សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោកវរសេនីយ៍ត្រី ឯម ភារី នាយប៉ុស្ដិ៍នគរបាលស្ទឹងមានជ័យទី៣ នៃអធិការដ្ឋាននគរបាលខណ្ឌមានជ័យ បានឲ្យដឹងនៅព្រឹកថ្ងៃទី២៩ ខែតុលា ឆ្នាំ២០១៩នេះថា កម្លាំងរបស់លោកបានស្រាវជ្រាវតាមចាប់ជនសង្ស័យម្នាក់ ក្រោយធ្វើសកម្មភាពលួចម៉ូតូបានមួយថ្ងៃ។
លោក ឯម ភារី បានឲ្យដឹងទៀតថា កាលពីថ្ងៃទី២៧ ខែ តុលា ឆ្នាំ២០១៩ មានសេចក្ដីរាយការណ៍មកថា មានករណីបាត់ម៉ូតូ នៅចំណុចក្នុងផ្ទះលេខ៣៨៩ ផ្លូវបេតុង ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញដោយជនរងគ្រោះដែលបានបាត់ម៉ូតូនោះមានឈ្មោះ សួន មីដា ភេទប្រុស អាយុ២៦ឆ្នាំ ជនជាតិខ្មែរ ទីលំនៅផ្ទះជួល ផ្លូវលេខ១១៨ សង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ មានមុខរបរជានិស្សិត ដែលបានបាត់ម៉ូតូ ម៉ាកនិច ពណ៍ផ្កាឈូក ពាក់ស្លាកលេខ ភ្នំពេញ 1HS 7131។
លោកនាយប៉ុស្ដិ៍បានបន្តទៀតថា ក្រោយពីសាកសួរជនរងគ្រោះបានរៀបរាប់ឲ្យដឹងថា មុនពេលកើតហេតុ ខ្លួនបានបានជិះម៉ូតូ០១គ្រឿងម៉ាកនិច ពណ៍ផ្កាឈូក ពាក់ស្លាកលេខ ភ្នំពេញ 1HS -7131 មកចាក់សោរកចតទុកនៅកន្លែងធ្វើការផ្ទះលក់ថ្នាំពេទ្យ ផ្លូវបេតុង ភូមិទ្រា៤ សង្កាត់ ស្ទឹងមានជ័យទី៣ ខណ្ឌមានជ័យ រាជធានីភ្នំពេញ (ចំណុចកើតហេតុ) រួចចូលទៅធ្វើការនៅខាងក្នុងផ្ទះ ។ លុះមកដល់វេលាម៉ោង១៥ និង៣០នាទី ថ្ងៃដដែលខ្លួនបានចេញមករកមើលម៉ូតូស្រាប់តែបាត់មិនឃើញ ក៏បានមកដាក់ពាក្យបណ្តឹងនៅស្នាក់ការនគរបាលប៉ុស្តិ៍ស្ទឹងមានជ័យទី៣ឲ្យជួយស្រាវជ្រាវរក។
លោក ឯម ភារី បានបន្ថែមថា ក្រោយពេលកើតហេតុលោកបានចុះទៅដល់ទីតាំងកើតហេតុភ្លាមៗដើម្បីពិនិត្យមើលកាមេរ៉ាសុវត្ថិភាពដែលបំពាក់នៅកន្លែងកើតហេតុ ក៏បានឃើញមនុស្សប្រុស០២នាក់ មិនស្គាល់អត្តសញ្ញាណ ជិះម៉ូតូ០១គ្រឿងម៉ាកស្គូបពី ពណ៍ខ្មៅ ពាក់ស្លាកលេខ ភ្នំពេញ 1HV 3570 មកធ្វើសកម្មភាពលួចយកម៉ូតូម៉ាកនិច ពណ៍ផ្កាឈូក របស់ជនរងគ្រោះ។
ក្រោយពីកំណត់មុខសញ្ញារួចមក លោកនាយប៉ុស្ដិ៍នគរបាលស្ទឹងមានជ័យទី៣ បានដាក់កម្លាំងធ្វើការស្រាវជ្រាវ លុះរហូតដល់វេលាម៉ោង១៨ និង ៣០នាទីថ្ងៃទី ២៨ ខែ តុលា ឆ្នាំ ២០១៩ ក៏ប្រទះឃើញជនសង្ស័យ កំពុងជិះម៉ូតូ០១គ្រឿងម៉ាកស្គូបពី ពណ៍ខ្មៅ ពាក់ស្លាកលេខ ភ្នំពេញ 1HV 3570 (ជាមធ្យោបាយជនសង្ស័យជិះមកលួចម៉ូតូម៉ាកនិចរបស់ជនរងគ្រោះ) នៅចំណុចផ្លូវ៣៧១សឡា ភូមិ ទ្រា៤ សង្កាត់ ស្ទឹងមានជ័យទី៣ ខណ្ឌ មានជ័យ ហើយក៏បានឃាត់ខ្លួនយកមកសាកសួរនៅស្នាក់ការប៉ុស្តិ៍ស្ទឹងមានជ័យទី៣តែម្ដង។
សមត្ថកិច្ចបន្ដថា ជនសង្ស័យមានឈ្មោះ ថុល វុទ្ធីម ភេទ ប្រុស អាយុ២៦ឆ្នាំ ជាជនជាតិខ្មែរ ទីលំនៅផ្ទះជួល ផ្លូវលំ សង្កាត់ទឹកថ្លា ខណ្ឌសែនសុខ រាជធានីភ្នំពេញ មុខរបរ ជាងភ្លើង (មានផ្ទុកសារធាតុញៀន) និងបក្សពួកម្នាក់ទៀតឈ្មោះ ធី ។ នៅមុខសម្ថកិច្ចជនសង្ស័យឈ្មោះថុល វុទ្ធីម បានឆ្លើយសារភាពរូបគេពិតជាបានជិះម៉ូតូឌុបបក្សពួកឈ្មោះ ធី មកធ្វើសកម្មភាពលួចយកម៉ូតូរបស់គេ០១គ្រឿងម៉ាកនិច ពណ៍ផ្កាឈូក កាលពីថ្ងៃទី២៧ ខែតុលា ឆ្នាំ២០១៩ វេលាម៉ោង១៥ និង០០នាទីនៅចំណុចកើតហេតុពិតប្រាកដមែន ចំណែកបក្សពួកឈ្មោះ ធី បានរត់គេចខ្លួនបាត់ទៅហើយ។
បច្ចុប្បន្ន ជនសង្ស័យឈ្មោះ ថុល វុទ្ធីម កំពុងធ្វើការសាកសួរនៅប៉ុស្ដិ៍នគរបាលស្ទឹងមានជ័យទី៣ ដើម្បីកសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌមានជ័យ ចាត់ការបន្តតាមនីតិវិធី៕ ភារ៉ា ដង្កោ
