សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសម្នាក់ស្លាប់ក្នុងថ្លុកឈាមយ៉ាងអណោចអធ័ម និងនារីម្នាក់ទទួលរងរបួសធ្ងន់ ខណៈបើកបរម៉ូតូឌុបគ្នា មានរថយន្ដមួយគ្រឿងបើកបត់ឆ្លងផ្លូវ ធ្វើឲ្យម៉ូតូជនរងគ្រោះឈប់មិនទាន់បានបុកពេញមួយទំហឹង នៅវេលាម៉ោង១៩ និង៥០នាទី ថ្ងៃទី១៤ ខែកក្កដា ឆ្នាំ២០១៩ លើផ្លូវជាតិលេខ៦ ចន្លោះគីឡូមែតលេខ១៩_២០ ស្ថិតក្នុងភូមិព្រែកតាបែន ឃុំព្រែកអញ្ចាញ ស្រុកមុខកំពូល ខេត្តកណ្តាល ។
មន្រ្ដីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះស្លាប់ឈ្មោះ បៀន វូត ភេទប្រុស អាយុ២២ឆ្នាំ មានទីលំនៅភូមិជ័យមង្គល ឃុំជ្រាប់ ស្រុកសន្ទុក ខេត្តកំពង់ធំ បើកបរម៉ូតូម៉ាកហុងដា វ៉េវ ពណ៌ខ្មៅ ពាក់ស្លាកលេខ កណ្ដាល 1S-1139 មានអ្នករួមដំណើរម្នាក់ ឈ្មោះ ស្រន ស្រីល័ក ភេទស្រី អាយុ១៧ឆ្នាំ មានទីលំនៅភូមិបឹងបញ្ចូលឃុំព្រៃកក់ស្រុកស្ទឹងត្រង់ខេត្តកំពង់ចាម (រងរបួសធ្ងន់) ។ ចំណែកភាគីរថយន្ដម៉ាក HILGHLANDER ពណ៌ស្ក ពាក់ស្លាកលេខ ភ្នំពេញ2AC-2027 (អ្នកបើកបររត់គេចបាត់) ។
ប្រភពដដែលប្ដថា នៅមុនពេលកើតហេតុ សាក្សីបានឃើញរថយន្ដម៉ាក HILGHLANDERខាងលើ ធ្វើដំណើរតាមបណ្ដោយផ្លូវជាតិលេខ៦ ក្នុងទិសដៅពីជើងទៅត្បូង លុះបើកមកដល់ចំណុចកើតហេតុ ក៏បត់ឆ្វេងឆ្លងផ្លូវ ខណៈនោះស្រាប់តែមានម៉ូតូមួយគ្រឿងបើកបរដោយល្បឿនលឿន ធ្វើដំណើរពីត្បូងទៅជើង ក៏ឈប់មិនទាន់បានបុករថយន្ដពេញមួយទំហឹង បណ្ដាលឲ្យបុរសម្នាក់ជាអ្នកបើកបរម៉ូតូស្លាប់ និងនារីម្នាក់ជាអ្នករួមដំណើររងរបួសធ្ងន់ ។
ក្រោយពីមានហេតុការណ៍កើតឡើង នារីរងគ្រោះរងរបួសធ្ងន់ ត្រូវបានរថយន្ដសាមុយដឹកបញ្ជូនទៅសង្រ្គោះនៅមន្ទីរពេទ្យរាជធានីភ្នំពេញ ។ ចំណែករថយន្ដ និងម៉ូតូ ត្រូវបានសមត្ថកិច្ចនគរបាលជំនាញចរាចរណ៍ស្រុក ចុះធ្វើការពិនិត្យ វាស់វែង រួចកសាងសំណុំរឿង យកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ។ ដោយឡែកសាកសព ត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ។
តាមការសន្និដ្ឋានរបស់សមត្ថកិច្ច បានឲ្យដឹងថា ករណីនេះ គឺបណ្ដាលមកពីរថយន្តបត់ឆ្វេង ឆ្លងផ្លូវ ខ្វះការប្រុងប្រយ័ត្ន រីឯម៉ូតូបើកបរល្បឿនលឿន ៕ ស្អាងជ័យ
