សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តFord Ranger បើកបុករថយន្ត Highlander វិលមួយជុំ បណ្ដាលឲ្យរថយន្តទាំងពីរគ្រឿង រងការខូចខាតដូចគ្នា តែមិនបណ្ដាលឲ្យមានមនុស្សរងរបួសនោះទេ គ្រាន់តែម្ចាស់រថយន្តទាំងសងខាងប្រកែកគ្នាយកត្រូវរៀងខ្លួន ទើបសមត្ថកិច្ចអូសយកទៅទុករង់ចាំដោះស្រាយពេលក្រោយ ។
ហេតុការណ៍គ្រោះថ្នាក់ចរាចរនេះបានកើតឡើងកាលពីពាក់កណ្ដាលអធ្រាត្រ ឈានចូលថ្ងៃច័ន្ទ ទី០៥ ខែសីហា ឆ្នាំ២០១៩ នៅតាមបណ្តោយផ្លូវហាណូយ កែងផ្លូវឧកញ៉ាម៉ុងរិទ្ធី (ផ្លូវ១៩២៨) សង្កាត់គោកឃ្លាង ខណ្ឌសែនសុខ ។
សាក្សីដែលឃើញហេតុការណ៍ផ្ទាល់បានរៀបរាប់ប្រាប់ ថា នៅមុនពេលកើតហេតុ គេឃើញរថយន្តមួយគ្រឿង ម៉ាកតូយ៉ូតា ហាយឡែនឌ័រ (Highlander) ពាក់ស្លាកលេខភ្នំពេញ 2AL-9046 បើកបរតាមផ្លូវឧកញ៉ាម៉ុងឬទ្ធី(ផ្លូវ១៩២៨) យ៉ាងលឿន រេចង្កូតចុះឡើងៗពេញផ្លូវ ទំនងជាអ្នកបើកបរស្រវឹងស្រា លុះមកដល់ចំណុចកើតហេតុស្រាប់តែមានរថយន្ត Ford Ranger មួយគ្រឿង ពាក់ស្លាកលេខភ្នំពេញ 2AZ-8969 បានធ្វើដំណើរតាមផ្លូវហាណូយ ក្នុងទិសដៅពីត្បូងទៅជើង ក្នុងល្បឿនលឿនល្មម បានជ្រុលទៅបុករថយន្ត Highlander ខាងស្ដាំផ្នែកខាងក្រោយ បណ្ដាលឲ្យវិលមួយជុំ តែមិនបណ្ដាលឲ្យមានមនុស្សរងរបួសនោះទេ គ្រាន់តែម្ចាស់រថយន្តទាំងសងខាង បានចុះដោះស្រាយគ្នាដែរ តែមិនត្រូវគ្នាទេ ព្រោះការចរចារដោះស្រាយគ្នានោះ ម្ខាងៗប្រកែកយកត្រូវរៀងខ្លួន ។
បន្ទាប់ពីកើតហេតុ ភាគីទាំងសងខាង បានប្រកែកគ្នារកត្រូវរៀងខ្លួន ដោះស្រាយគ្នាមិនចេញ ទើបសមត្ថកិច្ចមូលដ្ឋាន ចរាចរខណ្ឌសែនសុខ បាននាំអ្នកបើកបររថយន្ត Highlander ទំនងជាស្រវឹងស្រា ទៅផ្លុំជាតិអាកុល និងយករថយន្តទាំងពីរគ្រឿង យកទៅរក្សាទុកបណ្ដោះអាសន្ន នៅអធិការដ្ឋានខណ្ឌសែនសុខ រង់ចាំដោះស្រាយគ្នានៅពេលក្រោយ ៕ ជ្រោយពេជ្រ
