សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ក្រោយពីផឹកស្រាបៀរជាមួយមិត្តភក្តិរួចបានទៅដេកក្នុងបន្ទប់ជួល ត្រូវបានមិត្តភក្តិប្រទះឃើញស្លាប់ បង្កការភ្ញាក់ផ្អើលកាលពីវេលាម៉ោង៤រសៀល ថ្ងៃទី១៤ ខែសីហា ឆ្នាំ២០១៩ នៅបន្ទប់ជួលលេខ N2 ភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ ។
សមត្ថកិច្ចបញ្ជាក់ថា ជនរងគ្រោះឈ្មោះអារះ សុធា ភេទប្រុស អាយុ៣៥ឆ្នាំ មុខរបរជាងជូសជុលរថយន្ត ស្នាក់នៅកន្លែងកើតហេតុ មានស្រុកកំណើតនៅភូមិព្រែកចង្ក្រាន់ ឃុំល្វេ ស្រុកកោះសូទិន ខេត្តកំពង់ចាម។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុជនរងគ្រោះនិងមិត្តភក្តិផ្សេងទៀតបាននាំគ្នាផឹកស៊ីនៅកន្លែងធ្វើការ បន្ទាប់ពីផឹកចប់ ក៏បន្តមកផឹកនៅបន្ទប់ទៀត។
សាក្សីបានបន្តថា ក្រោយពីផឹកចប់ពួកគេបានសម្រាករហូតដល់ម៉ោង១៤រសៀល ថ្ងៃទី១៤ ខែសីហា មិត្តភក្តិជនរងគ្រោះបានទៅធ្វើការបាត់ រហូតមកដល់ម៉ោង១៦ល្ងាចថ្ងៃដដែល ទើបមកវិញ ឃើញជនរងគ្រោះស្លាប់បាត់ទៅហើយ ។
ក្រោយកើតហេតុ ទើបរាយការណ៍ទៅសមត្ថកិច្ចមូលដ្ឋានចុះមកធ្វើកោសល្យវិច័យ និងបញ្ជាក់ថា ជនរងគ្រោះស្លាប់ដោយសារគាំងបេះដូង ទើបប្រគល់សពទៅក្រុមគ្រួសារធ្វើបុណ្យតាមប្រពៃណីនៅស្រុកកំណើត ៕ សុខាសែនជ័យ
