សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជាជនជាតិវៀតណាមម្នាក់រងរបួសភ្នែកដោយសារតែជនសង្ស័យ១ក្រុមមានគ្នាជាង១០នាក់បានបើករថយន្ត និងជិះម៉ូតូ៣គ្រឿងនាំគ្នាសម្រុកចូលទៅកាប់ និងប្រើសឺរាំងបាញ់ទឹកអាស៊ីតដល់ផ្ទះម៉ាស្សាមួយកន្លែង បង្កឱ្យមានការភ្ញាក់ផ្អើលកាលពីម៉ោងម៉ោង១០យប់ ថ្ងៃទី៤ ខែកញ្ញា ឆ្នាំ២០១៩ នៅទល់មុខផ្ទះ១២០ ផ្លូវ៣០៤ ស្ថិតក្នុងភូមិ៥ សង្កាត់អូឡាំពិក ខណ្ឌបឹងកេងកង រាជធានីភ្នំពេញ។
ជនរងគ្រោះជាបុរសជនជាតិវៀតណាមខាងលើមានវ័យជាង៣០ឆ្នាំ មិនទាន់ស្គាល់អត្តសញ្ញាណនៅឡើយ។
បើតាមប្រភពពីកន្លែងកើតហេតុបានឱ្យដឹងថា មុនលកើតហេតុគេបានឃើញបុរសៗជាជនសង្ស័យមានគ្នាជាង១០នាក់ជិះម៉ូតូចំនួន៣គ្រឿង និងរថយន្តឡិចស៊ីស ស៊េរីទំនើបមួយគ្រឿង ដោយមិនដឹងថាមានរឿងអ្វីនោះទេ គឺបានលើកបក្សពួកប្រដាប់ដោយដាវ ញញួរ កាំបិត និងទឹកអាស៊ីតផងនោះ បានសំរុកចូលផ្ទះម៉ាស្សាខាងលើ វាយ និងប្រើសឺរាំងបាញ់ទឹកអាស៊ីត បណ្តាលឱ្យបុរសជនជាតិវៀតណាមម្នាក់រងរបួសភ្នែក ហើយត្រូវបានគ្នីគ្នារបស់ជនរងគ្រោះដឹកតាមម៉ូតូយកទៅសង្គ្រោះនៅមន្ទីពេទ្យភ្លាមៗផងដែរ ។
ក្រោយពីពេលធ្វើសកម្មភាពរួចក្រុមជនសង្ស័យខាងលើក៏បាននាំគ្នាបើករថយន្ត និងម៉ូតូរត់គេចខ្លួនបាត់ស្រមោល ដោយបន្សល់វត្ថុតាងមួយចំនួននៅកន្លែងកើតហេតុតែមង្ត ។
ក្រោយកើតហេតុ សមត្ថកិច្ចមូលដ្ឋាន បានចុះទៅដល់កន្លែងកើតហេតុ រួចហើយក៏សាកសួរ និងប្រមូលវត្ថុតាងមានដូចជា ដាវសាំងម៉ូរ៉ៃ១ដើម ញញួរ១ កូនកាំបិតចិត្តបន្លែចំនួន៤ និងមានកំប៉ុងនំដាក់ទឹកអាស៊ីត១ និងសឺរាំងសំរាប់បាញ់ទឹកអាស៊ី១ផង ។ ក្នុងករណីនេះដែរ សមត្ថកិច្ចមិនទាន់កំណត់មុខសញ្ញាបាននៅឡើយទេ គ្រាន់តែសង្ស័យថាជាករណីរឿងគំនុំ ៕ សរស្មី
