បុរសវិកលចរឹកម្នាក់ឆ្លងផ្លូវមិនប្រយត្ន័ ត្រូវម៉ូតូបើកបុកស្លាប់ និងរបួសធ្ងន់ម្នាក់

ខេត្តស្វាយរៀង៖ បុរសវិកលចរឹកម្នាក់បានស្លាប់បន្ទាប់ពីដឹកមកសង្គ្រោះនៅមន្ទីពេទ្យបង្អែកស្រុក និងស្ត្រីម្នាក់ទៀតរងរបួសធ្ងន់ដោយសារករណីគ្រោះថ្នាក់ចរាចរណ៍រវាងម៉ូតូបើកបុកអ្នកដើរឆ្លងផ្លូវខ្វះប្រុងប្រយត្ន័ កាលពីវេលាម៉ោង៣រសៀល ថ្ងៃទី១៣ ខែកញ្ញា ឆ្នាំ២០១៩ ស្ថិតនៅលើផ្លូវជាតិលេខ១៣ ក្រាលកៅស៊ូ ត្រង់ចំណុចភូមិអារក្សស្វាយ ឃុំអណ្ដូងពោធិ៍ ស្រុករមាសហែក ។

បើតាមសមត្ថកិច្ចនគរបាលស្រុកបានឲ្យដឹងថា បុរសវិកលចរឹក ដែលស្លាប់មានឈ្មោះ ដួង វី អាយុ៥៤ឆ្នាំ រស់នៅភូមិពោន ឃុំដូង ស្រុករមាសហែក ខេត្តស្វាយរៀង ។

ចំណែកអ្នកបើកម៉ូតូរងរបួសធ្ងន់មានឈ្មោះគង់ សុខស្រីម៉ា ភេទស្រី អាយុ៣០ឆ្នាំ មុខរបរកសិករ រស់នៅភូមិត្រពាំងបន្ទាយឃុំអណ្ដូងពោធិ៍ ស្រុករមាសហែក ខេត្តស្វាយរៀង ជិះម៉ូតូម៉ាក HONDA WAVE.C១១០ ពណ៌ខៀវ គ្មានស្លាកលេខខូចខាតយ៉ាងដំណំ ។

បើតាមសាក្សីបានឲ្យដឹងថា មុនកើតហេតុមានបុរសវិកលចរឹកម្នាក់បានដើរឆ្លងផ្លូវតែម្នាក់ឯង ក្នុងទិសដៅពីលិចទៅកើត ខណៈនោះស្រាប់តែមានស្ត្រីម្នាក់បានជិះម៉ូតូមួយគ្រឿងម៉ាក HONDA WAVE .C១១០ ពណ៌ខៀវ គ្មានស្លាកលេខក្នុងទិសខាងត្បូងមកជើងចាប់ហ្វ្រាំងមិនទាន់ ក៏បុកពេញទំហឹងបណ្ដាលឲ្យដួលខ្ទាតលើផ្លូវបង្កការភ្ញាក់ផ្អើលដល់អ្នកភូមិ និងអ្នកធ្វើដំណើរនាំគ្នាចោមរោមមើល និងជួយសង្គ្រោះដឹកមកកាន់មន្ទីពេទ្បបង្អែកស្រុកទាំង២នាក់ ប៉ុន្តែអកុសលដោយបុរសវិកលចរឹកដើរថ្មើរជើងមានរបួសធ្ងន់ពេក ក៏ដាច់ខ្យល់ ។

ចំណែកវត្ថុតាងម៉ូតូធ្វើដំណើរត្រូវបានសមត្ថកិច្ចវាស់វែង និងអូសយកមករក្សាទុកនៅប៉ុស្តិ៍នគរបាលរដ្ឋបាលអណ្ដូងពោធិ៍ដើម្បីដោះស្រាយពេលក្រោយ ៕ យឹម សុថាន