ស្រវឹងស្រាជោក បើករថយន្តរេចង្កូត ហោះរំលងសួនច្បារ ទៅបុករថយន្ត២គ្រឿង និងម៉ូតូ១គ្រឿង របួសធ្ងន់២នាក់

ភ្នំពេញ៖ បុរសម្នាក់បើករថយន្តមួយគ្រឿងយ៉ាងលឿន ក្នុងសភាពស្រវឹងស្រា បានរេចង្កូតហោះរំលងឃឿនសួនច្បារ រួចទៅបុកចំរថយន្តស៊ីទេនដឹកហ្គាស់ និងរថយន្តសុីណាមួយគ្រឿងទៀត និងបុកម៉ូតូហុងដាឌ្រីម បណ្តាលឲ្យរងរបួសធ្ងន់២នាក់ ខូចខាតរថយន្តខ្ទេចស្ទើរទាំងស្រុង ។

ហេតុការណ៍នេះ បានកើតឡើងកាលពីវេលាម៉ោង៨ និង១៥នាទីយប់ ថ្ងៃទី១៣ ខែឧសភា ឆ្នាំ២០១៩ តាមបណ្តោយផ្លូវជាតិលេខ៥ នៅចំណុចក្បែររោងចក្រម៉ែនសារុន ក្នុងភូមិដួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។

តាមប្រភពព័ត៌មានពីសាក្សីដែលឃើញហេតុការណ៍ឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តបង្កមួយគ្រឿង ម៉ាកកាំម៉ារី បាឡែន ពណ៌ស្ករ ពាក់ស្លាកលេខ ភ្នំពេញ 2HA-6051 បើកបរតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើង ពេលបើកមកដល់ចំណុចកើតហេតុគេបានឃើញរថយន្តបង្ក បោះពួយយ៉ាងលឿន ក្នុងសភាពស្រវឹងស្រា ងងុយដេក ងោកមួយភាំង ក៏រេចង្កូត មកឆ្វេងដៃ ហោះរំលងឃឿនសួនច្បារ ពុះចែកទ្រូងផ្លូវ រួចទៅបុក ចំរថយន្តស៊ីទេនដឹកហ្គាស់មួយគ្រឿង ម៉ាកហ៊ីយ៉ានដាយ ពណ៌ទឹកសមុទ្រ ពាក់ស្លាកលេខ ភ្នំពេញ 3A-3191 បើកបរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង បុកចំពីមុខពេញទំហឹង បណ្តាលឲ្យខ្ទេចរថយន្តស៊ីទេនដឹកហ្គាស់ អស់មួយកំណាត់មុខ និងបែកកញ្ចក់មួយជំហៀង ខាងស្តាំ ហើយរថយន្តបង្កវិលមួយជុំទៅបុក និងម៉ូតូហុងដាឌ្រីមសេ ១២៥ ពាក់ស្លាកលេខ កណ្តាល 1G-0192 ចំពីមុខបណ្តាលឲ្យខ្ទេចវៀចកង់មុខ ហើយរថយន្តបង្កមិនទាន់អស់ល្បឿននោះទេ ក៏ជ្រុលទៅប៉ះចំរថយន្តសុីណាមួយគ្រឿងទៀត ពណ៌សពាក់ស្លាកលេខបាត់ដំបង 2C-5789 បើកបរស្របទិសដៅគ្នាជាមួយរថយន្តស៊ីទេន ដឹកហ្គាស់ចំកាងមុខផ្នែកខាងស្តាំ បណ្តាលឲ្យខ្ទេចមួយជំហៀង ចំណែកឯរថយន្តបង្កវិញ បែកកង់ទាំង៤ និងខ្ទេចស្ទើរទាំងស្រុង ហើយម្ចាស់រថយន្តរងរបួសដាច់ស្លឹកត្រចៀកមួយចំហៀងខាងស្តាំភ្លាមៗនោះដែរ រថយន្តសង្គ្រោះ ក៏បានមកដល់ដឹកយកជនរងគ្រោះម្ចាស់ម៉ូតូហុងដា ឌ្រីម និងម្ចាស់រថយន្តបង្ក យកទៅព្យាបាលនៅមន្ទីរពេទ្យកាលម៉ែត ។

ក្រោយពេលកើតហេតុរថយន្តបង្ក និងរថយន្តរងគ្រោះថែមទាំងម៉ូតូ ត្រូវបានសមត្ថកិច្ចវាស់វែងស្ទូចយកទៅរក្សាទុក នៅការិយាល័យចរាចរណ៍ផ្លូវគោកដើម្បី រង់ចាំដោះស្រាយគ្នានៅពេលក្រោយ ៕ ធឿនព្រែកជ័យ