សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិចិនម្នាក់ ទំនងស្រវឹងបើករថយន្ត RAV4 ក្នុងល្បឿនលឿនរេចង្កូតទៅបុករថយន្តកាមរី ហាយប្រ៊ីតដែលចតស្ងៀមរុញទៅបុករថយន្តស៊េរីទំនើបមួយគ្រឿងទៀត បណ្តាលឲ្យរងការខូចខាត ។
ហេតុការណ៍នេះបានកើតឡើងកាលពីវេលាម៉ោង២និង២០នាទីរំលងអាធ្រាត្រឈានចូលថ្ងៃទី១៨ ខែឧសភា ឆ្នាំ២០១៩ នៅចំណុចគល់ស្ពានអាកាសឥន្ធនូខាងលិច ស្ថិតក្នុងសង្កាត់ទន្លេបាសាក់ ខណ្ឌចំការមន ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុរថយន្តម៉ាកកាមរីហាយប្រីតពណ៌ស ពាក់ស្លាកលេខ ភ្នំពេញ2AR 1167 និងរថយន្តម៉ាកTUCSON. ពណ៌ខ្មៅ ពាក់ស្លាកលេខ ភ្នំពេញ2AZ 2563 ចតស្ងៀម នៅលើដងផ្លូវមុខសណ្ឋាគារ អេនិកប៊ូនិក ក្នុងទិសដៅពីកើតទៅលិច ក្រោយមកស្រាប់តែមានរថយន្តម៉ាក RAV4 ពណ៌ទឹកប្រាក់ពាក់ស្លាកលេខ ភ្នំពេញ 2AY 9816 បើកបរដោយបុរសជនជាតិចិនម្នាក់ធ្វើដំណើរក្នុងទិសដៅពីលិចទៅកើតក្នុងល្បឿនលឿនសង្ស័យស្រវឹង ក៏រេចង្កូតទៅបុករថយន្តហាយប្រីតរុញទៅបុករថយន្តម៉ាក TUCSON បណ្តាលឲ្យរងការខូចខាតយ៉ាងដំណំ ។
ក្រោយកើតហេតុភាគីទាំងសងខាងបានសម្របសម្រួលដោយភាគីបង្កចេញថ្លៃជួសជុលទៅភាគីរងគ្រោះដើម្បីបញ្ចប់រឿង ៕ សុខាសែនជ័យ
