សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តក្រឡុកស៊ីម៉ង់ត៍ ក្រុមហ៊ុនជីបម៉ុង បើកកៀររថយន្តនីសាន់ បណ្តាលឲ្យរងការខូចខាត ជជែកយកត្រូវរៀងខ្លួន ។
ហេតុការណ៍នេះ បានកើតឡើងកាលពីវេលាម៉ោង៩យប់ ថ្ងៃទី៣០ ខែឧសភា ឆ្នាំ២០១៩ នៅចំណុចស្តុបបូកគោ តាមបណ្តោយផ្លូវព្រះមុនីវង់ កែងផ្លូវម៉ៅសេទុង ស្ថិតក្នុង សង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញរថយន្តម៉ាកនីសាន់ ពណ៌ខ្មៅ ពាក់ស្លាកលេខ ព្រៃវែង2A 0734 ធ្វើដំណើរតាមបណ្តោយផ្លូវព្រះមុនីវង្ស ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ក៏មានរថយន្តក្រឡុកស៊ីម៉ង់ត៍ក្រុមហ៊ុន ជីបម៉ុង ពាក់ស្លាកលេខ ភ្នំពេញ 5A 0573 ធ្វើដំណើរមកពីក្រោយហើយបានកៀររថយន្តនីសាន់ បណ្តាលឲ្យគៀបជាប់គ្នារងការខូចខាតតែមិនមានមនុស្សរងរបួសនោះទេ ។
ក្រោយកើតហេតុ ភាគីទាំងសងខាងបានជជែកយកតែត្រូវរៀងខ្លួន ទើបសមត្ថកិច្ចចុះអន្តរាគមន៍ ទើបភាគីខាងរថយន្តក្រឡុកស៊ីម៉ង់ត៍ព្រមចេញ៥០ដុល្លារដើម្បីបញ្ចប់រឿងនៅកន្លែងកើតហេតុ ៕ សុខាសែនជ័យ
