សារព័ត៌មាន នគរវត្ត តែងតែនាំមុខគេជានិច្ច
ចាប់តាំងពីឡើងកាន់តំណែងដឹកនាំអង់គ្លេសមក លោកBoris Johnson បានធ្វើឲ្យនយោបាយក្នុងប្រទេសអង់គ្លេសធ្លាក់នៅក្នុងភាពចលាចល ជាមួយនឹងគម្រោងចាកចេញពីអឺរ៉ុប គ្មាន កិច្ចព្រមព្រៀង ។ តំណាងរាស្ត្រអង់គ្លេសទាំង បក្សកាន់អំណាចនិង បក្សប្រឆាំង បានយល់ស្របទៅនឹងបញ្ហាទាំងនោះឡើយ។
ក្រុមអ្នកឯកទេសបានលើកឡើងថា លោក Boris Johnson អាចនឹងក្លាយជានាយករដ្ឋមន្ត្រីដែលកាន់តំណែង រយៈពេលខ្លីបំផុតនៅក្នុងប្រវត្តិសាស្ត្រអង់គ្លេស ប្រសិនបើ លោកនៅតែធ្វើសកម្មភាពបំពានច្បាប់នោះ ។
កន្លងមក មានការចោទប្រកាន់ រូបលោក ថា និយាយកុហកព្រះមហាក្សត្រ ។ ប៉ុន្តែលោក បូរីស ចនសន (Boris Johnson) បានច្រានចោល ថានិយាយភូតកុហកចំពោះព្រះមហាក្សត្រិយានី អីលីហ្សាបេត ( Elezabeth) ចំពោះមូលហេតុផ្អាកសភារយៈពេល៥សប្តាហ៍នោះ បន្ទាប់ពីតុលាការមួយបានកាត់ក្តីថា ការសម្រេចធ្វើបែបនេះរបស់គាត់ គឺមិនត្រឹមត្រូវស្របតាមផ្លូវច្បាប់ ។
សភាអង់គ្លេសបានពន្យារពេល-ផ្អាក-កាលពីថ្ងៃចន្ទ (ទី៩ ខែកញ្ញា) រហូតដល់ថ្ងៃទី១៤ ខែតុលា ឆ្នាំ២០១៩, សកម្មភាពមួយ ដែលអ្នកតំណាងរាស្ត្របក្សប្រឆាំងអះអាងថា ធ្វើឡើង ដើម្បីរារាំងការប៉ុនប៉ងរបស់ពួកគេ (តំណាងរាស្ត្រប្រឆាំង) ពិនិត្យពិច័យលើគម្រោងរបស់គាត់ (បូរីស ចនខន) ដែលចាកចេញពីសហភាពអឺរ៉ុប ហើយសកម្មភាពនេះ អាចជំរុញឲ្យគាត់ (បូរីស ចនសន) ចាកចេញពីអឺរ៉ុបដោយមិនមានកិច្ចព្រមព្រៀងនៅថ្ងៃទី៣១ ខែតុលា ឆ្នាំ២០១៩។
តុលាការស្កត់ឡែន បានសម្រេចកាត់ក្តី កាលពីថ្ងៃទី១១ ខែកញ្ញា ឆ្នាំ២០១៩ថា ការផ្អាកសភារបស់រដ្ឋាភិបាល មិនស្របតាមផ្លូវច្បាប់ និងមានចេតនារារាំងដល់អ្នកតំណាងរាស្ត្រ ។ ការប្រកាសបែបនេះរបស់តុលាការស្កត់ឡេន ត្រូវបានក្រុមប្រឆាំងយកធ្វើជាលេសចោទប្រកាន់ទៅលើរូបលោក ចនសន ថាបាននិយាយភូតកុហក់ចំពោះព្រះមហាក្សត្រិយានី អំពីមូលហេតុដែលបានសម្រេចផ្អាកសភារបស់អង់គ្លេសនោះ ។
លោក ចនសន បានថ្លែងកាលពីថ្ងៃទី១២ ខែកញ្ញា ឆ្នាំ២០១៩ថា ការលើកឡើងបែបនេះ គឺ«ពិតណាស់មិន»ត្រឹមត្រូវឡើយ ។ ដោយមានរយៈពេល៧សប្តាហ៍ទៅមុខទៀត រដ្ឋាភិបាល និងរដ្ឋសភាអង់គ្លេស មានការជាប់គាំងខ្វែងគំនិតគ្នាក្នុងជម្លោះលើជោគវាសនា អនាគតរបស់ Brexit ដែលក្នុងនោះ អាចមានការចាកចេញដោយពុំមានកិច្ចព្រមព្រៀង រហូតដល់ការធ្វើប្រជាមតិផ្សេងទៀត ។
លោក ចនសន បានថ្លែងថា រដ្ឋាភិបាលកំពុងរង់ចាំស្តាប់សាលក្រមមួយដែលបានកាត់ក្តីដោយតុលាការកំពូល នៅសប្តាហ៍ខាងមុខនេះ ប្រឆាំងតុលាការស្កត់ឡែន ។ លោកចនសន បានថ្លែងថា គាត់គោរពឯករាជ្យភាពរបស់ចៅក្រម ។
លោក ចនសន បានថ្លែងថា «ខ្ញុំមិនប្រឆាំង ឬរារាំងចៅក្រមនោះទេ ។ វាសំខាន់ខ្លាំងណាស់ ដែលយើងគោរពឯករាជ្យភាពរបស់ប្រព័ន្ធតុលាការ» ។ លោកចនសន បានថ្លែងថា ខ្ញុំសង្ឃឹមថា រដ្ឋាភិបាលអាចនឹងឈានដល់កិច្ចព្រមព្រៀងចាកចេញមួយជាមួយអឺរ៉ុបនៅខែក្រោយនេះ ។ លោកថា ខ្ញុំបានថ្លែងទៅកាន់បណ្តារដ្ឋធានីជាមិត្តរបស់យើង ខ្ញុំគិតថា យើងអាចមើលឃើញពីចំណុចដែលពិបាក និងពីរបៀបដែលយើងអាចធ្វើទៅបាន។ វានឹងពិបាក ប៉ុន្តែខ្ញុំគិតថា យើងអាចទៅដល់ចំណុចនោះ» ៕
