យកចបចាំងស្មៅដំឡូង ប៉ះចំគ្រាប់បែក ផ្ទុះស្លាប់​ នៅប៉ៃលិន

ខេត្តប៉ៃលិន៖ យុវជនម្នាក់បានរងរបួសធ្ងន់ និងបានស្លាប់នៅ នឹងកន្លែងដោយសារទៅចំការ យកចបចាំងស្មៅដំឡូង ប៉ះចំក្បាលគ្រាប់ B40 បណ្ដាលឲ្យផ្ទុះឡើងយ៉ាងកក្រើកតែម្ដង ។ ពាក់ព័ន្ធករណីនេះ សមត្ថកិច្ចជំនាញ​កំពុងបើកការស្រាវជ្រាវ ។

សេចក្តីរាយការណ៍ឲ្យដឹងថា ហេតុការណ៍នេះបានកើតឡើងកាលពីវេលាម៉ោង ១៥:២៥ នាទី ថ្ងៃទី ១៣ ខែមិថុនា ឆ្នាំ២០១៩ ស្ថិតនៅចំណុចមាត់ស្ទឹងភូមិថ្នល់បត់ ឃុំអូរអណ្ដូង ស្រុកសាលាក្រៅ ខេត្តប៉ៃលិន ។

សមត្ថកិច្ចប្រាប់ថា ជនរងគ្រោះ ឈ្មោះ វិន ភេទប្រុស អាយុ ២១ ឆ្នាំ រស់នៅភូមិស្ទឹងត្រង់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។

មុនពេលកើតហេតុ ជនរងគ្រោះទៅធ្វើស្មៅដំឡូង ហើយកាប់ត្រូវ គ្រាប់មិនទាន់ផ្ទុះ (សល់ពីសង្គ្រាម) ប្រភេទគ្រាប់ បេ សែសិប បណ្ដាលឲ្យផ្ទុះរងរបួសធ្ងន់ និងបានស្លាប់នៅនឹងកន្លែងកើតហេតុតែម្តង ។

ក្រោយពីកើតហេតុ សមត្ថកិច្ចនគរបាលប៉ុស្ថិ៍ឃុំស្ទឹងត្រង់ បានសហការជាមួយនគរបាលស្រុកសាលាក្រៅ ចុះពិនិត្យនៅកន្លែងកើតហេតុ ឃើញកម្ទេចគ្រាប់បេសែសិបនៅសល់ពីសង្គ្រាម បន្ទាប់ពីពិនិត្យរួច សាកសពជនរងគ្រោះត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕ ស សារ៉េត