សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងអន្តរាគមន៍ពិសេសនៃនគរបាល ខណ្ឌពោធិ៍សែនជ័យបានរងរបួសធ្ងន់ម្នាក់ និងស្រាល២នាក់ ខណៈប្រដេញជនសង្ស័យជាមុខសញ្ញាចោរឆក់ទ្រព្យសម្បត្តិប្រជាពលរដ្ឋតាមដងផ្លូវ និងឃាត់ជនសង្ស័យពីរនាក់ចំណែកបក្ខពួក២នាក់ទៀតកំពុងគេចខ្លួន ។
ហេតុការណ៍នេះ បានកើតឡើងកាលពីវេលាម៉ោង៧យប់ ថ្ងៃទី៣០ ខែឧសភា ឆ្នាំ២០១៩ នៅផ្លូវបេតុង សង្កាត់កាកាបទី១ ខណ្ឌពោធិ៍សែនជ័យ ។
សមត្ថកិច្ចបញ្ជាក់ថា ជនសង្ស័យទី១ ឈ្មោះ ប៉ិច សារ៉ាត់ ភេទប្រុស អាយុ ១៧ ឆ្នាំមុខរបរ លើកទឹកសុទ្ធ រស់នៅ ភូមិគោគ ព្រេជ សង្កាត់សំរោងក្រោម ខណ្ឌពោធិ៍សែនជ័យ ។ ទី២ឈ្មោះ ផូ សុផាត ភេទប្រុស អាយុ១៧ ឆ្នាំ មុខរបរសិស្ស រស់នៅ ភូមិ ត្រពាំងធ្នង់ សង្កាត់ ក្រាំងធ្នង់ ខណ្ឌសែនសុខ រាជធានីភ្នំពេញ ។
តាមសមត្ថកិច្ចបានឲ្យដឹងថា មុនកើតហេតុកម្លាំងអន្តរាគមន៍ពិសេសនៃអធិការដ្ឋាននគរបាល ខណ្ឌពោធិ៍សែនជ័យ បានចុះល្បាតពួនស្ទាក់បទល្មើសក្នុងមូលដ្ឋានដើម្បីការពារសុវត្ថិភាព ជូនប្រជាពលរដ្ឋ ដោយមានការបញ្ជាផ្ទាល់ពីលោក យឹម សារ៉ាន់ អធិការនគរបាល ខណ្ឌ ដោយល្បាតដំបន់ងាយរងគ្រោះនៅលើដងផ្លូវជាតិលេខ៤ សង្កាត់ចោមចៅទី៣ ស្រាប់តែជួបជនសង្ស័យជាមុខសញ្ញាចាស់មានគ្នា៤នាក់ជិះម៉ូតូ២គ្រឿងទើបបោះដៃតាមវិទ្យុទាក់ទងកម្លាំងទូទាំង ខណ្ឌ និងប្រដេញស្ទើរតែពេញមួយ ខណ្ឌអស់រយះពេលជិតមួយម៉ោង ទើបជនសង្ស័យជិះបុកម៉ូតូកម្លាំងនគរបាលបណ្តាលឲ្យដួលរងរបួសធ្ងន់ម្នាក់ស្រាល២នាក់ និងឃាត់បានជនសង្ស័យ២នាក់ចំណែក២នាក់ទៀតគេចខ្លួនបាត់ស្រមោល ។
ក្រោយកើតហេតុ ជនរងគ្រោះជាកម្លាំងសមត្ថកិច្ចត្រូវបានបញ្ជូនទៅសង្រោះនៅមន្ទីរពេទ្យភ្លាមៗ ដោយឡែកជនសង្ស័យត្រូវបាននាំទៅសាកសួរបន្ត ៕ សុខាសែនជ័យ
