កក្រើកថ្ងៃគម្រប់ខួបប្រាំបីឆ្នាំ របស់រោងភាពយន្តលេជេន

ភ្នំពេញ៖ ពិតជាធ្វើឲ្យអ្នកគាំទ្រមានការភ្ញាក់ផ្អើល ក្នុងថ្ងៃពិសេសគម្រប់៨ឆ្នាំ របស់រោងភាពយន្តលេជេន កាលពីរាត្រីថ្ងៃទី០៧ ខែកក្កដា ឆ្នាំ២០១៩ ។ កម្មវិធីនេះ ត្រូវបានធ្វើឡើងនៅរោងភាពយន្តលេជេនសាខាអេដិន ក្រោមវត្តមានអ្នកគាំទ្រ សិល្បករជាច្រើនចូលរួម ។

កម្មវិធីនេះមានឈ្មោះថា Super fans Night ដែលត្រូវបានរៀបចំជូនចំពោះអតិថិជនពិសេសរបស់រោងភាពយន្តលេជេន និងដៃគូសហការសំខាន់ៗរបស់រោងភាពយន្តលេជេន ដែលក្នុងនោះមានការចូលរួមពីតារាចម្រៀងល្បីៗក្នុងស្រទាប់យុវជន ដូចជា កញ្ញា ចិត កញ្ចនា និងលោកអូន ផងដែរ ។ ក្នុងនោះក៏មានការចាក់បញ្ចាំងរឿង Spider Man: Far From Home ដោយឥតគិតថ្លៃជូនចំពោះអតិថិជនពិសេសរបស់រោងភាពយន្តលេជេន និងដៃគូសហការសំខាន់ៗរបស់រោងភាពយន្តលេជេនផងដែរ ។

កម្មវិធីនេះដែរក៏មានដៃគូសហការដែលបានចូលរួមក្នុងកម្មវិធីដូចជា ហាងនំ AuntieAnn, Big Apple, ក្រុមហ៊ុនភេសជ្ជៈកូកាកូឡា, និងក្រុមហ៊ុនប្រព័ន្ធទូរស័ព្ទស្មាត ។ ដើម្បីអបអរសាទរក្នុងកម្មវិធីគម្រប់ខួបប្រាំបីឆ្នាំ របស់រោងភាពយន្តលេជេន និងជាការថ្លែងអំណរគុណដល់អតិថិជន របស់លេជេនផងដែរនេះ រោងភាពយន្តលេជេនបានផ្តល់រង្វាន់ជាច្រើនសម្រាប់ អតិថិជនទាំងអស់គ្នា ជាមួយនឹងរង្វាន់ដ៏ពិសេសជាច្រើនដូចជា រង្វាន់ IPHONE XS កម្មវិធីទិញមួយ ថែមមួយ សម្រាប់អតិថិជន ដែលប្រើប្រាស់កាតសមាជិករបស់រោងភាពយន្តលេជេន និងរង្វាន់ដ៏ច្រើនសន្ធឹកសន្ធាប់សម្រាប់អ្នកចូលរួមផ្ទាល់ផងដែរ ។

ក្នុងឱកាសខួប ៨ ឆ្នាំរបស់ រោងភាពយន្ត Legend ក្នុងឆ្នាំនេះគឺមានការរៀបចំឡើងខុសប្លែកពីឆ្នាំមុនៗ ។ នេះបើតាមសម្តីលោក ព្រំ បញ្ញាវ័ន្ត ដែលជាប្រធានផ្នែកទីផ្សារនៅរោងភាពយន្ត Legend បានលើកឡើង ។ លោកនិយាយថា ដើម្បីអរគុណដល់អតិថិជនរបស់ Legend ទាំងអស់ យើងបានរៀបចំពិធីជួបជុំនេះឡើង ដើម្បីចូលរួមសប្បាយទាំងអស់គ្នា ព្រមទាំងទទួលបានកាដូអនុស្សាវរីយ៍ជាច្រើន ។ លោក បានបន្ថែមទៀត រោងភាពយន្ត Legend និងមានរៀបចំកម្មវិធីដែលមានលក្ខណៈធំដុំបែបនេះនៅក្នុងឆ្នាំក្រោយៗទៀត ៕ វឌ្ឍនា