សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាចម្រៀងល្បីឈ្មោះ ប៊ុត សីហា បាត់មុខពីវិស័យសិល្បៈអស់ជាច្រើនខែមកហើយ។ មុនថ្ងៃទិវាគ្រូបង្រៀន០៥ ខែតុលា បទចម្រៀងថ្មីចំណងជើង គុណគ្រូ នៅផលិតកម្មយ៉ូប (Job Production) ត្រូវបានបញ្ចេញហើយជាមួយនឹងអត្ថន័យចាក់ចំបេះដូងអ្នកគាំទ្រ ពិសេសឲ្យនឹករលឹកដល់គ្រូដែលធ្លាប់ផ្តល់ចំណេះដឹង ។
រៀងរាលថ្ងៃទី០៩ ខែតុលា រាជរដ្ឋាភិបាលកម្ពុជា ពិសេសក្រសួងអប់រំបានបំផុសឲ្យមានទិវាជាតិ គ្រូបង្រៀន ក្រោមប្រធានបទដ៏មានអត្ថន័យ។ ស្របគ្នានេះដែរ អតីតម្ចាស់ពាន The Voice Cambodia រដូវកាលទី១ លោក ប៊ុត សីហា ក៏បានបង្ហើរសំនៀងដ៏ពិរោះអមដោយខ្លឹមសារអត្ថន័យស៊ីជម្រៅ ដែលឆ្លុះបញ្ចាំងពីអារម្មណ៍គោរពស្រលាញ់គ្រូបង្រៀន បានធ្លាប់បានដើរតួនាទីជាមាតាបិតាឬជាអ្នកអាណាព្យាបាលទី២របស់សិស្ស ដោយគ្មានការ រើសអើង និងមិនប្រកាន់ពូជសាសន៍។ បទចម្រៀងមួយនេះក៏បានបង្ហាញនូវការគោរពថ្លែងអំណរគុណ និងរំលឹកគុណដ៏ធំធេងបំផុត ចំពោះកិច្ចខិតខំប្រឹងប្រែងបង្ហាត់បង្រៀនរបស់លោកគ្រូ អ្នកគ្រូ បណ្តុះធនធានមនុស្សជាសរសរទ្រូងសម្រាប់ប្រទេសជាតិនៅគ្រាកន្លងមកនិងទៅថ្ងៃអនាគត ។
គួរបញ្ជាក់ថា ទិវាគ្រូបង្រៀនកម្ពុជា ត្រូវបានផ្តួចផ្តើមបង្កើតដោយសម្តេចតេជោ ហ៊ុន សែន កាលពីថ្ងៃទី៣ ខែកញ្ញា ឆ្នាំ១៩៩៧ ដោយកំណត់យកថ្ងៃទី៥ ខែតុលា រៀងរាល់ឆ្នាំដើម្បីប្រារព្ធទិវានេះគឺមានគោលបំណងបំផុសឡើងវិញនូវវប្បធម៌ និងប្រពៃណីនៃការរំលឹកគុណូបការៈដ៏ថ្លៃថ្លារបស់សិស្ស ចំពោះគ្រូបង្រៀននៅទូទាំងប្រទេស។ គិតរហូតដល់ពេលនេះ មានរយៈពេលជាង២០ឆ្នាំផងដែរ ៕ វឌ្ឍនា
