សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ យុវជនម្នាក់ឆក់ចរន្តអគ្គិសនីបណ្តាលឲ្យស្លាប់ ពេលកំពុងធ្វើដំបូលដែក ក្នុងពេលមេឃកំពុងភ្លៀង ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទី ថ្ងៃទី៥ ខែកញ្ញា ឆ្នាំ២០១៩ នៅភូមិស្ពានគ្រង ឃុំចំណារក្រោម ស្រុកស្ទោង ខេត្តកំពង់ធំ។
សមត្ថកិច្ចបានឲ្យដឹងថា សពជនរងគ្រោះ ឈ្មោះឈុន ម៉េងឈាង ភេទប្រុស អាយុ២០ឆ្នាំ នៅភូមិកំពង់ក្ដី ឃុំកំពង់ចិនត្បូង ស្រុកស្ទោង ខេត្តកំពង់ធំ។
តាមការបំភ្លឺ ពីឈ្មោះ ញឹក សូរិយា ភេទប្រុស ជាមេជាង បានបញ្ជាក់ថា ៖ នៅថ្ងៃទី៥ ខែកញ្ញា ឆ្នាំ២០១៩ ម៉ោង៧ព្រឹក កូនជាងខ្លួនមាន ឈ្មោះ ឈុន ម៉េងឈាង ភេទប្រុស ឈ្មោះថាញ់ ឈ្មោះឡូង ឈ្មោះឃ្លោក បានទៅផ្សាធ្វើដំបូល ឃ្លាំងឲ្យ ឈ្មោះ រិន សារ៉ាត់ នៅភូមិស្ពានគ្រងឃុំចំណារក្រោម រហូត ដល់ម៉ោងប្រហែល១០និង៣០នាទី មេឃភ្លៀង ពេលនោះជនរងគ្រោះ ឈ្មោះឈុន ម៉េង ឈាង បានយកដែកក្រវ៉េ សម្រាប់ទាក់ស័ង្កសី ទៅទាក់ម៉ូទ័រស្វានបណ្តាលឲ្យប៉ះរន្ធព្រីភ្លើងហើយឆក់រមៀលធ្លាក់មកទើរ និងទទឹក ភ្លាមនោះអ្នកធ្វើការជាមួយគ្នាបានដកឌុយព្រីភ្លើង រួចយកជនរងគ្រោះមកមន្ទីរពេទ្យបង្អែកស្ទោង តែជនរងគ្រោះស្លាប់ទៅហើយ រួចដឹកសពមកធ្វើបុណ្យនៅឯភូមិកំពង់ក្តីវិញ ៕ ប៊ុនរិទ្ធី
