សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់ក្មេងស្រីម្នាក់ ក្នុងចំណោម៤នាក់ បានរួចផុតពីការស្លាប់ ខណៈដែលនាំគ្នាចុះទៅលេងទឹក ហើយទំនងជាជួយគ្នា ទើបបណ្ដាលឲ្យលង់ស្លាប់ បង្កការភ្ញាក់ផ្អើលដល់អ្នក ភូមិ និងអ្នកធ្វើដំណើរនាំគ្នាជួយចុះមុជរកជាច្រើនម៉ោងទើបរាវឃើញ ។
ហេតុការណ៍នេះ បានកើតឡើងកាលពីថ្ងៃព្រហស្បតិ៍ ១២រោច ខែពិសាខ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣០ ខែឧសភា ឆ្នាំ២០១៩ វេលាម៉ោង៣និង៣០នាទីរសៀល នៅចំណុចរណ្តៅដីខាងលិចវត្តសន្តិភាព ស្ថិតក្នុង ភូមិថ្មល់ សង្កាត់ចេក ក្រុងស្វាយរៀង ។
យោងតាមសមត្ថកិច្ចនគរបាលក្រុងស្វាយរៀងបានឲ្យដឹងថា ក្មេងដែលលង់ស្លាប់៣នាក់ មានឈ្មោះ ហួ សុខសគន្ធាវី ស្រី អាយុ១១ ឆ្នាំទី២ ឈ្មោះចាប ម៉ាទី ភេទប្រុស អាយុ៧ ឆ្នាំ និងទី៣ មានឈ្មោះ ខាន់ យ៉ានីតាវលក្ល័ ភេទស្រី អាយុ១២ ឆ្នាំ ដោយអ្នកទាំង៣ រស់នៅភូមិចុងព្រែក សង្កាត់ស្វាយរៀង ក្រុងស្វាយរៀង ខេត្តស្វាយរៀង ។
ប្រភពបន្តថា ចំណែកក្មេងស្រីដែលរួចពីសេចក្ដីស្លាប់ មានឈ្មោះ ហួ សុគន្ធារី ភេទស្រី អាយុ៨ ឆ្នាំ រស់នៅ ភូមិចុងព្រែក សង្កាត់ស្វាយរៀង ក្រុងស្វាយរៀង ។
តាមអ្នក ភូមិបានឲ្យដឹងថា មុនកើតហេតុ គេឃើញមានក្មេង ប្រុស ស្រី ជាច្រើននាក់ បាននាំគ្នារត់លេងនៅរណ្តៅដី ដែលមានទឹកពេញហើយ ក៏នាំគ្នាចុះលេងទឹកស្រែក ហ៊ោកញ្ជៀវយ៉ាងសប្បាយ បន្ទាប់មកក្មេងស្រីម្នាក់ក្នុងចំណោម៣នាក់ បានស្រែកហៅអ្នក ភូមិជួយផង ប្អូនស្រីលង់ទឹក ទើបបង្កការភ្ញាក់ផ្អើលដល់អ្នក ភូមិអ្នកធ្វើដំណើរព្រមទាំងសមត្ថកិច្ចមូលដ្ឋាននាំគ្នាចុះរាវរហូតដល់ល្ងាច វេលាម៉ោង៦ ទើបរកឃើញទាំង៣នាក់ ។
បច្ចប្បន្នសាកសពក្មេង ប្រុស ស្រី ទាំង៣នាក់ ត្រូវបានសមត្ថកិច្ចធ្វើកំណត់ហេតុ និងបានប្រគល់ទៅឲ្យក្រុមគ្រួសារយកមកធ្វើបុណ្យទាំងក្ដីសោកសង្រេងបំផុត ៕ យឹម សុថាន
