សារព័ត៌មាន នគរវត្ត តែងតែនាំមុខគេជានិច្ច
ដោយសំអាងលើហេតុផលថា កម្លាំងតិច មិនអាចបង្ក្រាបបទល្មើសបាន ក្រុមមន្ត្រីជលផលនៅខេត្តពោធិ៍សាត់ បណ្តោយឲ្យមានបទល្មើសនេសាទយ៉ាងគគ្រឹកគគ្រេងនៅរដូវបិទនេសាទ ។ ប្រជាពលរដ្ឋរស់នៅឃុំអូរម្រះ ស្រុកសៀមបូក អះអាងថា អ្នកនេសាទអាចធ្វើសកម្មភាពជាចំហរដោយមិនមានមន្ត្រីជលផលចុះមកទប់ស្កាត់ ឬហាមឃាត់អ្វីនោះទេ ។ ត្រីប្រភេទកម្រជាច្រើនត្រូវបានអ្នកនេសាទល្មើសច្បាប់ចាប់បាន និងយកទៅដាក់លក់នៅលើទីផ្សារដោយសេរី ។ ពួកមន្ត្រីជលផលត្រូវបានអ្នកភូមិអះអាងថា ក្រៅតែពីអះអាងថា កម្លាំងតិច ក៏បានឃុបឃិតឲ្យមានបទល្មើសនេះដែរ ព្រោះតែដើម្បីផលប្រយោជន៍ ។
ប្រភពរាយការណ៍ថា លោក ទុំ នីរ៉ូ នាយខណ្ឌរដ្ឋបាលជលផលស្ទឹងត្រែងមិនដែលធ្វើសកម្មភាពអ្វីជាដុំកំភួន ពាក់ព័ន្ធនឹងការបង្ក្រាបបទល្មើសនេសាទនោះឡើយ ។ មានន័យថា ចងអ្នកណាធ្វើអីធ្វើទៅ លោកមិនដែលខ្វល់ ពោលគឺនៅតែក្នុងការិយាល័យយ៉ាងស្ងាត់ស្ងៀម ។ នៅពេលដែលមានការសួរនាំថា ហេតុអ្វីបានជាមិនបង្ក្រាប លោកបានត្រឹមតែឆ្លើយថា កម្លាំងតិច មិនអាចធ្វើសកម្មភាពបានគ្រប់ទីកន្លែង ។ ប៉ុន្តែបើតាមប្រភពអះអាងថា វាជាបញ្ហាផលប្រយោជន៍ ដែលពួកមន្ត្រីជលផល មិនបង្ក្រាប ដោយសំអាងលើកម្លាំងតិចនោះ ។ អ្នកភូមិនៅតំបន់នោះអះអាងថា បើមិនបង្ក្រាបឲ្យទាន់វេលាទេ ធនធានមច្ឆជាតិនៅតំបន់ភាគខាងលើនឹងត្រូវដាច់ផុតពូជជាមិនខានឡើយ ។
បើតាមសេចក្តីរាយការណ៍បានឲ្យដឹងថា ទន្លេទាំងបួនក្នុងខេត្តស្ទឹងត្រែងកំពុងទទួលរងនូវការគំរាមកំហែង នៃដំណើរឆ្ពោះទៅរកការរលាយផុតពូជមច្ឆជាតិ ព្រោះតែការព្រងើយកន្តើយរបស់មន្ត្រីជលផល ។ នាយខណ្ឌរដ្ឋបាលជលផលស្ទឹងត្រែងជាអ្នកទទួលខុសត្រូវមុនគេ ។ គេនិយាយថា មិនបាច់ចាំទៅមើលបទល្មើសនៅក្នុងទន្លេនោះទេ ពោលគឺមើលតែក្នុងទីផ្សារខេត្តស្ទឹងត្រែងថា តើពូជត្រីអ្វីខ្លះដែលត្រូវគេចាប់យកមកលក់ជាចំហរ ។ ប្រការនេះថ្នាក់ដឹកនាំអគ្គនាយកដ្ឋានរដ្ឋបាលជលផល ក៏ដូចជាក្រសួងកសិកម្មគួរពិនិត្យមើលបញ្ហាបទល្មើសនេសាទនៅខេត្តស្ទឹងត្រែងនោះផង ពីព្រោះថា បើរង់ចាំចំណាត់ការលោកទុំ នីរ៉ូ ដូចពឹងផ្កាយលើមេឃឯណោះ ៕
