សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ ពិតជាគួរឲ្យសង្វេគណាស់ដែលបុរសម្នាក់ ខំដើរស៊ីឈ្នួលគេពីរនាក់ប្តីប្រពន្ធដើម្បីក្រពះ កម្មអកុសលអីរន្ទះតាមផ្តាច់ជីវិតនៅកណ្ដាលវាលស្រែ កាលពីវេលាម៉ោង៣និង១០ នាទីរសៀល ថ្ងៃទី៣ ខែវិច្ឆិកា ឆ្នាំ២០១៩ ត្រង់ចំណុចវាលស្រែអណ្ដើកស្អុយ ស្ថិតក្នុងភូមិព្រែករាំង ឃុំទឹកហូត ស្រុករលាប្អៀរ ខេត្តកំពង់ឆ្នាំង។
ប្រជាពលរដ្ឋភូមិព្រែករាំងបានឲ្យដឹងថា ជនរងគ្រោះ ឈ្មោះសេងខេង (ហៅទីន) អាយុ៥១ឆ្នាំ មានប្រពន្ធឈ្មោះ ប៉ាត់ ឡាត អាយុប្រមាណជាង៤០ឆ្នាំ។ ក្នុងបន្ទុកគ្រួសារគឺមានតែពីរនាក់ប្ដីប្រពន្ធតែប៉ុណ្ណោះ ពុំមានកូនចៅនោះឡើយ។ រីឯមុខរបររបស់គ្រួសាររងគ្រោះនេះ គឺដើរស៊ីឈ្នួលគេ ដើម្បីយកកម្រៃមកចិញ្ចឹមជីវិតមួយថ្ងៃសម្រាប់មួយថ្ងៃតែប៉ុណ្ណោះ។ នៅថ្ងៃកើតហេតុ ជនរងគ្រោះ បានទៅស៊ីឈ្នួលឆ្ការព្រៃតាមភ្លឺស្រែប្រាំងឲ្យគេ ដែលម្ចាស់ស្រែឈ្មោះ ទុំ ដំ រស់នៅក្នុងភូមិឃុំជា មួយគ្នា។លុះមកដល់វេលាម៉ោងប្រមាណ១ រសៀល មេឃក៏ចាប់ផ្ដើមមានពពកខ្មៅ ហើយមានភ្លៀងធ្លាក់លាយឡំនឹងខ្យល់ ផ្គរផងដែរ។ ចំណែកជនរងគ្រោះ និងម្ចាស់ស្រែឈ្មោះទុំ ដំ មិនបានឈប់សម្រាកនោះទេ ដោយបន្តធ្វើការរហូតដល់ម៉ោង៣ រសៀល ក៏ស្រាប់តែមានរន្ទះបានបាញ់ផ្តាច់ជីវិតបុរសរងគ្រោះខាងលើនេះតែម្ដង។ ចំណែកម្ចាស់ស្រែឈ្មោះទុំ ដំ ខណៈដែលរន្ទះបាញ់នេះ គឺរូបគាត់នៅក្បែរនឹងជនរងគ្រោះចម្ងាយតែ៣ ម៉ែត្រពីគ្នាតែប៉ុណ្ណោះ។ ពេលឃើញជនរងគ្រោះដេកដួលទៅនឹងដី រូបគាត់ក៏បានរត់ទៅជួយ តែជាអកុសលជនរងគ្រោះ បានដាច់ខ្យល់ស្លាប់បាត់ទៅហើយ ។
ប្រភពដដែលបានឲ្យដឹងទៀតថា ក្រោយពេលកើតហេតុ ជនរងគ្រោះ ត្រូវបានលោកមេភូមិ ដឹកនាំប្រជាពលរដ្ឋក្នុងភូមិ សែងយកមកកាន់លំនៅដ្ឋាន រង់ចាំសមត្ថកិច្ចជំនាញចុះមកធ្វើកោសល្យវិច័យតាមបច្ចេកទេស និងបានប្រគល់ឲ្យប្រពន្ធ និងបងប្អូនក្នុងភូមិជួយចាត់ចែងធ្វើបុណ្យទៅតាមប្រពៃណី។
អ្នកភូមិបានឲ្យដឹងថាដោយសារតែជីវភាពគ្រួសារជនរងគ្រោះមានការខ្វះខាត មិនមានប្រាក់ធ្វើបុណ្យ មានតែប្រាក់របស់សមាគមភូមិ ដែលមានចំនួនតែ៦៧ម៉ឺនប៉ុណ្ណោះ សម្រាប់ចាត់ចែងក្នុងពិធីបុណ្យនិងដោយសពមិនអាចទុកបានយូរក៏សម្រេចបូជានៅវេលាម៉ោង១១យប់នេះថ្ងៃទី៣ ខែវិច្ឆិកា ក្រោមសម្រែកស្រែកយំអាឡោះអាល័យពីប្រពន្ធគួរឲ្យសង្វេគបំផុត ៕ ប្រាថ្នា
