កម្លាំងការិយាល័យព្រហ្មទណ្ឌកម្រិតស្រាល ឃាត់ជនសង្ស័យម្នាក់ ជំនាញឆក់ទ្រព្យសម្បត្តិ និងលួចម៉ូតូ

ភ្នំពេញ៖ ជនសង្ស័យម្នាក់ ជំនាញឆក់ទ្រព្យសម្បត្តិ និងលួចម៉ូតូសម្រេច៣លើកត្រូវបានកម្លាំងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញឃាត់ខ្លួន ។

ជនសង្ស័យឈ្មោះ បូរី រាជ្យ អាយុ២៥ឆ្នាំ ស្នាក់នៅតាមបណ្ដោយផ្លូវលំ ក្នុងសង្កាត់គោករកា ខណ្ឌព្រែកព្នៅ ។ ជនរងគ្រោះឈ្មោះ ឈុង បញ្ញា ភេទស្រី អាយុ២៨ឆ្នាំ មុខរបរនៅផ្ទះ ស្នាក់នៅផ្ទះលេខ១៩២ ផ្លូវB ភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ បានបាត់បង់ម៉ូតូម៉ាកស៊ុយហ្សុយគីនិច ។

បើតាមរបាយការណ៍របស់ លោកវរសេនីយ៍ឯក ប៊ុន សត្យា នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានឲ្យដឹងនៅថ្ងៃទី៣១ ខែសីហា ឆ្នាំ២០១៩ថា តាមការស្រាវជ្រាវជនសង្ស័យត្រូវសមត្ថកិច្ចបង្ក្រាបបាននៅចំណុចមុខផ្ទះលេខ៩១ (អតីតរោងភាពយន្តហែមជាតិ) ផ្លូវលេខ១៣០ សង្កាត់ផ្សារចាស់ ខណ្ឌដូនពេញ នៅយប់រំលងអធ្រាត្រ ឈានចូលថ្ងៃទី២៨ ខែសីហា ឆ្នាំ២០១៩ ។

ក្រោយឃាត់ខ្លួន សាកសួរ ជនសង្ស័យបានឆ្លើយសារភាពប្រាប់សមត្ថកិច្ចថា កាលពីរសៀលថ្ងៃទី០៧ ខែសីហា រូបគេបានធ្វើសកម្មភាពឆក់ទូរស័ព្ទដៃស្ថិតនៅចំណុចរង្វង់មូលវិមានឯករាជ្យ សង្កាត់ចតុមុខ ខណ្ឌដូនពេញ ។

ជនសង្ស័យបានឆ្លើយសារភាពប្រាប់សមត្ថកិច្ចទៀតថា ករណីទី២ នៅថ្ងៃទី១២ ខែសីហា រូបគេបានធ្វើសកម្មភាពលួចម៉ូតូម៉ាកស៊ុយហ្សុយគីនិច ពណ៌សលាយខ្មៅ និងក្រហម មួយគ្រឿងពាក់ស្លាកលេខភ្នំពេញ1GG-9087 ស្ថិតនៅចំណុចបុរីមហាសែនសុខ ខាងមុខផ្ទះលេខ១៩២ ផ្លូវB ភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ និងលើកទី៣ នៅថ្ងៃទី១៧ ខែសីហា បានធ្វើសកម្មភាពឆក់ ទូរស័ព្ទដៃម៉ាក OPPO F9 ១គ្រឿងទៀត នៅចំណុចបញ្ជាការដ្ឋានកងរាជអាវុធហត្ថខណ្ឌទួលគោក ផ្លូវលេខ១៨២ សង្កាត់ទឹកល្អក់២ ខណ្ឌទួលគោក ។

បន្ទាប់ពីឃាត់ខ្លួនជនសង្ស័យកម្លាំងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានចាប់យកវត្ថុតាងរួមមាន៖ ម៉ូតូម៉ាកហុងដាប៊ីត ពណ៌សលាយខៀវ ឆ្នាំផលិត២០១៩ ពាក់ស្លាកលេខភ្នំពេញ1HS-4263 មួយគ្រឿង, សោខ្សៀរទីបលេខ៨ រាងអក្សរ L ចំនួន០១, ដែកសំប៉ែតចុងស្រួចចំនួន០១, ខ្សែលួសសសៃ ពណ៌ស ប្រវែង០៥ សង់ទីម៉ែត្រចំនួន ០២សសៃ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមនីតិវិធី ៕ ជ្រោយពេជ្រ