សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចបានឃាត់ខ្លួនជនសង្ស័យជាមុខសញ្ញា ចែកចាយគ្រឿងញៀនយ៉ាងសកម្មម្នាក់ និងឆែកឆេរដកហូតកាំបិតស្នៀតដងជ័រព្រមទាំងម៉ូតូធំមួយគ្រឿងមកសាកសួរនៅអធិការដ្ឋាននគរបាលស្រុករំដួល ។
ការឃាត់ខ្លួននេះ បានធ្វើឡើងៅវេលាម៉ោង៣និង៣០នាទីរសៀល ថ្ងៃទី១៣ ខែកញ្ញា ឆ្នាំ២០១៩ នៅត្រង់ចំណុចភូមិតាណែង ឃុំសង្កែ ស្រុករំដួល ខេត្តស្វាយរៀង ។
បើតាមសមត្ថកិច្ចនគរបាលស្រុកបានឲ្យដឹងថា ជនសង្ស័យឃាត់ខ្លួនមានឈ្មោះ មោគនីមុឺន អាយុ១៧ឆ្នាំ មានទីលំនៅភូមិទួលទ្រា ឃុំជ្រុងពពេល ស្រុករំដួល ខេត្តស្វាយរៀង ។
ក្រោយឃាត់ខ្លួនសមត្ថកិច្ចបានធ្វើតេស្តិ៍ទឹកនោម ជាលទ្ធផលមានសារធាតុញៀនក្នុងខ្លួន និងដកហូតរួមមានម៉ូតូមួយគ្រឿងម៉ាក (MSX) ប្រាក់ដុល្លារ១០០$ ប្រាក់រៀល១១៥០០រៀល ទូរស័ព្ទដៃ មួយគ្រឿងម៉ាក (NOKIA) និងកាំបិតស្នៀតដងជ័រប្រវែង៤០សង្ទីម៉ែត្រ ចំនួន១ផងដែរ ។
ប្រភពបន្តថា មុនកើតហេតុកម្លាំងជំនាញអធិការដ្ឋាននគរបាលស្រុក សហការជាមួយកម្លាំងប៉ុស្តិ៍នគរបាលរដ្ឋបាលសង្កែបានដើរល្បាតរួច ក៏ប្រទះឃើញមុខសញ្ញាសង្ស័យចែកចាយគ្រឿងញៀន និងឃាត់ខ្លួនតែម្ដង ។
បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនទុកនៅអធិការដ្ឋាននគរបាលស្រុក ដើម្បីកសាងសំណុំរឿងចាត់ការបន្តតាមច្បាប់ ៕ យឹម សុថាន
