សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ផ្ដើមចេញពីការដណ្ដើមម៉ូយគ្នាឌុប បុរសជាអ្នករត់ម៉ូតូឌុបម្នាក់បានយកកាំបិតប៉័ងតោពីអ្នកលក់ដូងនៅក្បែរ មកកាប់ទៅលើបុរសម្នាក់ទៀតជាអ្នករត់ម៉ូតូឌុបដូចគ្នា បណ្ដាលឲ្យចំភ្លៅរងរបួសយ៉ាងដំណំ ។ ករណីខាងលើនេះ បានកើតឡើងនៅវេលាម៉ោង១៥និង៤០នាទី ថ្ងៃទី២៧ ខែមិថុនា ឆ្នាំ២០១៩ នៅចំណុចក្រោយវិទ្យាល័យហ៊ុនសែនតាខ្មៅ ស្ថិតក្នុងភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល ។
មន្ត្រីនគរបាលក្រុងតាខ្មៅបានឲ្យដឹងថា ជនរងគ្រោះឈ្មោះ បូ សំណាង ភេទប្រុស អាយុ៣២ឆ្នាំ មុខរបររត់ម៉ូតូឌុប ស្នាក់នៅផ្ទះជួលភូមិថ្មី១ សង្កាត់តាខ្មៅ ក្រុងតាខ្មៅខេត្តកណ្តាល រីឯជនសង្ស័យឈ្មោះ កុយ សំណាង ភេទប្រុស អាយុ៦១ឆ្នាំ មុខរបររត់ម៉ូតូឌុប ស្នាក់នៅផ្ទះជួលភូមិកំពុងសំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
ប្រភពដដែលបន្តថា មុនពេលកើតហេតុជនរងគ្រោះ និងជនសង្ស័យ បានអង្គុយលើម៉ូតូរង់ចាំដឹកម៉ូយនៅកន្លែងកើតហេតុដូចសព្វមួយដង ។ លុះដលវេលាកើតហេតុខាងកើតហេតុខាងលើជនរងគ្រោះបានឃើញនារីម្នាក់ដែលជាម៉ូយរបស់ជនសង្ស័យ ក៏ទៅហៅនារីរងគ្រោះឲ្យមកជិះម៉ូតូរបស់ខ្លួន ខណៈនោះជនសង្ស័យឃើញ ក៏មានចិត្តខឹង បានទាស់ពាក្យសម្តីគ្នា ភ្លាមនោះជនសង្ស័យ បានស្ទុះទៅវាយប្រតាយប្រតប់គ្នាជាមួយជនរងគ្រោះ ហើយស្ទុះ ទៅទាញកាំបិតប៉័ងតោអ្នកលក់ដូងនៅក្បែរនោះកាប់ទៅលើភ្លៅខាងស្តាំជនរងគ្រោះ បណ្តាលរងរបួសរយះហូរឈាមយ៉ាងដំណំ ។
ក្រោយពីមានហេតុការណ៍កើតឡើង ជនរងគ្រោះ ត្រូវបានបងប្អូនដឹកយកទៅព្យាបាលរបួសនៅឯមន្ទីរពេទ្យ រីឯជនសង្ស័យត្រូវបានសមត្ថកិច្ចឃាត់ខ្លួនបញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីសាកសួរនិងកសាងសំណុំរឿងតាមនីតិវិធី ៕ ស្អាងជ័យ
