សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់បុរស២នាក់ បានរងរបួសធ្ងន់បាក់ភ្លៅ និងស្រាលដោយសារករណីគ្រោះថ្នាក់ចរាចរណ៍ បង្កឡើងដោយរថយន្តស៊ីទេន ដឹកហ្គាសម៉ាក់ហ៊ីយ៉ាន់ដាយ ពណ៌ខៀវមួយគ្រឿងបើកមិនប្រកាន់ស្តាំបុកជាមួយម៉ូតូម៉ាកស៊ុយសូគីនីច ទិសដៅបញ្ច្រាសគ្នា ពេញទំហឹងកាលពីថ្ងៃអាទិត្យ ១៤កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៦ ខែមិថុនា ឆ្នាំ២០១៩វេលាម៉ោង១០:១៥នាទីយប់នៅលើផ្លូវជាតិលេខ១ចន្លោះគីឡូម៉ែត្តលេខ១៦០ និង១៦១ស្ថិតក្នុងភូមិតាពៅសង្កាត់បាវិតក្រុងបាវិតខេត្តស្វាយរៀង ។
យោងតាមសមត្ថកិច្ចនគរបាលក្រុងបាវិតបានឲ្យដឹងថា បុរសរងគ្រោះមានឈ្មោះ រស់ ផន អាយុ២៥ឆ្នាំ ជនជាតិខ្មែរ មុខកម្មកររោងចក្រ មានទីលំនៅភូមិថ្មី ឃុំថ្នាធ្នង់ ស្រុករំដូល ខេត្តស្វាយរៀង និងឈ្មោះសាន់ រីណា ភេទប្រុស អាយុ១៨ ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅភូមិត្រពាំងថ្ម ឃុំថ្នាធ្នង់ ស្រុករំដួល ខេត្តស្វាយរៀង ។
ចំណែកអ្នកបើករថយន្តបង្កហេតុមិនត្រូវបានស្គាល់ឈ្មោះនោះទេ ក្រោយពេលឃើញស្ថានភាពរត់គេចខ្លួនភ្លាមៗ បន្សល់តែរថយន្តស៊ីទេន ដឹកហ្គាសមួយគ្រឿងម៉ាក់ហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ ៣D-០១៥៥ នៅនឹងកន្លែងជាមួយជនរងគ្រោះ ។
បើតាមសាក្សីបានឲ្យដឹងថា មុនកើតហេតុ មានបុរស២នាក់ បានជិះម៉ូតូមួយគ្រឿងម៉ាក ស៊ុយសូគីនីច ពណ៌ទឹកក្រូច ពាក់ស្លាកលេខ ស្វាយរៀង ១N៧២៧៦ លើផ្លូវជាតិលេខ១ ក្នុងទិសដៅពីកើតមកលិច ខណៈនោះស្រាប់តែមានរថយន្តស៊ីទេនដឹកហ្គាសក្នុងទិសដៅបញ្ច្រាសគ្នា មិនប្រកាន់ស្ដាំ ក៏បុកយ៉ាងពេញទំហឹងបណ្ដាលឲ្យដួលមនុស្ស និងម៉ូតូបង្កការភ្ញាក់ផ្អើលដល់អ្នកភូមិ ធ្វើឲ្យអ្នកបើករថយន្តបង្កហេតុឃើញសភាពមិនស្រួល ក៏រត់គេចខ្លួន ។
ក្រោយមក អ្នករងរបួសធ្ងន់បាក់ភ្លៅខាងស្ដាំត្រូវបានសមត្ថកិច្ចបញ្ជូនទៅព្យាបាលនៅមន្ទីរពេទ្យបង្អែកខេត្តស្វាយរៀង និងអ្នករបួសស្រាលបញ្ជូនទៅព្យាបាលនៅពេទ្យពន្លឺបូព៌ាបាវិត ។
រីឯវត្ថុតាងទាំង២គ្រឿង ត្រូវបានសមត្ថកិច្ចនគរបាលវាស់វែង និងអូសយកមករក្សាទុកនៅអធិការដ្ឋាននគរបាលក្រុងបាវិត ដើម្បីចាត់ការទៅតាមច្បាប់ ៕ យឹម សុថាន
