើងកំពុងឆាបឆេះ យ៉ាងសន្ធោសន្ធៅ ។ ចំណែកម្ចាស់ផ្ទះអ្នករស់នៅជិតខាងមានអារម្មណ៍ភិតភ័យ ដឹកជញ្ជូនរបស់របរមានតម្លៃចេញពីផ្ទះរបស់ខ្លួន យ៉ាងញាប់ដៃញាប់ជើង ព្រោះខ្លាចឆេះឆ្លងរាលដល់ផ្ទះពួកគាត់បន្តទៀត ។
ចំពោះហេតុការណ៍នេះសមត្ថកិច្ចមិនទាន់បញ្ជាក់បាននៅឡើយទេថា ផ្ទះដែលឆេះនេះ ខូចខាតទ្រព្យសម្បត្តិអស់ប៉ុន្មាននោះទេ គ្រាន់តែដឹងថា រងគ្រោះ៣នាក់ ថៅកែម្នាក់ និងកូនចៅ២នាក់ ។ ដោយគ្រាន់តែដឹងថាអគ្គិភ័យឆេះអស់ស្ថានីយប្រេងមួយកន្លែង ហើយមនុស្សរងរបួស៣នាក់ ក្នុងនោះថៅកែស្ថានីយប្រេងម្នាក់ កូនចៅ២នាក់ទៀតបច្ចុប្បន្នកំពុងសម្រាកព្យាបាលនៅមន្ទីរពេទ្យ៕ មាស សុផាត
