សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិចិនម្នាក់ បើករថយន្តស៊េរីទំនើបលឿន ទៅបុករបាំងថ្មចែកទ្រូងផ្លូវបណ្ដាលឲ្យនារីម្នាក់រងរបួស ។ ហេតុការណ៍នេះ បានកើតឡើងនៅម៉ោងជាង៤ទៀបភ្លឺ ថ្ងៃទី១៣ ខែតុលា ឆ្នាំ២០១៩ ស្ថិតនៅតាមបណ្ដោយផ្លូវព្រះមុនីវង្ស សង្កាត់បឹងរាំង ខណ្ឌដូនពេញ រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសជនជាតិចិនម្នាក់ ជាអ្នកបើករថយន្តស៊េរីទំនើបមួយគ្រឿងម៉ាក MERCEDES GL450 ពណ៌ខ្មៅ ពាក់ស្លាកលេខ ភ្នំពេញ 2H-9889 និងមាននារីពីរនាក់ រួមដំណើរជាមួយ ដោយធ្វើដំណើរតាមបណ្ដោយផ្លូវព្រះមុនីវង្ស ខណៈមកដល់ចំណុចស្តុបប្រាសាទពេជ្រ ដោយរថយន្តលឿនពេក បានទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តខ្ទេចមួយកំណាត់មុខ និងរបាំងថ្មរងការខូចខាតពីរផ្ទាំងផងដែរ រីឯនារីម្នាក់បានរងរបួសជើង ត្រូវបានដឹកតាមរ៉ឺម៉កម៉ូតកង់បី ទៅមន្ទីរពេទ្យភ្លាមៗ ។
បន្ទាប់ពីកើតហេតុ សមត្ថកិច្ចមូលដ្ឋាន បានចុះមកដល់ទំនាក់ទំនង ទៅសមត្ថកិច្ចជំនាញចរាចរ ចុះមកវាស់វែង និងស្ទូចយករថយន្តទៅរក្សាទុក នៅការិយាល័យចរាចរផ្លូវគោករាជធានីភ្នំពេញ រង់ចាំដោះស្រាយគ្នា នៅពេលក្រោយ ៕ ជ្រោយពេជ្រ
