សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោកតាកំសត់ម្នាក់ ហេតុតែមានជីវភាពក្រីក្រ ខ្វះខាតបានសម្រេចចិត្តដើររើសអេតចាយ ដើម្បីយកទៅលក់ គ្រាន់បានលុយបន្តិចបន្តួច ចិញ្ចឹមជីវិតចៃដន្យសំណាងអាក្រក់រអឹលជើងលង់ទឹកព្រែកត្រពាំងរុនស្លាប់ផ្អើលអ្នកភូមិ ។
ហេតុការណ៍នេះ បានកើតឡើងកាលពីវេលាម៉ោង៤ និង៣០នាទីរសៀល ថ្ងៃទី១៥ ខែមិថុនា ឆ្នាំ២០១៩ ស្ថិតនៅ ចំណុចភូមិត្រពាំងរ៉ុន ឃុំសង្កែ ស្រុករំដួល ចម្ងាយពីផ្ទះប្រមាណ១០០០ម៉ែត្រ ។
បើតាមសមត្ថកិច្ចនគរបាលស្រុកបានឲ្យដឹងថា លោកតា កំសត់រងគ្រោះខាងលើមានឈ្មោះ នី សឿង អាយុ៧០ឆ្នាំ រស់នៅ ភូមិ ឃុំ កើតហេតុខាងលើ ។
តាមអ្នកភូមិបានឲ្យដឹងថា មុនកើតហេតុ គេឃើញលោកតាបានដើរទៅខាងក្រោយផ្ទះ ដើម្បីរើសអេតចាយយកទៅលក់ដូចសព្វដងដោយម្នាក់ៗ មិនចាប់អារម្មណ៍នោះទេ ប្រមាណជាមួយម៉ោង ស្រាប់តែក្មេងៗផ្អើលរត់ប្រាប់អ្នកភូមិថា លោកតារអឹលជើងលង់ទឹកព្រែកបាត់ហើយ ទើបដឹងដល់ក្រុមគ្រួសារប្រញាប់ប្រញាល់ រត់ទៅជួយសង្គ្រោះ អកុសលហួសពេលទៅហើយ ។
បច្ចុប្បន្ន សពត្រូវបានសមត្ថកិច្ចប្រគល់ឲ្យក្រុមគ្រួសាយកទៅធ្វើបុណ្យតាមប្រពៃណីទាំងក្ដុកក្ដួលបំផុត ៕ យឹម សុថាន
