សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ ប្រភពពីមន្ត្រីអាជ្ញាធរមូលដ្ឋាននិងប្រជាពលរដ្ឋនៅស្រុកភ្នំក្រវាញ ខេត្តពោធិ៍សាត់ បានឲ្យដឹងថា បច្ចុប្បន្នបទល្មើសដឹកជញ្ជូនឈើចេញពីតំបន់ដែនជម្រកសត្វព្រៃភ្នំឱរ៉ាល់ និងតំបន់ផ្សេងៗទៀតក្នុងស្រុកភ្នំក្រវាញ ខេត្តពោធិ៍សាត់ នៅតែបន្តកើតឡើងយ៉ាងរាលដាល។ មានការរិះគន់ចំៗថា លោក ម៉ៅ ធនិន អភិបាលខេត្តពោធិ៍សាត់ លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ លោក ឡាយ វិសិដ្ឋ ប្រធានមន្ទីរកសិកម្មខេត្តពោធិ៍សាត់ និងមេរដ្ឋបាលព្រៃឈើខេត្តពោធិ៍សាត់ មិនចាត់វិធានការបង្ក្រាបក្រុមឈ្មួញដែលដឹកជញ្ជូនឈើចេញពីខេត្តពោធិ៍សាត់ យ៉ាងពេញបន្ទុកនោះទេ។ ជាក់ស្ដែងមន្ត្រីយោធាឈ្មោះ ជិន និត នៅក្នុងកងពលតូចអន្តរាគមន៍លេខ១៤(តំបន់បាយឃ្លះ) នៅតែធ្វើសកម្មភាពដឹកជញ្ជូនឈើចេញពីស្រុកភ្នំក្រវាញ ចូលទៅរាជធានីភ្នំពេញ ជារៀងរាល់យប់ដោយសារមានការឃុបឃិតបើកដៃពីសំណាក់មន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័ន។
ប្រជាពលរដ្ឋនៅក្នុងស្រុកភ្នំក្រវាញ បានឲ្យដឹងថា មន្ត្រីយោធាឈ្មោះ ជិន និត នៅក្នុងកងពលតូចអន្តរាគមន៍លេខ១៤ ឈរជើងនៅចំណុចខាងលិចស្ពានទ្វារម្អម នៅតែធ្វើសកម្មភាពដឹកជញ្ជូនឈើប្រណីតចេញពីស្រុកភ្នំក្រវាញ ចូលទៅរាជធានីភ្នំពេញ យ៉ាងរលូនព្រោះមន្ត្រីជំនាញនិងសមត្ថកិច្ចតាមដងផ្លូវមិនហ៊ានប៉ះពាល់ឈ្មួញម្នាក់នេះឡើយ។ ប្រភពបានឲ្យដឹងទៀតថាមន្ត្រីយោធាឈ្មោះ ជិន និត ប្រើប្រាស់រថយន្តម៉ាកកាមរីបាឡែន ម៉ាកហាយឡេនឌ័រ និងម៉ាកឡិចស៊ីស ជាច្រើនគ្រឿងដឹកជញ្ជូនឈើពីស្រុកភ្នំក្រវាញ ខេត្តពោធិ៍សាត់ ឆ្លងកាត់ខេត្តកំពង់ឆ្នាំង ហើយចេញដំណើរពីស្រុកភ្នំក្រវាញ ទៅរាជធានីភ្នំពេញ ជារៀងរាល់យប់ដោយីគ្មានញញើតអ្វីទាំងអស់។ មន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធក្នុងខេត្តពោធិ៍សាត់ និងខេត្តកំពង់ឆ្នាំង ត្រូវបានគេដឹងថា ទទួលផលប្រយោជន៍ជាប្រចាំពីមន្ត្រីយោធាឈ្មោះ ជិន និត ទើបបណ្ដោយឲ្យឈ្មួញដឹកជញ្ជូនឈើរូបនេះធ្វើអ្វីៗស្រេចតែអំពើចិត្តរបស់ខ្លួន។
មន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្តពោធិ៍សាត់ បានឲ្យដឹងថា ព្រៃឈើដែលនៅសេសសល់ក្នុងស្រុកភ្នំក្រវាញ ជាពិសេសនៅក្នុងតំបន់ដែនជម្រកសត្វព្រៃភ្នំឱរ៉ាល់ ចៀសមិនផុតពីសេចក្ដីវិនាសសាបសូន្យក្នុងពេលឆាប់ៗខាងមុខនេះទេ។ ជាក់ស្ដែងមន្ត្រីយោធាឈ្មោះ ជិន និត ក្លាយជាឈ្មួញដឹកជញ្ជូនឈើខុសច្បាប់ចេញពីស្រុកភ្នំក្រវាញ យ៉ាងពេញបន្ទុកហើយឈ្មួញជាច្រើននាក់ទៀតដូចជា ឈ្មួញឈ្មោះ ឌឿម ឈ្មួញឈ្មោះ ណុប ឌី ឈ្មួញឈ្មោះ តាំង អៀង និងឈ្មួញឈ្មោះ ង៉ូវ ទី ក៏នៅតែបន្តសកម្មភាពដឹកជញ្ជូនឈើចេញពីស្រុកភ្នំក្រវាញ និងស្រុកវាលវែង ខេត្តពោធិ៍សាត់ យ៉ាងរលូនព្រោះគ្មានមន្ត្រីជំនាញឬសមត្ថកិច្ចពាក់ព័ន្ធណាហ៊ានប៉ះពាល់ពួកគេទាល់តែសោះ។ លើសនេះទៅទៀតលោក វេង សាខុន រដ្ឋមន្ត្រីក្រសួងកសិកម្ម និងលោក កែវ អូម៉ាលីស្ស ប្រធានរដ្ឋបាលព្រៃឈើនៃក្រសួងកសិកម្ម កំពុងរក្សាភាពស្ងៀមស្ងាត់ក្នុងខណៈដែលក្រុមឈ្មួញដឹកជញ្ជូនឈើចេញពីខេត្តពោធិ៍សាត់ យ៉ាងរាលដាល៕ ហេង សូរិយា
