សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កាន់តែកម្សត់ និងគួរឲ្យអាសូរចំពោះជីវិតគូរបស់តារាកំប្លែង នាងភីម និងនាយ តាក់ស៊ី ព្រោះតែនាយតាក់ស៊ីធ្លាប់បានសម្រេចចិត្តចូលបួស និងបើកផ្លូវឲ្យនាងភីម រកស្នេហ៍ថ្មីបើអាច ។ នាង ភីម កាន់តែខ្លោចចិត្តអាណិតប្តី ក្រោយពីបានឃើញ បានដឹងស្ថានភាពជំងឺទឹកនោមផ្អែមនាយតាក់ស៊ីកាន់តែដុនដាប ។
ជាច្រើនថ្ងៃកន្លងមកហើយ ដែលរឿងរ៉ាវរបស់តារាកំប្លែងគេតែងតែហៅថា ស៊ុន អ៊ូខុង គឺនាយ តាក់ ស៊ី ដែលបានប្រកាសថា នឹងថ្វាយខ្លួនជូនព្រះពុទ្ធ ព្រះធម៌ ព្រះសង្ឃ បើសិនខ្លួនបានជាពីជំងឺដោយមិនស្ដាយអ្វីទាំងអស់ ហើយគាត់ ក៏នឹងបើកផ្លូវឲ្យប្រពន្ធគឺនាង ភីម ចង់មានគ្រួសារថ្មីគាត់ក៏មិនហាមដែរ ព្រោះខ្លួនគាត់ថ្វាយជូនព្រះទៅរហូតហើយដែរ ។
ការប្រកាសនេះ ធ្វើឡើងក្រោយពីស្ថានភាពជំងឺរបស់តារាកំប្លែងមួយនេះកាន់តែមានសភាពមិនធូរស្រាល ហើយត្រូវដេកសម្រាកនៅនឹងកន្ទេលថែមទៀត ។ នាង ភីម នៅតែមិនអស់ចិត្តនិងបារម្ភពីប្ដីយ៉ាងខ្លាំង ក្រោយបានឃើញស្ថានភាពជំងឺរបស់នាយ តាក់ស៊ី ដេកនឹងកន្ទេល ព្យូសេរ៉ូមក្នុងមន្ទីរពេទ្យ ។
នាងបានលើកឡើងថា «ស្ថានភាពបែបនេះហើយដែលធ្វើឲ្យចិត្តខ្ញុំមិនស្ងប់ពេលដែលយើងទាំងពីរនាក់នៅឆ្ងាយពីរគ្នា» ។ នាងបានព្យាយាមស្វែងរកការងារអ្វីថ្មី និងចេញទៅខាងក្រៅដើម្បីធ្វើរឿងខ្លះបន្លប់ទុក្ខ ប៉ុន្តែចិត្តនាងនៅតែគិតដល់រឿងនេះ ។ នាងក៏មិនដែលគិតដែរថានឹងរកបុរសណាឡើយក្រៅពីស្វាម ហើយក៏មិនយកស្វាមីថ្មីតាមការបើកផ្លូវរបស់អតីតស្វាមីដែរ ។
គួរបញ្ជាក់ដែរថា តារាកំប្លែង នាយតាក់ស៊ី មានជំងឺទឹកនោមផ្អែមប្រមាណ១០ឆ្នាំកន្លងមកហើយ ។ ជំងឺនេះចាប់ផ្តើមធ្វើទុក្ខខ្លាំងចាប់ពីអំឡុងឆ្នាំ២០១៣មកម្ល៉េះ ដែលជាហេតុធ្វើឲ្យជីវភាពគ្រួសារតារាកំប្លែងមួយនេះ មិនមានលក្ខណៈល្អប្រសើរ ព្រោះតែត្រូវការចំណាយលើការព្យាបាល និងខកខានការសម្តែងជាយូរមកហើយដែរ ។
គួរបញ្ជាក់ថា នាយតាក់ស៊ី ធ្លាប់ឆ្លងកាត់ជីវិតជាក្មេងកំព្រាឪពុក ដើររើសអេតចាយ តែនាយខំតស៊ូ រហូតបានក្លាយជាតារាកំប្លែងល្បីឈ្មោះ បន្ទាប់ពីបានប្រឡងជាប់ទាំងពីរនាក់ប្តីប្រពន្ធ ក្នុងក្រុមកំប្លែង CTN នៅឆ្នាំ២០០៩-២០១០ ហើយក៏បានដូរឈ្មោះពី មុល សារឿន មកនាយតាក់ស៊ី ឯភរិយាប្តូរឈ្មោះពី សុភាន់ មកជានាង ភីម ។ នាយតាក់ស៊ី មានស្រុកកំណើតនៅភូមិវត្តរំដួល ស្រុកសង្កែ ខេត្តបាត់ដំបង បច្ចុប្បន្ន រស់នៅភូមិវត្តកណ្តាល ឃុំទឹកវិល ស្រុកស្អាង ខេត្តកណ្តាល ដែលជាស្រុកកំណើតភរិយា ។ នាយបានរៀបការនៅឆ្នាំ២០០៦ សព្វថ្ងៃមានកូនប្រុសម្នាក់ផងដែរ ៕ វឌ្ឍនា
