សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រុមអ្នកញៀនល្បែងឆ្លៀតឱកាសលួចណាត់ប្រជុំផ្តុំគ្នា ប្រជល់មាន់ចំនួន១០នាក់ ត្រូវបាននគរបាលខណ្ឌពោធិសែនជ័យ បញ្ជូននាំខ្លួនទៅតុលាកា នាព្រឹកថ្ងៃទី២៦ ខែមិថុនា ឆ្នាំ២០១៩ ដើម្បីបន្តនីតិវិធី ។
តាមនគរបាលបានឲ្យដឹងថា ក្រុមអ្នកញៀនល្បែងស៊ីសងខុសច្បាប់ ចំនួន១០នាក់ ក្រោយពីកម្លាំងនគរបាលខណ្ឌពោធិសែនជ័យ បង្ក្រាបចាប់ឃាត់ខ្លួនបានកន្លងមក ហើយនៅព្រឹកថ្ងៃទី២៦ ខែមិថុនា ឆ្នាំ២០១៩ ជនសង្ស័យចំនួន១០នាក់ ត្រូវបានបញ្ជូនទៅតុលាកាក្រុងភ្នំពេញ ដើម្បីចោទសួរដាក់បន្ទុក ឬយ៉ាងណា សម្រេចតុលាការ ។
តាមប្រជាពលរដ្ឋ បានលើកឡើងថា ក្រុមមនុស្សអ្នកញៀនល្បែងប្រជល់មាន់ បច្ចុប្បន្ន ច្រើនតែណាត់ផ្តុំគ្នា លួចជល់មាន់ភ្នាល់គ្នា តាមដីវាល ដីឡូត៍ទំនេរ តែទោះជាយ៉ាងណាក្តី ក្នុងអ្នកឆ្លៀតលួចលាក់លេងល្បែងស៊ីសងទាំងនោះ ត្រូវបាន សមត្ថកិច្ច តាមបណ្តាខណ្ឌក្នុងរាជធានី បង្ក្រាបចាប់ឃាត់ខ្លួនជាបន្តបន្ទាប់ ។
គួររំលឹកថា ក្រុមអ្នកញៀនល្បែងទាំងនេះ ត្រូវបាននគរបាលឆ្មក់បង្ក្រាបនៅរសៀលថ្ងៃទី២៣ ខែមិថុនា ឆ្នាំ២០១៩ នៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ៕ សុខាសែនជ័យ
