ម៉ូតូសណ្ដោងរ៉ឺម៉កមួយគ្រឿងបត់ស្ដាំឆ្លងផ្លូវធ្វើឲ្យម៉ូតូមួយគ្រឿងទៀត បើកច្រាស់ទិសគ្នាបុកពេញមួយទំហឹងបណ្ដាលឲ្យបុរស និងនារី២នាក់រងរបួសធ្ងន់

ខេត្តកណ្ដាល៖ បុរស-នារី២នាក់ទទួលរងរបួសធ្ងន់ ខណៈបើកម៉ូតូឌុបគ្នា បានបុកជាមួយម៉ូតូសណ្ដោងរ៉ឺម៉កមួយគ្រឿង ដែលបើកបត់ស្ដាំឆ្លង ក្នុងទិសដៅច្រាស់ទិសគ្នា ផ្លូវពេញមួយទំហឹង នៅវេលាម៉ោង១៩ និង៣០នាទី ថ្ងៃទី៩ ខែសីហា ឆ្នាំ០២១៩ ត្រង់ចំណុចផ្លូវបេតុង 7NG ស្ថិតក្នុងភូមិព្រៃចាស់ ឃុំវិហ៊ារសួគ៌ ស្រុកខ្សាច់កណ្ដាល ខេត្តកណ្ដាល ។

មន្រ្ដីនគរបាលស្រុកខ្សាច់កណ្ដាលបានឲ្យដឹងថា ជនរងគ្រោះរងរបួសធ្ងន់មាន២នាក់ ទី១-ឈ្មោះ ជា សាម៉េត ភេទប្រុស អាយុ២៩ឆ្នាំ (រងរបួសធ្ងន់បាក់ជើងខាងស្ដាំ និងបាក់ដៃទាំងសងខាង) ជាអ្នកបើកបរម៉ូតូម៉ាកHONDA WaveX ពណ៌ខ្មៅ ពាក់ស្លាកលេខភ្នំពេញ1BX-8752 និងទី២-ឈ្មោះ ជា សុខណេ ភេទស្រី អាយុ២១ឆ្នាំ ជាអ្នករួមដំណើរ (រងរបួសធ្ងន់បាក់ជើងខាងឆ្វេង) ។ ជនរងគ្រោះទាំង២នាក់ មានទីលំនៅភូមិទួលសង្កែរ សង្កាត់ទួលសង្កែរ ខណ័្ឫស្សីកែវ រាជធានីភ្នំពេញ ។ ចំណែកម៉ូតូបង្កម៉ាកHONDA Wave សណ្ដោងរ៉ឺម៉ក ពណ៌ក្រហម គ្មានស្លាកលេខ បើកបរដោយឈ្មោះ ឈន ភឺន ភេទប្រុស អាយុ៣៣ឆ្នាំ មានទីលំនៅភូមិសន្លូន ឃុំពានរោង ស្រុកស្វាយអន្ទរ ខេត្តព្រៃវែង ។

ប្រភពដដែលបន្ដថា នៅមុនពេលកើតហេតុសាក្សីបានឃើញជនរងគ្រោះរងរបួសធ្ងន់២នាក់ បានជិះម៉ូតូឌុបគ្នា ក្នុងទិសដៅពីជើងទៅត្បូង លុះបើកមដល់ចំណុចកើតហេតុ ស្រាប់តែមានម៉ូតូសណ្ដោងរ៉ឺម៉កមួយគ្រឿង បើកក្នុងទិសដៅពីត្បូងទៅជើង (ច្រាស់គ្នា) បានបត់ឆ្លងផ្លូវក្នុងទិសដៅពីលិចទៅកើត ដោយពុំមើលមុខមើលក្រោយនោះទេ ក៏ធ្វើឲ្យម៉ូតូជនរងគ្រោះឈប់មិនទាន់បុកម៉ូតូសណ្ដោងរ៉ឺម៉កពេញមួយទំហឹង បណ្ដាលឲ្យជនរងគ្រោះទាំង២នាក់ ទទួលរងរបួសធ្ងន់ រីឯអ្នកបើកបរម៉ូតូសណ្ដោងរ៉ឺម៉ត្រូវបានប្រជាពលរដ្ឋឃាត់ខ្លួនប្រគល់ឲ្យសមត្ថកិច្ច ។

ក្រោយពីមានហេតុការណ៍កើតឡើង ជនរងគ្រោះទាំង២នាក់ ត្រូវបានរថយន្ដសាមុយដឹកបញ្ជូនទៅសង្រ្គោះនៅមន្ទីរពេទ្យរាជធានីភ្នំពេញ ។ ចំណែកមធ្យោបាយពាក់ព័ន្ធ ត្រូវបានសមត្ថកិច្ចជំនាញចរាចរណ៍ចុះវាស់វែង និង កសាងឯកសារដកហូតយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធី ៕ ស្អាងជ័យ