ជិះម៉ូតូមិនប្រកាន់ស្ដាំបុកជាមួយរថយន្តធុនធំបញ្ច្រាសគ្នារងរបួសធ្ងន់ម្នាក់ នៅក្រុងស្វាយរៀង

​ខេត្តស្វាយរៀង​៖ មានករណីគ្រោះថ្នាក់ចរាចរណ៍រវាងរថយន្តហ៊ីយ៉ានដាយ ធុនធំ និងម៉ូតូបុកគ្នាអូសប្រមាណ១០ម៉ែត្រ បណ្ដាលឲ្យយុវជនម្នាក់បានរងរបួសធ្ងន់សន្លប់ស្ដូក នឹងកន្លែងកាលពីថ្ងៃអាទិត្យ ​ទី១៥​ ​ខែកញ្ញា​ ​ឆ្នាំ២០១៩​ ​នៅ​លើ​ផ្លូវជាតិ​លេខ១​ ​ស្ថិត​ក្នុង​ភូមិ​ស្វាយតឿ​ ​សង្កាត់​ស្វាយតឿ​ ​ក្រុង​ស្វាយរៀង​ ។

បើតាមសមត្ថកិច្ចនគរបាលក្រុងស្វាយរៀងបានឲ្យដឹងថា យុវជនដែលរបួសធ្ងន់មាន​ឈ្មោះ​ ​ម៉ែ​ន​ ​សាន ​អាយុ​ ​១៩​ ​ឆ្នាំ​ ​មុខរបរ​ជា​កសិករ​ ​រស់នៅ​ភូមិ​ ​រោងដំរី​ ​ឃុំ​ ​ស្វាយចេក​ ​ស្រុក​រំដួល​ ​ខេត្តស្វាយរៀង ខណៈជិះម៉ូតូម៉ាក ហុងដា ​Zoomer​-​X​ ​ពណ៌ក្រហម​ ​ពាក់​ស្លាកលេខ ​ស្វាយរៀង​ ​១L​ ៨៦០៣​ ខូចខាតទាំងស្រុងផ្នែកខាងមុខ ។

ចំណែកអ្នកបើករថយន្តធុនធំមិនត្រូវបានស្គាល់ឈ្មោះនោះទេ ក្រោយកើតហេតុ បានរត់គេចខ្លួនបន្សល់តែ​រថយន្ដ​ម៉ាក​ ​ហ៊ីយ៉ាន់​ដាយ​ ​ពណ៌ខៀវ​ ​ពាក់​ស្លាកលេខ​ ​ភ្នំពេញ​ ៣D​ ​៩៣០៩នៅនឹងកន្លែង ។

បើតាមសាក្សីបានឲ្យដឹងថាមុនកើតហេតុមានយុវជនម្នាក់បានជិះម៉ូតូមួយគ្រឿងម៉ាកហុងដា ​Zoomer​-​X​ ​ពណ៌ក្រហម​ ​ពាក់​ស្លាកលេខ ​ស្វាយរៀង​ ​១L​ ​៨៦០៣​នៅ​លើ​ផ្លូវជាតិ​លេខ១​ ក្នុងទិសដៅពីកើតមកលិចមិនប្រកាន់ស្តាំ ​ស្រាស្រាប់តែទៅបុករថយន្តម៉ាកហ៊ីយ៉ាន់​ដាយ​ ​ពណ៌ខៀវ​ ​ពាក់​ស្លាកលេខ​ ​ភ្នំពេញ​ ៣D​ ​៩៣០៩ក្នុងទិសដៅបញ្ច្រាសគ្នាពីចំហៀងខាងឆ្វេង ពេញទំហឹងលាន់ដូចរន្ទះ និងអូសជាង១០ម៉ែត្របង្កការភ្ញាក់ផ្អើលតែម្ដង ។

ក្រោយកើតហេតុ ​អ្នកបើកម៉ូតូរងរបួសធ្ងន់ ​ត្រូវបានសមត្ថកិច្ច​បានបញ្ជូនទៅសង្គ្រោះនៅមន្ទីរពេទ្យបង្អែកខេត្តស្វាយរៀងភ្លាមៗ និងវាស់វែងមធ្យោបាយធ្វើដំណើរទាំង២គ្រឿងមករក្សាទុកនៅអធិការនគរបាលក្រុងស្វាយរៀង ​រង់ចាំការដោះស្រាយតាមពេលក្រោយតាមច្បាប់ ៕ យឹម សុថាន