ឆ្លងចរន្តអគ្គិសនីឆេះផ្ទះ១ខ្នងក្លាយជាផេះ

ខេត្តកំពង់ធំ៖ អគ្គិភ័យឆាបឆេះផ្ទះមួយខ្នងកាលពី វេលាម៉ោង ០៨:៤០នាទី ថ្ងៃអង្គារ ០៨រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៥ ខែមិថុនា ឆ្នាំ២០១៩ ស្ថិតនៅភូមិអណ្តូងពោធិ៍ ឃុំអណ្តូងពោធិ៍ ស្រុកតាំងគោក ខេត្តកំពង់ធំ ។

សមត្ថកិច្ចបានឲ្យដឹងថា ម្ចាស់ផ្ទះឈ្មោះ ស៊ន ជុំ ភេទប្រុស អាយុ៦៨ឆ្នាំ ប្រពន្ធឈ្មោះ ឈឹម ខេង អាយុ៦៦ឆ្នាំ ផ្ទះទំហំ៦មx៨ម៉ែត្រ ធ្វើអំពីឈើ ដំបូលប្រក់ក្បឿង ជញ្ជាំងក្តារ ។ ខូចខាត ឆេះផ្ទះ០១ខ្នងទាំងស្រុង គោយន្តកន្រ្តៃ០១គ្រឿង ម៉ូតូc១០០ កូរ៉េ០១គ្រឿង គ្រែឈើ០២ ទូឈើ០១ ប្រាក់រៀលចំនួន១០០០០០០រៀល និងប្រាក់ដុល្លាចំនួន២០០ដុល្លារ និងសម្ភារប្រើប្រាស់មួយចំនួនទៀត ។

មូលហេតុ: ឆ្លងចរន្តអគ្គិសនី ។ មិនបង្កឲ្យមានរបួសដល់មនុស្សឡើយ ។

សមត្ថកិច្ចបានបញ្ចាក់ថា រថយន្តពន្លត់អគ្គិភ័យមិនបានចេញអន្តរាគមន៍នោះទេ មូលហេតុជាប់បេសកកម្មការពារ យន្តហោះ លោកបណ្ឌិត ងួន ញុិល ចុះសម្ពោធសាលារៀននៅវិទ្យាល័យ ហ៊ុន សែនក្រវ៉ា ។ តែក្នុងហេតុការណ៍នោះកម្លាំងចុះអន្តរាគមន៍ពន្លត់សរុបចំនួន២៦នាក់ ដឹកនាំដោយវរសេនីយ៍ទោ សន តាល់ រួមមានលោកមេឃុំ នាយប៉ុស្តិ៍អណ្តូងពោធិ៍ នាយប៉ុស្តិ៍ជ្រលង កងរាជអាវុធហត្ថ និងប្រជាពលរដ្ឋទើបរលត់ ៕ ប៊ុនរិទ្ធី