សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ជិះម៉ូតូទៅលេងផ្ទះម្ដាយក្មេក តែបានជិះម៉ូតូទាក់ដៃចង្កូតម៉ូតូ១គ្រឿងទៀតបណ្ដាលឲ្យដួល ត្រូវរថយន្តមិនស្គាល់ម៉ាកកិនចំក្បាលស្លាប់ កាលពីវេលាម៉ោង៩យប់ ថ្ងៃទី២៧ ខែកក្កដា ឆ្នាំ២០១៩ តាមបណ្ដោយផ្លូវជាតិលេខ២ ស្ថិតក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ។
សពជនរងគ្រោះមានឈ្មោះ ចំណាន វាន់ដេត ភេទប្រុស អាយុ២៦ឆ្នាំ មុខរបរធ្វើការធនាគារ មានស្រុកកំណើតនៅភូមិជើងកែប ស្រុកកណ្ដាលស្ទឹង ខេត្តកណ្ដាល ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុបុរសរងគ្រោះខាងលើបានជិះម៉ូតូម៉ាកហុងដាឌ្រីម ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ ភ្នំពេញ1CF -6601 ទិសដៅពីលិចទៅកើតក្នុងល្បឿនល្មមបំណងទៅលេងផ្ទះម្ដាយក្មេក លុះមកដល់ចំណុចកើតហេតុ ក្បែរ រង្វង់មូលគួរស្រូវ តាមបណ្ដោយផ្លូវជាតិលេខ២ ស្រាប់តែមានម៉ូតូមួយគ្រឿងទៀតម៉ាកហុងដាគុបបើកវ៉ាក៏ទាក់ដៃចង្កូតបណ្ដាលឲ្យជនរងគ្រោះខាងលើដួល ហើយត្រូវរថយន្តមិនស្គាល់ម៉ាកបើកមកពីក្រោយចំក្បាលធ្លាយខួរស្លាប់ភ្លាមៗតែម្ដង ចំណែករថយន្តបង្កបានបើករត់គេចបាត់ស្រមោល ចំណែកម៉ូតូហុងដាគុប ក៏ជិះរត់គេចខ្លួនបាត់ដូចគ្នា ។
ក្រោយកើតហេតុ សមត្ថកិច្ចមូលដ្ឋានផ្នែកជំនាញចរាចរណ៍បានចុះមកវាស់វែង និងធ្វើកំណត់ហេតុប្រគល់សពជនរងគ្រោះទៅឲ្យសាច់ញាតិយកទៅធ្វើបុណ្យតាមប្រពៃណី៕ ភារ៉ា ដង្កោ
