សារព័ត៌មាន នគរវត្ត តែងតែនាំមុខគេជានិច្ច
បើទោះបីជាគណៈកម្មការជាតិបង្ក្រាបបទល្មើសព្រៃឈើធ្វើសកម្មភាពផ្អើលប្រជាពលរដ្ឋ ទូទាំងប្រទេសយ៉ាងណាក៏ដោយ ក៏ចែភក្តិ ឈ្មួញរកស៊ីឈើល្បីឈ្មោះនៅស្រុកភ្នំក្រវាញ មិនខ្វល់នោះដែរ គឺនៅតែឈរជើងយ៉ាងរឹងមាំ ចាំទិញឈើនៅក្នុងស្រុកភ្នំក្រវាញ ខេត្តពោធិ៍សាត់ដដែល ។ នៅគ្រាដែលគណៈកម្មការជាតិបង្ក្រាបឧកញ៉ារកស៊ីឈើនៅខេត្តមណ្ឌលគិរីនោះ ពួកអ្នករកស៊ីឈើនៅឯខេត្តពោធិ៍សាត់ឯណោះ ក៏ផ្អាកសកម្មភាពរួញខ្លួនខ្លះៗដែរ លើកលែងតែចែភក្តិ និងដៃគូ ឈ្មោះ ណាក់ ប៉ុណ្ណោះ ដែលរហូតមកដល់ម្សិលមិញ មានសេចក្តីរាយការណ៍ថា គាត់នៅតែបន្តឈរជើងយ៉ាងរឹងមាំ ក្នុងការទិញឈើពីអ្នកដឹកឈើតាមម៉ូតូ និងរថយន្តកែច្នៃ ។
បើទោះបីជាមានការបង្ក្រាបទ្រង់ទ្រាយធំ ដែលធ្វើឲ្យពួកឈ្មួញរកស៊ីឈើទាំងតូច ទាំងធំរួញខ្លួនបែបណាក៏ដោយ ក៏ចែភក្តិនៅតែបន្តធ្វើសកម្មភាពឈរទិញឈើមិនញញើតនោះទេ ។ ឈ្មួញអ្នករកស៊ីឈើមានចម្ងល់ថា តើចែភក្តិ អាងខ្នងនរណាបានជាមិនញញើតសមត្ថកិច្ចឬគណៈកម្មការបង្ក្រាបបទល្មើសព្រៃឈើយ៉ាងដូច្នោះ? បើតាមសេចក្តីរាយការណ៍បានឲ្យដឹងថា សកម្មភាពដឹកជញ្ជូនឈើចេញពីតំបន់ព្រៃការពារភ្នំឱរ៉ាល់ ខេត្តពោធិ៍សាត់ ដែលមានមន្ត្រីបរិស្ថានឈ្មោះ ជួប ភាព ជាអ្នកសម្របសម្រួលនោះ នៅតែមានសកម្មភាពដដែល ។ ម៉ូតូប្រជាពលរដ្ឋដឹកឈើនៅតែបន្តកន្ទុយគ្នាយកឈើមកទម្លាក់ឲ្យចែភក្តិ និងលោក ណាក់ នៅម្តុំចម្ការតាលី ស្ថិតក្នុងភូមិវាល ឃុំសំរោង ស្រុកភ្នំក្រវាញនោះជារៀងរាល់ពេល ។ លោកណាក់ ជាអ្នកដែលកាន់លុយ ចាំទិញឈើទាំងនោះជាចំហរ ។
ការដែលចែភក្តិ នៅតែហ៊ានប្រកបរបររកស៊ីខុសច្បាប់ គ្រាដែលឧកញ៉ាធំៗមួយចំនួនរួញខ្លួនទៅហើយនោះ ធ្វើឲ្យអ្នករកស៊ីតូចតាចនៅក្នុងតំបន់នោះច្រណែន ព្រោះមិនដឹកស្មានថា ហេតុអ្វីបានជាចែភក្តិ នៅតែមានអំណាច រកស៊ីដឹកឈើឈរទិញឈើយ៉ាងចំហរដូច្នេះ? នៅក្នុងព្រៃនៃតំបន់ការពារភ្នំឱរ៉ាល់ មានមន្ត្រីបរិស្ថានជាអ្នកជួយសម្រួលហើយចេញមកដល់តាមផ្លូវ គ្រាន់តែបង់ប្រាក់ឲ្យមន្ត្រីមេព្រៃ គឺជាការស្រេច? ពួកមន្ត្រីមេព្រៃនៃមន្ទីរកសិកម្មខេត្តពោធិ៍សាត់យកលុយពីចែភក្តិ ដោយស្របច្បាប់ ពីព្រោះឈើទាំងនោះមិនមែនចេញពីដែនសមត្ថកិច្ចរដ្ឋបាលព្រៃឈើនោះឡើយ ៕
