ព័ត៌មានទាន់ហេតុការណ៍៖

ចាប់បុរសជនជាតិចិន ដែលជាឃាតក សម្លាប់ និងដុតសង្សារ ខ្លួនឯងចោល នៅក្បែរស្ពានព្រែកព្នៅ, មូលហេតុ ជនដៃដល់ខឹងនារីរងគ្រោះមិនព្រមយកកូនចេញ

ចែករំលែក៖

ភ្នំពេញ៖ ដឹងពីមូលហេតុច្បាស់ហើយ ករណីឃាតកម្ម រួចដុតសាកសពជនរងគ្រោះទាំងមានផ្ទៃពោះចោល នៅក្បែរស្ពានព្រែកព្នៅ ខណ្ឌជ្រោយចង្វា រាជធានីភ្នំពេញនោះ ត្រូវបានកម្លាំងនាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ សហការជាមួយកម្លាំងស្នងការដ្ឋាននគរបាលរាជធានីភ្នំពេញ បើកប្រតិបត្តិការស្រាវ និងឈានដល់ការចាប់ខ្លួនជនដៃដល់ ជាជនជាតិចិនដូចគ្នា សម្លាប់ដុតសង្សារ រួចគេចខ្លួនទៅក្រៅប្រទេស មកវិញជាប់អន្ទាក់តែម្តង ។

បើតាមលោកវរសេនីយឯក ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ បានប្រាប់បណ្ដាញសារព័ត៌មានឲ្យដឹងនៅរសៀលថ្ងៃទី២៣ ខែកក្កដា ឆ្នាំ២០១៩នេះថា៖ ជនដៃដល់ត្រូវកម្លាំងនគរបាលចាប់ខ្លួនបាន នៅថ្ងៃទី២២ ខែកក្កដា ឆ្នាំ២០១៩ បន្ទាប់ពីរូបគេបានវិលត្រឡប់ចូលប្រទេសកម្ពុជាវិញ ក្រោយគេចខ្លួនទៅប្រទេសចិនអស់មួយរយៈ បន្ទាប់ពីធ្វើសកម្មភាព ។

ប្រតិបត្តិការជាបន្ដបន្ទាប់នេះ ត្រូវបានធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងមានការចង្អុលដឹកនាំដោយ លោកឧត្តមសេនីយ៍ឯក អ៉ិន បូរ៉ា អគ្គស្នងការរងនគរបាលជាតិ និងលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ។ ក្នុងនោះក៏មានការសហការពី នាយកដ្ឋាននគរបាលបច្ចេកទេស និងវិទ្យាសាស្ដ្រ និងស្នងការដ្ឋាននគរបាលរាជធានីភ្នំពេញផងដែរ ។

លោកវរសេនីយ៍ឯក ជាវ វិបុល បានឲ្យដឹងបន្តថា៖ ជនដៃដល់ដែលកម្លាំងនគរបាលឃាត់ខ្លួនឈ្មោះ Yang Yang អាយុ២៨ឆ្នាំ ជនជាតិចិន កាន់លិខិតឆ្លងដែនលេខ ED1029380 ដែលចាប់ខ្លួនបាននៅចំណុចក្រុមហ៊ុន THE PARK WAY ស្ថិតនៅផ្លូវលេខ ២៧៣ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ។

សមត្ថកិច្ចបានអោយដឹងថា៖ តាមចម្លើយរបស់ឈ្មោះ Yang Yang បានសារភាពថា ខ្លួនបានចូលមកប្រទេសកម្ពុជា កាលពីអំឡុងខែ១០ ឆ្នាំ២០១៦ តាមប្រលានយន្តហោះអន្តរជាតិភ្នំពេញ មកធ្វើការនៅក្នុងក្រុមហ៊ុន THE PARK WAY ស្ថិតនៅផ្លូវលេខ ២៧៣ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ។ លុះដល់ឆ្នាំ២០១៨ ក៏បានស្គាល់ជនរងគ្រោះឈ្មោះ Miao Xiaolin ហើយក៏ស្រឡាញ់គ្នាជាសង្សារ ដោយជួលផ្ទះសំណាក់យីហោ ហ្វីបារីស បន្ទប់លេខ ២០៦ សង្កាត់ស្រះចក ខណ្ឌដូនពេញ រាជធានីភ្នំពេញ រស់នៅជាមួយគ្នា រហូតដល់មានផ្ទៃពោះ ។

សមត្ថកិច្ចបន្តថា៖ លុះដល់ថ្ងៃទី២៩ ខែមិថុនា ឆ្នាំ២០១៩ បុរសជាសង្សារ និងជនដៃដល់បានប្រាប់ឲ្យជនរងគ្រោះយកកូនចេញ ព្រោះខ្លួនមានប្រពន្ធរួចហើយ តែជនរងគ្រោះមិនព្រម ក៏មានការឈ្លោះប្រកែកគ្នាហើយខ្លួនក៏ច្រានជនរងគ្រោះ ឲ្យដួលទៅលើឥដ្ឋបណ្តាលឲ្យសន្លប់ ហើយបានយកកន្សែងពោះគោរិតកសម្លាប់តែម្តង ។ បន្ទាប់មកជនដៃដល់ បានទៅទិញវ៉ាលីមួយនៅផ្សារថ្មី តម្លៃ៨០ដុល្លារ ហើយយកសាកសពដាក់ក្នុងវ៉ាលី រហូតដល់ម៉ោងប្រហែល៨យប់ថ្ងៃកើតហេតុ ទើបខ្លួនយកវ៉ាលីដែលមានសាកសពដឹកតាមរថយន្តមួយគ្រឿងម៉ាក Lexus RX 330 ពណ៌ស ពាក់ស្លាកលេខភ្នំពេញ 2AM-1334 និងទិញសាំងមួយដប រួចដឹកសាកសពយកទៅដុតចោលនៅចំណុចដីឡូតិ៍លីយ៉ុងផាត់ ហើយគេចខ្លួនទៅប្រទេសចិននៅថ្ងៃទី០៦ ខែកក្កដា ឆ្នាំ២០១៩ ។

រហូតដល់ថ្ងៃទី២២ ខែកក្កដា ឆ្នាំ២០១៩ ជនដៃដល់ក៏ត្រឡប់មកធ្វើការនៅក្នុងក្រុមហ៊ុនវិញ ដោយគិតថាពុំមានអ្នកណាដឹងរឿងនេះ តែពេលមកដល់ក្រុមហ៊ុនវិញក៏ត្រូវសមត្ថកិច្ចឃាត់ខ្លួនតែម្តង ។ បច្ចុប្បន្នបន្ទាប់ពីបញ្ចប់ការសួរនាំ កម្លាំងនាយកដ្ឋាននគរបាលព្រហ្មទណ្ឌ កំពុងកសាងសំណុំរឿង ដើម្បីបញ្ជូនទៅតុលាការចាត់ការបន្ដតាមនីតិវិធី ។

ពិតជាឈាមស្រែក ស្បែកហៅមែន បាបកម្មអត់ចាំជាតិក្រោយទេ ទីបំផុតជនជាតិចិនជាឃាតក ដ៏សហាវយង់ឃ្នង សម្លាប់សង្សារទាំងមានកូនក្នងផ្ទៃពោះ យកទៅចាក់សាំងដុតសម្លាប់ចោល ត្រូវសមត្ថកិច្ចវែកមុខឃើញ យកមកផ្តន្ទាទោស អាចប្រឈមនិងជាប់គុកអស់១ជីវិត ៕ សិលា

 


ចែករំលែក៖