សារព័ត៌មាន នគរវត្ត តែងតែនាំមុខគេជានិច្ច
សារព័ត៌មាន Sputnikនៅថ្ងៃចន្ទ ទី២៦ ខែសីហា ឆ្នាំ២០១៩ បានផ្សាយថា រដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ បាននិយាយថា លោកគាំទ្រ ការវាយប្រហារតាមផ្លូវអាកាសរបស់អ៊ីស្រាអែល នៅក្នុងប្រទេសស៊ីរី ព្រោះវាគឺជាសិទ្ធិការពារខ្លួន ដោយស្របច្បាប់ ។
លោក ប៉ុមប៉េអូ បានលើកឡើងដូច្នេះថា៖«នៅថ្ងៃនេះ ខ្ញុំបានជជែកជាមួយលោកនាយករដ្ឋមន្ត្រី Netanyahu ហើយខ្ញុំសូមសម្ដែងការគាំទ្រចំពោះសិទ្ធិការពារ ខ្លួនស្របច្បាប់របស់អ៊ីស្រាអែល ក្នុងការវាយប្រហារលើមូលដ្ឋានយោធាអ៊ីរ៉ង់នៅស៊ីរី ដើម្បីទប់ស្កាត់ ឬបំផ្លាញផែនការប្រឆាំងនឹងអ៊ីស្រាអែល» ។
គួរជម្រាបថា កាលពីថ្ងៃសៅរ៍ សប្ដាហ៍មុន អ៊ីស្រាអែល បានបើកការវាយប្រហារលើមូលដ្ឋាន យោធាអ៊ីរ៉ង់ជាច្រើន កន្លែងនៅក្នុងប្រទេសស៊ីរី ក្នុងគោលបំណងបំផ្លាញសំបុកយន្ដហោះដ្រូន ដែលកងកម្លាំង អ៊ីរ៉ង់ទុកប្រើប្រាស់ដើម្បីវាយប្រហារលើអ៊ីស្រាអែល ។
ប៉ុន្តែខាងយោធាស៊ីរី មិនបានបញ្ជាក់លម្អិតពីការខូចខាត ឬជនរងគ្រោះណាម្នាក់ឡើយ ដោយគ្រាន់តែទទួលស្គាល់ថាខ្លួនចាប់បានសញ្ញាមីស៊ីល របស់សត្រូវបាញ់ចេញពីតំបន់ Golan ឆ្ពោះមកកាន់តំបន់ក្បែររដ្ឋធានីដាម៉ាស់ ។
នៅក្នុងព្រឹកតែការណ៍មួយផ្សេងទៀត កាលពីយប់ ថ្ងៃ ទី២៥ ខែសីហា កាំជ្រួចមីស៊ីលរបស់ក្រុមប្រដាប់អាវុធ នៅកាហ្សា បានបាញ់សំដៅទៅលើតំបន់ភាគខាងត្បូង នៃប្រទេសអ៊ីស្រាអែល ប៉ុន្តែកាំជ្រួចមីស៊ីលនោះ ត្រូវកាំជ្រួចការពារ ដែនអាកាសរបស់អ៊ីស្រាអែល Iron dome បាញ់ស្ទាក់កម្ទេចចោល ប្រកបដោយជោគជ័យ ។
សារព័ត៌មាន Times of Israel បានផ្សាយថា កាំជ្រួចមីស៊ីលពីរគ្រាប់ ត្រូវបានប្រព័ន្ធការពារអ៊ីស្រាអែល បាញ់កម្ទេចចោល នៅលើអាកាស ។ ក្នុងពេលជាមួយគ្នានោះដែរ ក៏មានមីស៊ីលមួយដើមទៀត បានឆ្លងផុតប្រព័ន្ធការពារដែនអាកាសរបស់អ៊ីស្រាអែល ដោយធ្លាក់ចំផ្លូវល្បឿនលឿន បង្កឲ្យមានផ្ទុះឆេះ ប៉ះពាល់ដល់ផ្ទះរបស់ពលរដ្ឋនៅក្បែរនោះ ប៉ុន្តែវាមិនបណ្តាលឲ្យមានអ្នកស្លាប់ និងរងរបួសនោះឡើយ ។
ដោយឡែកប្រព័ន្ធផ្សព្វផ្សាយរបស់អ៊ីស្រាអែល បានផ្សាយថា មានស្ត្រីម្នាក់បានរងរបួសស្រាល ខណៈព្យាយាមរត់ទៅកាន់ត្រង់សេ ដើម្បីគេចពីគ្រាប់ផ្លោងនោះ ។ ការវាយប្រហារនេះ បានកើតឡើង ក្នុងពេល អ៊ីស្រាអែល និងកាហ្សាកំពុងតែតានតឹងនៅតំបន់ព្រំដែន ។ អ៊ីស្រាអែល តែងតែវាយប្រហារទៅលើគោលដៅរបស់ក្រុមហាម៉ាសនៅកាហ្សា ។
ក្រុមហាម៉ាស់ បានបង្កើតរដ្ឋាភិបាលដាច់ដោយឡែក នៅកាហ្សា កាលពីឆ្នាំ២០០៦ ។ កាហ្សា គឺជាតំបន់ជាប់សមុទ្រ មេឌីទែរ៉ាណេ ជាប់អេហ្ស៊ីប និង អ៊ីស្រាអែល ។ កាហ្សា មិនស្ថិតនៅ ក្រោមប្រទេសណាមួយនោះឡើយ ហើយក្រុមហាម៉ាស់ គ្រប់គ្រងដីគោក ចំណែកអ៊ីស្រាអែលគ្រប់គ្រង ដែនអាកាស និងដែនសមុទ្រកាហ្សា ។ អាចនិយាយបានថា តំបន់កាហ្សា ត្រូវអ៊ីស្រាអែល ឡោមព័ទ្ធ ទាំងដែនអាកាស និងដែនទឹក ៕
