សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដោយសារតែបង្គោលភ្លើងបំភ្លឺផ្លូវ ដែលមានចរន្តអគ្គិសនីឆ្លង បានធ្វើឲ្យគោញីមួយក្បាលឆក់ងាប់ ខណៈដែលមេឃកំពុងធ្លាក់ភ្លៀង ហើយសត្វគោនោះដើរទៅប៉ះបង្គោលភ្លើងលើសួនចែកទ្រូងផ្លូវ កាលពីវេលាម៉ោង៦ និង៥០យប់ ថ្ងៃទី១៤ ខែកញ្ញា ឆ្នាំ២០១៩ នៅតាមបណ្ដោយផ្លូវលេខ២១៧ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
តាមប្រភពីប្រជាពលរដ្ឋដែលនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញគោញីឈ្មោលជាច្រើក្បាលដើរកាត់លើសួនចែកទ្រូងផ្លូវ នៅចំណុចកើតហេតុដូចសព្វមួយដង តែចៃដន្យគោញីមួយក្បាលនោះបានដើរទៅត្រដុសប៉ះ និងបង្គោលភ្លើងបំភ្លឺផ្លូវ ធ្វើឲ្យឆក់ដួលប្រកាច់ងាប់ភ្លាមៗនៅ និងកន្លែងកើតហេតុ ។ ចំណែកគោញីឈ្មោលជាច្រើនក្បាលទៀតបានរត់ប្រសេកប្រសាចពេញផ្លូវបង្កការភ្ញាក់ផ្អើលតែម្តង ។
ភ្លាមនោះកម្លាំងសមត្ថកិច្ចមូលដ្ឋាន បានទំនាក់ទំនងទៅមន្រ្តីជំនាញខាងអគ្គិសនីកម្ពុជា ចុះមកត្រួតពិនិត្យជាក់ស្តែង ដោយបានបញ្ជាក់ថា បង្គោលភ្លើងបំភ្លឺផ្លូវដែលឆ្លងចរន្តអគ្គិសនីនេះគឺបណ្ដាលមកពីខ្សែភ្លើងចាស់ណាមួយដាច់រលាតប៉ះ ហើយខណៈដែលមានទឹកភ្លៀងធ្លាក់ផងនោះ ធ្វើឲ្យខ្សែភ្លើងផុយរលួយប៉ះគ្នា និងបង្គោលភ្លើងបណ្ដាលឲ្យឆ្លងចរន្តអគ្គិសនីតែម្ដង ។
ក្រោយកើតហេតុកម្លាំងប្រជាការពារសង្កាត់ស្ទឹងមានជ័យ២ បានយកម៉ូតូរ៉ឺម៉កមកដឹកសត្វគោនោះទៅទុកនៅ សង្កាត់រង់ចាំម្ចាស់មកទទួលយកទៅវិញ ៕ ភារ៉ា ដង្កោ
