សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ លោកតាម្នាក់ ជិះកង់ឆ្លងផ្លូវ មិនមើលឆ្វេងមើលស្ដាំ ធ្វើឲ្យម៉ូតូមួយគ្រឿងបើកដោយល្បឿនលឿនបុកកង់លោកតាពេញមួយទំហឹង បណ្ដាលឲ្យលោកតារងគ្រោះដួលបោកក្បាលទៅនឹងផ្លូវស្លាប់ភ្លាមៗនៅកន្លែងកើតហេតុ ។ ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង៦និង១០នាទី ថ្ងៃទី២១ ខែឧសភា ឆ្នាំ២០១៩ នៅលើកំណាត់ផ្លូវលេខ៨ ចន្លោះគីឡូម៉ែត្រ៣៧-៣៨ ស្ថិតក្នុងភូមិវិហ៊ារសួគ៌ជើង ឃុំវិហ៊ារសួគ៌ ស្រុកខ្សាច់កណ្ដាល ខេត្តកណ្ដាល ។
មន្រ្ដីនគរបាលស្រុកខ្សាច់កណ្ដាលបានឲ្យដឹងថា លោកតារងគ្រោះឈ្មោះ ឈួន ឆោម ភេទប្រុស អាយុ៧២ឆ្នាំ នៅភូមិវិហារសួគ៌ជើង ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ។ ចំណែកអ្នកបើកបរម៉ូតូឈ្មោះ គង់ សំនៀង ភេទប្រុស អាយុ៤០ឆ្នាំ មានទីលំនៅភូមិត្រាល ឃុំកំពង់ពពិល ស្រុកពារាំង ខេត្តព្រៃវែង បើកបរម៉ូតូម៉ាកហុងដាដ្រីម ធុនសេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខភ្នំពេញ 1CQ-1552 ។
ប្រភពដដែលបន្ដថា នៅមុនពេលកើតហេតុ សាក្សីបានឃើញលោកតារងគ្រោះជិះកង់តាមបណ្ដោយផ្លូវ លុះមកដល់ចំណុចកើតហេតុ ស្រាប់តែលោកតារងគ្រោះបានជិះកង់ឆ្លងផ្លូវក្នុងទិសដៅពីកើតទៅលិច ដោយពុំបានមើលឆ្វេង និងមើលស្ដាំនោះទេ ខណៈនោះស្រាប់តែមានម៉ូតូមួយគ្រឿង បើកបរក្នុងទិសដៅពីជើងទៅត្បូង ក៏ឈ់មិនទាន់ បានបុកលោកតារងគ្រោះពេញមួយទំហឹង បណ្ដាលឲ្យលោកតារងគ្រោះជាអ្នកជិះកង់ដួលបោកក្បាលទៅនឹងផ្លូវ ស្លាប់ភ្លាមៗនៅកន្លែងកើតហេតុ ។
ក្រោយពីមានហេតុការណ៍កើតឡើង ប្រជាពលរដ្ឋជិតខាង និងសាច់ញាតិជនរងគ្រោះ បានធ្វើការឃាត់ខ្លួនអ្នកបើកបរម៉ូតូខាងលើ ប្រគល់ឲ្យសមត្ថកិច្ច រីឯម៉ូតូត្រូវបានសមត្ថកិច្ចជំនាញ ធ្វើការវាស់វែងនិងកសាងឯកសារដកហូតយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់ ។ ចំណែកសាកសពលោកតារងគ្រោះ ត្រូវបានសមត្ថកកិច្ចប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕ ស្អាងជ័យ
