សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ជិះម៉ូតូឌុបគ្នាធ្វើសកម្មភាពឆក់ទូរស័ព្ទពីជនជាតិចិនមួយក្រុម ដែលឡើងជិះកង់បីមិនបានសម្រេច ត្រូវបានជនរងគ្រោះចាប់ទាញទម្លាក់ពីម៉ូតូវិញ នៅនៅមុខភោជនីយដ្ឋាន តន្ត្រីស៊ីគោងលី តាមបណ្តោយផ្លូវ៣១០ ស្ថិតក្នុងសង្កាត់បឹកកេងកងទី២ ខណ្ឌចំការមន កាលពីវេលាម៉ោង១១ និង៣០នាទីយប់ ថ្ងៃទី២០ ខែឧសភាឆ្នាំ២០១៩ ហើយព្យាយាមរត់គេចខ្លួន ត្រូវបានប្រជាពលរដ្ឋដេញចាប់ជាប់នៅផ្លូវ៣០៤ ស្ថិតក្នុងសង្កាត់បឹកកេងកងទី២ ចំណែកម្នាក់ទៀតគេចខ្លួនបាត់ ។
ជនសង្ស័យឈ្មោះឡាច សង់ឌីន ភេទប្រុស អាយុ១៧ឆ្នាំ ជាសិស្សនៅសាលាផ្សារដើមថ្កូវ ស្នាក់នៅសង្កាត់ផ្សារដើមថ្កូវ ខណ្ឌចំការមន ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញជនជាតិចិនមួយក្រុមបានចុះពីភោជនីយដ្ឋាន តន្ត្រីស៊ីគោងលី ឡើងជិះកង់បីភ្លាមនោះស្រាប់តែមានជនសង្ស័យ២នាក់ជិះម៉ូតូម៉ាក BEAT មិនចាំស្លាកលេខមកធ្វើសកម្មភាពឆក់ទូរស័ព្ទតែមិនបានសម្រេចត្រូវបានជនរងគ្រោះចាប់ទាញទម្លាក់ពីម៉ូតូម្នាក់ចំណែកម្នាក់ទៀតគេចខ្លួនបាត់ ។
សាក្សីដដែលបានបន្តថា ភ្លាមនោះជនសង្ស័យបានព្យាយាមរត់គេចខ្លួនតែត្រូវបានប្រជាពលរដ្ឋ និងសន្តិសុខដេញរហូតទៅដល់ផ្លូវ៣០៤ ទើបឃាត់ជាប់តែម្តងរួចប្រគល់ឲ្យសមត្ថកិច្ចចាត់ការតាមច្បាប់ ៕ សុខាសែនជ័យ
