បុរសម្នាក់ ឡើងលើរបងផ្ទះប្រជាពលរដ្ឋ ត្រូវសន្តិសុខឃើញចាប់ក្របួចជាប់

ភ្នំពេញ៖ ជនសង្ស័យម្នាក់ ត្រូវបានកម្លាំងនគរបាលខណ្ឌទួលគោកឃាត់ខ្លួន បន្ទាប់ពីរូបគេបានធ្វើសកម្មភាពលួចឡើងលើរបងផ្ទះប្រជាពលរដ្ឋ បម្រុងលួចទ្រព្យសម្បត្តិ ក៏ត្រូវបានសន្តិសុខម្នាក់យាមកាម នៅក្នុងការដ្ឋានសំណង់មួយកន្លែង ឃើញស្រែកឆោឡោនាំគ្នាចាប់ប្រគល់ឲ្យសមត្ថកិច្ចតែម្តង ។

ករណីខាងលើនេះ បានកើតឡើងកាលពីវេលាម៉ោង១ និង៣០នាទីរំលងអធ្រាត្រឈានចូល ថ្ងៃទី១៩ ខែកញ្ញា ឆ្នាំ២០១៩ ត្រង់ចំណុចផ្ទះលេខ១៧AEo ផ្លូវលេខ៥៤៨ ស្ថិតក្នុងសង្កាត់បឹងកក់ទី១ ខណ្ឌទួលគោក ។

ជនសង្ស័យខាងលើមានឈ្មោះ សូ ចាន់តារា ភេទប្រុស អាយុ៤០ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ក្នុងសង្កាត់ទួលសង្កែ ខណ្ឌឫស្សីកែវ។

តាមសម្ដីពីបុរសជាសន្តិសុខម្នាក់សុំមិនបញ្ចេញឈ្មោះ បានឲ្យដឹងថា មុនពេលកើតហេតុរូបគាត់កំពុងតែជិះម៉ូតូល្បាតត្រួតពិនិត្យមើលជុំវិញការដ្ឋានសំណង់ដែលខ្លួនយាមកាម នៅក្បែរកន្លែងកើតហេតុ ស្រាប់តែប្រទះឃើញជនសង្ស័យ កំពុងធ្វើសកម្មភាពលួចផ្លោះឡើងលើរបងផ្ទះជនរងគ្រោះ តែឡើងមិនទាន់ផុតផង ក៏ធ្លាក់ចុះពីលើរបងមកវិញ ។ ភ្លាមនោះគាត់ក៏បានដើរទៅសួរនាំ ស្រាប់តែជនសង្ស័យភ័យស្លន់ស្លោក៏ព្យាយាមងើបរត់គេចខ្លួនខណៈនោះគាត់ ក៏បានជិះម៉ូតូដេញតាមពីក្រោយ រហូតស្ទាក់ចាប់បាននៅត្រង់ចំណុចក្បែរស្ថានីយប្រេងឥន្ទន:តេលា ស្ថិតតាមបណ្ដោយផ្លូវលេខ៥២៨ កែងនិងផ្លូវលេខ២៨៧ ក្នុងសង្កាត់បឹងកក់ទី១ ខណ្ឌទួលគោក ។ បន្ទាប់មកក៏មានសមត្ថកិច្ចមូលដ្ឋាន បានចុះមកអន្តរាគមន៍ដល់កន្លែងកើតហេតុផងដែរ ។

ក្រោយកើតហេតុ ជនសង្ស័យខាងលើ ត្រូវបានសមត្ថកិច្ចមូលដ្ឋាន នាំយកទៅសាកសួរនៅប៉ុស្តិ៍នគរបាលរដ្ឋបាលបឹងកក់ទី១ ដើម្បីកសាងសំណុំរឿង បញ្ជូនខ្លួនទៅកាន់អធិការដ្ឋាននគរបាលខណ្ឌទួលគោក ចាត់ការតាមនីតិវិធី ៕ស រស្មី