សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ ដើម្បីថែរក្សាមច្ឆជាតិឲ្យបានគង់វង្សក្នុងរដូវហាមឃាត់បិទការនេសាទនេះនៅថ្ងៃទី២៧ ខែតុលា ឆ្នាំ២០១៩ កម្លាំងចម្រុះស្រុកប្រាសាទបាគង ខេត្តសៀមរាប បានបន្តចុះទៅបង្ក្រាបបទល្មើសជលផលនៅតំបន់បឹងទន្លេសាបក្នុងភូមិសាស្ត្រឃុំកំពង់ភ្លុកនិងឃុំមានជ័យ។
លោកវរសេនីយ៍ឯក មិន ចន្ថា អធិការនគរបាលស្រុកប្រាសាទបាគង បានឲ្យដឹងនៅរសៀលថ្ងៃទី២៨ខែតុលានេះថា ប្រតិបត្តិការនេះ មានកម្លាំងសមត្ថកិច្ចចម្រុះនៃស្រុកប្រាសាទបាគង ដឹកនាំដោយលោកនឹម សុវណ្ណអភិបាលរងស្រុកមានគ្នាចំនួន១៥នាក់ ក្នុងនោះ នគរបាលស្រុកនិងប៉ុស្តិ៍៧នាក់,អាវុធហត្ថ៤នាក់,ជលផល២នាក់,ឃុំនិងសហគមន៍នេសាទ២នាក់ បានចុះទៅបង្ក្រាបបទល្មើសជលផលនៅចំណុចភូមិសាស្ត្រឃុំកំពង់ភ្លុកនិងឃុំមានជ័យ។
លោក មិន ចន្ថា បន្តថា ជាលទ្ធផល សមត្ថកិច្ចបង្ក្រាបបានក្បាលស្បៃមុង២៥ក្បាល ,សាច់មង៧៥០ម៉ែត្រដុតចោលនិងចម្រឹង៥៥០ដើមកាប់និងដុតបំផ្លាញចោលនិងលែងកូនត្រីចំនួន១០គីឡូក្រាមចូលបឹងទន្លេសាបវិញផងដែរ ។
ជាមួយគ្នានេះដែរ លោកសូរ ប្លាតុង អភិបាលស្រុកប្រាសាទបាគង បានប្រាប់ ថា កម្លាំងសមត្ថកិច្ចស្រុកប្រាសាទបាគង តែងតែចុះបង្ក្រាបបទល្មើសនេសាទនារដូវហាមឃាត់នេះ ជាបន្តបន្ទាប់ដែរ។ តែដោយសារពេលវេលានិងការងារមមាញឹកផងទើបសមត្ថកិច្ចចុះ១ខែម្តង ឬ ២ដងប៉ុណ្ណោះហើយការចុះបង្ក្រាបបទល្មើសនេសាទនេះដែរ មិនមែនធ្វើតែកម្លាំងចម្រុះស្រុកទេ ពោលគឺកម្លាំងចម្រុះនៃឃុំកំពង់ភ្លុក ក៏ដាក់កម្លាំងប្រចាំការផងដែរ។
ចំណែក លោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានឲ្យដឹងថា កម្លាំងរដ្ឋបាលជលផល បានសហការយ៉ាងល្អជាមួយអាជ្ញាធរស្រុកនិងខេត្ត ដើម្បីរួមគ្នាចុះបង្ក្រាបបទល្មើសនេសាទនៅតាមបណ្តាស្រុកមួយចំនួនយ៉ាងសកម្មផងដែរ។ ការចន្លោះប្រហោងខ្លះ ដោយសារតែការចុះបង្ក្រាបម្តងៗត្រូវចំណាយថវិកាច្រើន។
លោកបញ្ជាក់ថា ទោះបីជាសមត្ថកិច្ចនិងជំនាញជលផល បង្ក្រាបមិនសូវញឹកញាប់ក្តីក៏លោកនៅតែជំរុញឲ្យមន្ត្រីក្រោមឱវាទត្រូវខិតខំធ្វើយ៉ាងណាបន្តចុះបង្ក្រាបនិងទប់ស្កាត់បទល្មើសនេសាទឲ្យមានការថយចុះជាបន្តបន្ទាប់ ៕ ប្រាថ្នា
