សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី១១ ខែកញ្ញានេះ នាយករដ្ឋមន្រ្តីជប៉ុនលោក ស៊ីនហ្សូ អាបេ បានធ្វើការរុះរើសមាសភាពនៃគណបក្សកាន់អំណាច LDP ដើម្បីរៀបចំជាថ្មីឡើងវិញ។ លោក អាបេ បានតែងតាំងរដ្ឋមន្រ្តីអូឡាំពិក លោក ស៊ូហ្សូគិ ស៊ូនីឈិ (Suzuki Shunichi) ជាប្រធានអគ្គក្រុមប្រឹក្សាគណបក្ស។ លោក នីកៃ តូស៊ីហ៊ីរ៉ូ (Nikai Toshihiro) នៅបន្តរក្សាតំណែងជាអគ្គលេខាធិការបក្សដូចដើម ខណៈអតីតរដ្ឋមន្រ្តីការបរទេស លោក គីហ្ស៊ីដា ហ្វូមីអូ (Kishida Fumio) ក៏នៅតែកាន់តួនាទីជា ប្រធានក្រុមប្រឹក្សាស្រាវជ្រាវគោលនយោបាយរបស់ LDP ដដែលផងដែរ។
ចំណែកឯអតីតរដ្ឋមន្រ្តីអប់រំ លោក ហ្ស៊ីម៉ូមួរ៉ា ហាគុប៊ុន (Shimomura Hakubun) នឹងឡើងជាប្រធានគណៈកម្មាធិការយុទ្ធសាស្រ្តបោះឆ្នោតរបស់បក្ស ។ បើតាមសេចក្តីរាយការណ៍ព័ត៌មានរបស់ប្រព័ន្ធផ្សព្វផ្សាយជប៉ុន រដ្ឋមន្រ្តីហិរញ្ញវត្ថុលោក អាសូ តារ៉ូ (Aso Taro) និងអ្នកនាំពាក្យរដ្ឋាភិបាល លោក ស៊ូហ្គា យ៉ូហ្ស៊ហ៊ីដេ(Suga Yoshihide) នឹងរក្សាតំណែងដដែល។
ជាមួយគ្នានេះលោក អាបេ ត្រូវគេរំពឹងថា នឹងតែងតាំងអតីតកីឡាការនីជិះស្គី និងជាប្រធានសហព័ន្ធកីឡាស្គីជប៉ុន លោកស្រី ហាមីម៉ូតុ សៃកុ (Hashimoto Seiko) ជារដ្ឋមន្រ្តីអូឡាំពិក ដើម្បីទទួលបន្ទុករៀបចំធ្វើជាម្ចាស់ផ្ទះព្រឹត្តិការណ៍អូឡាំពិកឆ្នាំ២០២០ នៅទីក្រុងតូក្យូ។ បន្ថែមពីនេះ លោក កូអ៊ីហ្សូមិ ហ្ស៊ីនជីរ៉ូ (Koizumi Shinjiro) ដែលជាកូនប្រុសអតីតនាយករដ្ឋមន្រ្តី កូអ៊ីហ្សូមិ (Koizumi Junichiro) ត្រូវគេរំពឹងថា ស្ថិតក្នុងចំណោមរដ្ឋមន្រ្តីថ្មីចំនួន ១៣រូប ក្នុងចំណោមរដ្ឋមន្រ្តីទាំង ១៩រូបដែលនឹងត្រូវតែងតាំង។
នៅក្នុងព្រឹត្តិការមួយផ្សេងទៀត ពាក់ព័ន្ធជម្លោះពាណិជ្ជកម្មរវាងកូរ៉េខាងត្បូង និងជប៉ុនកាន់តែសាយភាយធំឡើង ជាក់ស្តែងនៅពេលនេះ ក្រសួងពាណិជ្ជកម្មរបស់កូរ៉េខាងត្បូង បានសម្រេចប្តឹងជប៉ុន ដែលបានរឹតបន្តឹងការត្រួតពិនិត្យនូវការនាំចេញ សម្ភារបច្ចេកវិទ្យាខ្ពស់មួយចំនួន របស់កូរ៉េខាងត្បូងនោះ ទៅកាន់អង្គការពាណិជ្ជកម្មពិភពលោក (WTO)ហើយ ។
លោកស្រី Yoo Myung-hee រដ្ឋមន្ត្រីក្រសួងពាណិជ្ជកម្មកូរ៉េខាងត្បូងបានថ្លែងក្នុងសន្និសីទកាសែតនៅថ្ងៃទី១១ ខែកញ្ញា ឆ្នាំ២០១៩ថា រដ្ឋាភិបាលកូរ៉េខាងត្បូងបានសម្រេចប្តឹងជប៉ុនទៅកាន់អង្គការពាណិជ្ជកម្មពិភពលោក ប្រឆាំងតវ៉ាចំពោះទង្វើរបស់ជប៉ុន និងដើម្បីការពារផលប្រយោជន៍ជាតិ និងការពារកុំឲ្យមានការរំលោភបំពានជាថ្មីម្តងទៀតមកលើសេដ្ឋកិច្ចពាណិជ្ជកម្ម ដោយសារតែហេតុផលនយោបាយនោះ ។
លោកស្រី Yoo បានថ្លែងថា ជប៉ុនបានរឹតបន្តឹងត្រួតពិនិត្យការនាំចេញសម្ភារបច្ចេកវិទ្យាជាន់ខ្ពស់ទៅកាន់កូរ៉េខាងត្បូងនោះ ជាហេតុផលនយោបាយប្រឆាំងមកលើសេចក្តីសម្រេចរបស់តុលាការកំពូលកូរ៉េខាងត្បូង ដែលបានអនុម័តឲ្យក្រុមហ៊ុនជប៉ុនសងសំណងជំងឺចិត្តដល់ពលរដ្ឋកូរ៉េខាងត្បូង ដែលរងទុក្ខ ទារុណកម្ម ជិះជាន់ ធ្វើពលកម្មដោយបង្ខិតបង្ខំពីសំណាក់ទាហានជប៉ុនអំឡុងសម័យអាណានិគមន៍នៅឧបទ្វីបកូរ៉េ ពីឆ្នាំ១៩១០ដល់ឆ្នាំ១៩៤៥ ៕
