សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ខារ៉ាអូខេដែលមានឈ្មោះល្បីប្រចាំក្រុងតាខ្មៅដែលភាគច្រើន បុរសៗដែលចូលផឹកស៊ី ច្រៀងរាំរែកសប្បាយអឺងកងនោះបានលាន់មាត់ថា សុទ្ធតែស្រីស្អាតដែលបម្រើការងារនៅទីនោះ បើបានចូលហើយគឺបំភ្លេចទុក ។ ដោយសារមានភាពល្បីរន្ទឺនេះ កើតឡើងធ្វើឲ្យមនុស្សជាច្រើនបានទៅផឹកស៊ី ច្រៀងរាំរែកសប្បាយអឺងកងរហូតដល់បាត់បង់ស្មារតី យកស្រាជាត្រីមុខ ឈានដល់ការបោកកែវ បាញ់បោះ យ៉ាងអាណាធិបតេយ្យកើតឡើងជារឿយៗធ្វើឲ្យប្រជាពលរដ្ឋរស់នៅជិតនោះមានការភិតភ័យ ។ តែអ្វីដែលគួរឲ្យភ្ញាក់ផ្អើលនោះនៅថ្ងៃទី០២ ខែមិថុនា ឆ្នាំ២០១៩ វេលាម៉ោង២០និង៣០នាទី មានបុរសម្នាក់ឈ្មោះសាន សុច ភេទប្រុស អាយុ៣៨ឆ្នាំ មុខរបរជាយោធា មានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល បានបាញ់បោះចំនួនបួនគ្រាប់ ដោយមូលហេតុមានជម្លោះជាមួយបុគ្គលិក និងខឹងស្រីមិនឲ្យថើប ។
ពាក់ពន្ធ័នឹងបញ្ហារខារ៉ាអូខេ ប៊ី ហ្គោល ដែលតែងតែបង្កអសន្តិសុខ ខាងលើនោះដែរលោក នូ សុវណ្ណរ៉ា អភិបាលក្រុងតាខ្មៅបានប្រាប់ឲ្យដឹងថា ចំពោះជនបង្កសមត្ថកិច្ចបានចាត់ការតាមផ្លូវច្បាប់ហើយ ។ រីឯម្ចាស់ទីតាំងខារ៉ាអូខេ បានកោះអញ្ជើញយកមកធ្វើកិច្ចសន្យាជាលើកចុងក្រោយ បើសិនជាមានបញ្ហារកើតឡើងទៀត លោកនិងរាយការណ៍ជូនលោកភិបាលខេត្តកណ្តាលសុំគោលការណ៍បិទទីតាំងនោះតែម្តង ។
សូមរំលឹកថា ៖នៅល្ងាចថ្ងៃទី០៣ ខែមិថុនា ឆ្នាំ២០១៩ ខ្មាន់កាំភ្លើងដែលបាញ់ក្នុងខារ៉ាអូខេ ប៊ី ហ្គោល ស្ថិតនៅចំណុចហាងខារ៉ាអូខេ B-Gold ភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល បង្កឲ្យមានការភ្ញាក់ផ្អើលទាំងយប់នៅក្រុងតាខ្មៅ បានត្រូវលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្តាល សម្រេចចោទប្រកាន់ពីបទ”ធ្វើឲ្យខូចខាតដោយចេតនា និងប្រើប្រាស់អាវុធដោយគ្មានការអនុញ្ញាត” តាមមាត្រា៤១០ នៃក្រមព្រហ្មទណ្ឌ និង មាត្រា២០ នៃច្បាប់គ្រប់គ្រងអាវុធជាតិផ្ទុះ ។ និងបញ្ជូនសំណុំរឿងទៅលោកគឹម រត្ន័ណារិន ចៅក្រមសើុបសួរសាលាដំបូងខេត្តកណ្តាលបានសម្រេចចេញដីការឃុំខ្លួនដាក់ពន្ធនាគារបណ្តោះអាសន្នហើយ ។
ជនជាប់ចោទមានឈ្មោះសាន សុច ភេទប្រុស អាយុ៣៨ឆ្នាំ មុខរបរ យោធា មានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល ។
ករណីផ្ទុះអាវុធជាច្រើនគ្រាប់បង្កឲ្យមានការភ្ញាក់ផ្អើលទាំងកណ្តាលយប់និងធ្វើឲ្យនារីៗដែលបម្រើការងារនៅក្នុងខារ៉ាអូខេ ប៊ី ហ្គោល នោះបានរត់បាតជើងសព្រាតដោយព្រលឹងចុងសក់ មិនតែប៉ុណ្ណោះធ្វើឲ្យអ្នកបើករថយន្តកុងតឺន័រភ័យលួសព្រលឹងដោយសារគ្រាប់កាំភ្លើងហោះផ្លោងទៅចំកញ្ចក់រថយន្តដែលកំពុងធ្វើដំណើរនៅមុខទីតាំងនោះ ។
ខ្មាន់កាំភ្លើងបន្ទាប់ពីធ្វើការបាញ់ហើយបានបន្សល់ទុកមានស្រោមកាំភ្លើងពណ៌ខ្មៅចំនួន០១ សោរ ម៉ូតូ១ចង្កោម(កូនសោរម៉ូតូ១កូនសោររថយន្ត១ តេឡេរថយន្ត១) គ្រាប់កាំភ្លើងខ្លី ម៉ាកឡុកចំនួន០៤ បាញ់ផ្ទុះ អស់៣គ្រាប់(លេខA-USA 9MM-LUGER) ។ បន្ទាប់មកជនសង្ស័យបានជិះម៉ូតូ១គ្រឿង ម៉ាកហុងដា C125 ពណ៌ខ្មៅ សេរី២០១៩ ចូលផឹកស៊ីច្រៀងខារ៉ាអូខេ នៅហាងB Gold បន្ទប់លេខ888 ជាមួយមិត្តភក្ត្រ ប្រុស០២នាក់ទៀត មិនស្គាល់ឈ្មោះ ។ រួចមកក៏បានឈ្លោះប្រកែកគ្នា ហើយគេឃើញជនសង្ស័យដើរចេញមកក្រៅហាងចាក់កែបម៉ូតូយកកាំភ្លើងខ្លីម៉ាកឡុកពណ៌ខ្មៅ យកដើរចូលទៅបាញ់ក្នុងហាងបាញ់ចំនួន០៤គ្រាប់ ហើយផ្ទុះ០៣គ្រាប់ ហើយស្រែកថា អញឈ្មោះ អាសុច អាណាខ្លាំងចេញមកអញ បាញ់ឲ្យងាប់!! រួចហើយជិះម៉ូតូតាមផ្លូវ១១៥ទៅទិសខាងលិចរួចបាញ់ឡើងលើ០១គ្រាប់ទៀត តែមិនបណ្តាលឲ្យមានអ្នករបួស ៕ ឆ ដា
