សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហាងលក់ទូរស័ព្ទដៃស៊េរីទំនើប យីហោ ជីឃាង ដែលមានទីតាំងនៅ ផ្ទះលេខ ៧M ផ្លូវចោមចៅ ភូមិចោមចៅ៣ សង្កាត់ចោមចៅទី២ ខណ្ឌពោធិ៍សែនជ័យ ត្រូវបានជនសង្ស័យគាស់ដំបូលផ្ទះចូលលួចទូរស័ព្ទដៃអស់ចំនួន៧០គ្រឿង ហើយគេចខ្លួនបាត់អស់លុះវេលាម៉ោង៧ព្រឹកថ្ងៃទី១៩ ខែសីហា ឆ្នាំ២០១៩ ទើបដឹងថា ចោរលួចឆោឡោឡើង ។
ម្ចាស់ផ្ទះឈ្មោះជី ឃាង ភេទប្រុស អាយុ៣១ឆ្នាំ មុខរបរលក់ទូរស័ព្ទស្នាក់នៅកន្លែងកើតហេតុខាងលើ ។
តាមសម្តីជនរងគ្រោះបានឲ្យដឹងថា មុនពេលកើតហេតុនៅល្ងាចថ្ងៃទី១៨ ខែសីហា ឆ្នាំ២០១៩ រូបគាត់ និងក្រុមគ្រួសារបានរៀបចំឥវ៉ាន់ទុកដាក់ រួចក៏ឡើងដេកជាន់លើអស់លុះព្រឹកឡើង ក៏ចុះមករៀបចំឥវ៉ាន់វិញ ស្រាប់តែឃើញទ្វារទូដាក់ទូរស័ព្ទចំហរ និងបាត់អស់ចំនួន៧០គ្រឿង ទើបប្តឹងនគរបាលអោយជួយស្រាវជ្រាវតាមចាប់ជនសង្ស័យផ្តន្ទាទោសតាមច្បាប់ ៕ សុខាសែនជ័យ
