សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សូមបងប្អូនប្រជាពលដ្ឋមានការប្រុងប្រយ័ត្នអោយបានខ្ពស់ ចំពោះការសម្រេចចិត្តដាក់ហ៊ុន ,ចងការប្រាក់ ,ខ្ចីលុយដោយអត្រាការខ្ពស់,ជាដើម ខណៈមនុស្សមួយចំនួនមានល្បិចកល រៀបចំគំនិតទុច្ចរិតបោកប្រាស់ប្រកបដោយមនោគមន៍វិជ្ជាខ្ពស់ នឹងធ្វើអោយបងប្អូនងាយរងគ្រោះ ដោយសារទុកចិត្ត លោភលន់ និងទ័លច្រករឿងលុយនោះជាដើម។
ជនឆបោកលុយប្រជាពលរដ្ឋជិត៣០០លានដុល្លារ ឈ្មោះ ឌឹម សួនណាត នាយកក្រុមហ៊ុន អុីណាវីតា ឌីវេឡុបមុិន ឯ.ក(ENARITA DÉVELOPPEMENT Co.Ltd ត្រូវបានកម្លាំងនគរបាលព្រហ្មទណ្ឌក្រសួងមហាផ្ទៃសហការបង្ក្រាប តាមពាក្យបណ្តឹងជនរងគ្រោះ ។
ក្រោយសមត្ថកិច្ចបង្ក្រាបមេក្លោងបោកលុយខ្ទង់រយលានដុល្លារ ពីប្រជាពលរដ្ឋលើគម្រោងសាងសង់វិស័យអចលនទ្រព្យ ធ្វើកំណត់ហេតុស្តាប់ចម្លើយ នឹងត្រូវបញ្ជូនទៅតុលាការសៀមរាបនៅថ្ងៃនេះផងដែរ (២០កក្កដា ២០១៩)។
សមត្ថកិច្ចបានអោយដឹងថា៖ មេក្លោងដ៏ធំម្នាក់ នៃអំពើឆបោកប្រាក់ក្នុងរូបភាពចូលហ៊ុនរកស៊ី ដែលធ្វើឲ្យម្នាក់ៗអស់លុយរាប់ពាន់ រាប់ម៉ឺនដុល្លារ ហើយសរុបជាទឹកប្រាក់ដែលចាញ់បោកនោះ គឺខ្ទង់រយលានដុល្លារ ត្រូវបានបញ្ចប់ការសួរនាំ នៅអគ្គស្នងការដ្ឋាននគរបាលជាតិ ហើយបានបញ្ជូនទាំងជនសង្ស័យ និងសំណុំរឿងទៅកាន់តុលាការខេត្តសៀមរាប នៅថ្ងៃទី២០ ខែកក្កដា ឆ្នាំ២០១៩នេះ ដោយសាររឿងហេតុដំបូងបានកើតឡើងនៅទឹកដីខេត្តសៀមរាប ត្រូវបញ្ជូនទៅអយ្យការអមសាលាដំបូងខេត្តចាត់ការបន្តតាមនីតិវិធី។
សមត្ថកិច្ចបញ្ជាក់ថា៖ ជនឆបោកដ៏ធំមួយនេះឈ្មោះ ឌឹម សួនណាត ជានាយកក្រុមហ៊ុន អុីណាវីតា ឌីវេឡុបមុិន ឯ.ក(ENARITA DÉVELOPPEMENT Co.Ltd អាយុ៣៦ឆ្នាំ រស់នៅផ្ទះលេខ៣៤ ផ្លូវលេខ១០០៧ ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ជនសង្ស័យរូបនេះត្រូវបានកម្លាំងនគរបាលនាយកដ្ឋានព្រហ្មទណ្ឌ ក្រសួងមហាផ្ទៃ ចាប់ខ្លួនកាលពីប៉ុន្មានថ្ងៃមុន ដោយមានបញ្ជាពីព្រះរាជអាជ្ញា និងមានបណ្ដឹងរបស់ជនរងគ្រោះជាច្រើននាក់ ដែលបានអស់លុយអស់កាក់រាប់ពាន់ រាប់ម៉ឺនដុល្លារ ទៅលើជនមួយនេះព្រមទាំងបក្ខពួករបស់ខ្លួន។
សមត្ថកិច្ចបានបញ្ជាក់ថា៖ ក្រោយចាប់ខ្លួន និងធ្វើការសួរចម្លើយមួយរយៈពេលមក ជនសង្ស័យរូបនេះត្រូវបានបញ្ជូនទៅកាន់នាយកដ្ឋានកណ្ដាលនគរបាលសន្ដិសុខ ដើម្បីបន្ដការសួរនាំ និងធ្វើការស្រាវជ្រាវ នៃទំហំរឿងទាំងមូលដើម្បីទប់ស្កាត់ កុំឲ្យមានបញ្ហាមួយនេះកើតឡើងបន្ដទៀត មកលើពលរដ្ឋខ្មែរ។
នៅព្រឹកថ្ងៃទី២០ ខែកក្កដា ឆ្នាំ២០១៩នេះ មន្ដ្រីនគរបាលជាន់ខ្ពស់ នៃអគ្គស្នងការដ្ឋាននគរបាលជាតិ បានថ្លែងប្រាប់បណ្ដាញសារព័ត៌មាន ឲ្យដឹងថា៖ ជនសង្ស័យ ឌឹម សួនណាត ត្រូវបានបញ្ជូនទៅកាន់តុលាការខេត្តសៀមរាប ដើម្បីធ្វើការសួរនាំ និងចាត់ការតាមនីតិវិធីច្បាប់ ព្រោះរឿងដែលបានកើតឡើងដំបូង នៅលើទឹកដីខេត្តសៀមរាប។
ពាក់ព័ន្ធបទល្មើសឆបោកដ៏ធំមួយនេះ រហូតមកដល់ពេលនេះ ពុំទាន់មានការបញ្ជាក់ពីសមត្ថកិច្ចពាក់ព័ន្ធ ថាតើជនរងគ្រោះពិតប្រាកដមានប៉ុន្មាននាក់ និងលុយដែលត្រូវចាញ់បោកនោះ មានចំនួនប៉ុន្មានឲ្យពិតប្រាកដផងដែរ? គ្រាន់តែដឹងថា មានមនុស្សជាច្រើននាក់ដែលជាជនរងគ្រោះ ទាំងនៅរាជធានីភ្នំពេញ និងតាមបណ្ដាខេត្ត ហើយចំនួនទឹកប្រាក់គឺខ្ទង់រយលានដុល្លារឯណោះ។
ពាក់ព័ន្ធករណីនេះ សមត្ថកិច្ចក៏បានអំពាវឲ្យជនរងគ្រោះទាំងឡាយ ដែលធ្លាប់បានបាញ់បោកបុគ្គល និងបក្ខពួក ប៉ុន្ដែពលរដ្ឋខ្លះមិនទាន់ហ៊ានចេញមុខដាក់ពាក្យបណ្ដឹងជាផ្លូវការនោះឡើយ ដោយសារមានការអៀនខ្មាស់ និងខ្លាចគេដឹងលឺ សូមអញ្ជើញមកប្តឹង។
តាមការបញ្ជាក់របស់សមត្ថកិច្ចជាន់ខ្ពស់ក្រសួងមហាផ្ទៃ រូបភាពនៃអំពើឆបោកនេះ គឺជនសង្ស័យបានដើរតួនាទីជាម្ចាស់គម្រោងអភិវឌ្ឍន៍ ទៅលើវិស័យអចលនទ្រព្យ រួមមាន ពុះដីឡូតិ៍ ផ្ទះល្វែង និងវីឡាជាដើម។ តាមរយៈរូបភាពឆបោកនេះ ជនសង្ស័យបានធ្វើកិច្ចសន្យាវិនិយោគ ជាមួយជនរងគ្រោះឲ្យដាក់លុយវិនិយោគ ដោយទទួលបានភាគរយខ្ពស់ប្រចាំខែ ដែលគេហៅថាភាគលាភ ឬប្រាក់ចំណេញ ប៉ុន្ដែជនរងគ្រោះបានទទួលប្រាក់ចំណេញនេះ តែខែដំបូង ឬពីរខែដំបូង ឬបីខែដំបូងតែប៉ុណ្ណោះ ប៉ុន្ដែខែបន្ដបន្ទាប់ទៀតនឹងមិនទទួលបាននោះឡើយ។
ឧទាហរណ៍ជាក់ស្ដែង ជនរងគ្រោះម្នាក់ដាក់ប្រាក់វិនិយោគចំនួន ១០ម៉ឺនដុល្លារ ហើយខែដំបូងនឹងទទួលបាន២៥ភាគរយ ស្មើនឹង២៥,០០០ដុល្លារ ប៉ុន្ដែបានតែមួយខែ ឬពីរខែដំបូង នឹងលែងទទួលបានទៀតហើយ នោះមានន័យថា លុយដែលត្រូវបាត់បង់សឹងតែពាក់កណ្ដាល នៃទឹកប្រាក់ដែលបានដាក់វិនិយោគ។
ជនល្មើសបានប្រើរូបភាពនេះ ដោយពង្រាយបក្ខពួករបស់ខ្លួនចុះទៅតាមបណ្ដាខេត្ត ដោយដើរតួជាម្ចាស់គម្រោងអភិវឌ្ឍន៍លើវិស័យអចលនទ្រព្យ ហើយបើជនរងគ្រោះណាមានលុយតិចតួច គឺដាក់ចូលហ៊ុនតាមលទ្ធភាពជាក់ស្ដែង។ អំពើឆបោកនេះក៏បានកើតឡើងនៅលើទឹកដីស្រុកមេមត់ ខេត្តត្បូងឃ្មុំ និងមានប្រជាពលរដ្ឋ ហើយនិងអាជីវករនៅក្នុងផ្សារជាច្រើននាក់ក៏បាញ់ចោកផងដែរ។
ស្នងការនគរបាលខេត្តត្បូងឃ្មុំ លោកឧត្តមសេនីយ៍ទោ បែន រ័ត្ន បានថ្លែងបញ្ជាក់ថា លោកបានបញ្ជាឲ្យនគរបាលមូលដ្ឋាន និងសមត្ថកិច្ចចុះស្រង់ឈ្មោះ ជនរងគ្រោះដែលបាញ់បោក ប៉ុន្ដែមិនទាន់ទទួលបានទាំងអស់នៅឡើយទេ ដោយមានជនរងគ្រោះខ្លះ នៅតែបន្ដលាក់បាំង និងមិនហ៊ានមកដាក់ពាក្យបណ្ដឹង។
ដោយឡែកមន្ដ្រីជាន់ខ្ពស់ក្រសួងមហាផ្ទៃម្នាក់ទៀត ក៏បានលួចបង្ហើបថា ជនសង្ស័យរូបនេះក៏មានអ្នកនៅពីក្រោយខ្នងជាមន្ដ្រីជាន់ខ្ពស់ នៅក្រសួងស្ថាប័នរដ្ឋ និងកងកម្លាំងប្រដាប់អាវុធទៀតផង។
ដោយឡែកមានករណីស្រដៀងគ្នាបែបនេះផងដែរ មានក្រុមហ៊ុនចិនសហការគ្នាជាមួយខ្មែរ បញ្ចេញលុយអោយខ្ចីដោយមិនចាំបាច់ធ្វើបែបបទ ឯកសារតាមផ្លូវច្បាប់ គឺគេទទួលបញ្ចាំជា អត្តសញ្ញាណបណ្ណ សៀវភៅគ្រួសារ អោយអ្នកណាដែលមានផ្ទះ មានឡាន មានទីតាំងលក់ដូរ ហើយប្រញាប់កុនលុយយកទៅដោះស្រាយបញ្ហាជាបន្ទាន់ណាមួយ គឺយកតែការប្រាក់បង់១ថ្ងៃ១៩០ដុល្លារ បើខ្ចី៦០០០ដុល្លារ។
អ្នកខ្លះទ័លច្រកខ្វះលុយដោះការងារបន្ទាន់ ក៏បង្ខំចិត្តខ្ចី១អាទិត្យ ឬ១០ថ្ងៃដើម្បីរកលុយបង្វិលអោយគេវិញ ដោយ១ថ្ងៃបង់ការប្រាក់១៩០ដុល្លារ បើខ្ចី៦០០០ដុល្លារ។ ករណីនេះយឺតយូរបង់១ថ្ងៃ ឬម្ចាស់ផ្ទះមិននៅផ្ទះ មិននៅកន្លែងហាង គឺក្រុមចិន និងខ្មែររកសុីចងការលុយនេះ បានមកអុកឡុកដល់ហាង ដល់ផ្ទះ មកដេក មកវាយរបស់របបបំផ្លាញ រំលោភកាន់កាប់ទីលំនៅ ដោយហឹង្សា សហាវបំផុត។ ផ្ទុយទៅវិញជនរងគ្រោះទៅប្តឹងសមត្ថកិច្ចមូលដ្ឋានក្នុងបទល្មើសជាក់ស្តែង គាត់ជាសមត្ថកិច្ចបានប្រាប់មកជនរងគ្រោះយ៉ាងខ្លីថា៖ រឿងបែបនេះកើតមានច្រើនណាស់ ហើយពួកគេសុទ្ធតែមានអ្នកធំនៅពីក្រោយ ដូច្នេះសមត្ថកិច្ចមិនហ៊ានប៉ះពាល់ពួកចិនអស់និងបានទេ។
បញ្ហានេះបានកើតមាននៅខណ្ឌដង្កោយ៉ាងរាលដាលទៅហើយ សូមថ្នាក់លើជួយប្រជាពលរដ្ឋផង ការពារគាត់ផងក្នុងរង្វង់ច្បាប់ ខណៈជនរកសុីខិលខូចធ្វើអ្វីមកលើប្រជាពលរដ្ឋតាមអំពើចិត្តនោះ ពិសេសពួកគេប្រើម៉ូតូធំៗមកដើរទារការប្រាក់ ឬមកគម្រាមជនរងគ្រោះ ដោយប្រើស្លាកឡូកូ (អ-ហ) បិទលើម៉ូតូ តែពួកគេស្លៀកពាក់សុីវិលមានប្រុស-មានស្រីជាក្រុមៗ៕
ដោយ៖ សុខ ខេមរា
