សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ បុរសចំណាស់ម្នាក់ធ្វេសប្រហែសបណ្ដាលឲ្យឆក់ខ្សែភ្លើងស្លាប់ ពេលកំពុងបូមទឹក ។
ហេតុការណ៍នេះបានកើតឡើងកាលពីវេលាម៉ោង ១៥ និង ២០នាទី ថ្ងៃទី៧ ខែតុលា ឆ្នាំ២០១៩ នៅភូមិគោកទ្រា ឃុំម្សាក្រងស្រុកស្ទោង ខេត្តកំពង់ធំ។
ជនរងគ្រោះឈ្មោះ សូទ្រ សឹម ភេទ ប្រុស អាយុ៦១ឆ្នាំ មានទីលំនៅភូមិ ឃុំកើតហេតុខាងលើ ។
តាមការបំភ្លឺ ឈ្មោះសឹម ចិត្រា ភេទប្រុស អាយុ២១ឆ្នាំ ជាកូនបង្កើត របស់សព បានឲ្យដឹងថា ម៉ោងប្រហែល១៥និង២០នាទី នាទី នៅថ្ងៃទី០៧ ខែតុលា ឆ្នាំ២០១៩ ខ្លួននិងឪពុក បានយកម៉ូទ័របូមទឹកទៅបូមទឹកស្ទឹង លុះរៀបម៉ូទ័ររួច ឪពុកខ្លួនបានប្រាប់ខ្លួនឲ្យមកដោតឌុយនៅផ្ទះ ខ្លួនបានប្រាប់ឪពុកវិញថា ឡើងសិនមក ថារួច ខ្លួនដើរមកផ្ទះហើយបានដោតឌុយភ្លើងនោះ ទឹកបូមបានបន្តិចក៏ដាច់ភ្លើងវិញ ឃើញដូចនោះខ្លួនបានដកឌុយវិញចាំមើលឪពុកខ្លូនមកផ្ទះ តែមួយសន្ទុះនៅមិនទាន់ឃើញមក ខ្លួនបានដើរទៅមើលនៅកន្លែងបូមទឹក ក៏ឃើញឪពុកខ្លួនស្លាប់អណ្តែតទឹកបាត់ទៅហើយ ។
សមត្ថកិច្ចបានឲ្យដឹងថា ក្រោយទទួលព័ត៌មាន កម្លាំងប៉ុស្តិ៍ និងជំនាញស្រុក រួមទាំងអាជ្ញាធរភូមិ ឃុំ បានចុះដល់ កន្លែងកើតហេតុ ពិនិត្យសព មិនមានស្លាកស្នាមអ្វីពាក់ព័ន្ធករណីឃាតកម្មនោះឡើយ រួចសន្និដ្ឋានថា ជនរងគ្រោះស្លាប់ដោយឆក់ចរន្តអគ្គិសនី រួចបានប្រគល់សពជូនក្រុមគ្រួសារធ្វើបុណ្យតាមប្រពៃណី ៕ ប៊ុនរិទ្ធី
