ព័ត៌មានទាន់ហេតុការណ៍៖

ខ្សឹបដាក់ត្រចៀក៖ លោកគូ ប៊ុនទឹង នៅតែ​គឃ្លើនឲ្យកូនចៅ​ប្រព្រឹត្តល្មើស

ចែករំលែក៖

បទល្មើសនេសាទ​នៅតំបន់បឹងទន្លេសាប​ក្នុងខេត្តកំពង់ធំ ក្រោមដែនសមត្ថកិច្ច​របស់លោក គូ ប៊ុនទឹង នាយផ្នែករដ្ឋបាលជលផល​ត្រួត៥ស្រុក​ក្នុងខេត្តកំពង់ធំ​​នៅតែបន្តកើតមានពាសពេញផ្ទៃទឹក ក្នុងបឹងទន្លេសាប ។ គេរាយការណ៍ថា មន្ត្រីរដ្ឋបាលជលផល​​តាមបណ្តាស្រុក ដូចជាឈ្មោះ ជីន ស៊ីថា នាយសង្កាត់រដ្ឋបាលជលផលបារាយណ៍​-តាំងគោក, លោក កែវ សុខា នាយសង្កាត់រដ្ឋបាលជលផលសន្ទុក… បាននិងកំពុងកើតមានយ៉ាងគគ្រឹកគគ្រេង ។ បុរសទាំងពីរនាក់នេះ ជាអ្នកដើរប្រមូលថវិកាពីបទល្មើសនេសាទ ហើយបញ្ជូន​ប្រាក់​ទៅឲ្យលោកគូ ប៊ុនទឹង ។ ពួកគេមិនដែលខ្វល់ថា ត្រូវបង្ក្រាបបទល្មើសនេសាទ​នោះទេ ។

លោក គូ ប៊ុនទឹង នាយសង្កាត់រដ្ឋបាលជលផល​គ្រប់គ្រង ១ ស្រុកបារាយណ៍ និងតាំងគោក ២ ស្រុកសន្ទុក ៣ ស្រុកសណ្តាន់ ៤ ស្រុកប្រាសាទសម្បូរ និង៥ ស្រុកប្រាសាទបល្លង្គ ។ បទល្មើសដែលកើតច្រើនជាងគេ គឺស្រុកបារាយណ៍​ តាំងគោក និងស្រុកសន្ទុក ដែលមានលោក ជីន ស៊ីថា និងលោក កែវ សុខា ជាអ្នកដើរប្រមូលប្រាក់ជូនលោក គូ ប៊ុនទឹង ។ បច្ចុប្បន្ននេះ បទល្មើស​នៅតំបន់បឹងទន្លេសាប បានកំពុងកើតមាន យ៉ាងខ្លាំងក្លា ដែលពួក​អ្នកនេសាទល្មើស​សុទ្ធតែបង់​ប្រាក់​ឲ្យកូនចៅ លោកគូ ប៊ុនទឹង ។ បទល្មើសនេសាទ មានគ្រប់ប្រភេទ ដូចជា​បរ អួនមងក្រឡាញឹកជាដើម ។ ពេលនេះ​ពួកមន្ត្រីជលផល​រាយការណ៍ជូនថ្នាក់លើថា គ្មានបទល្មើសទេ ពីព្រោះ​មិនសម្បូរត្រីដូចឆ្នាំមុនៗ ។

ប៉ុន្តែការពិត​គឺពួកមន្ត្រីជលផលទាំងនេះ ជាអ្នកបួញមាត់បត់ដុំដៃ​​ឲ្យពួកឈ្មួញ​ប្រព្រឹត្តបទល្មើស​ដោយបង់លុយ​ឲ្យពួកគេ​ក្នុងមួយរដូវរាប់ពាន់​រាប់ម៉ឺនដុល្លារ ។ លោក គូ ប៊ុនទឹង ក៏នៅ​បានគំរាមចំពោះឈ្មួញ​ឲ្យប្រាក់​មកខ្លួនថែមទៀត បើទោះបីជាបានប្រគល់ឲ្យលោក ជីន ស៊ីថា ឬលោក កែវ សុខា ហើយក៏ដោយ ។ មានន័យថា ពួកគេបង់ឲ្យមន្ត្រីជលផលពីរដង ទាំងបង់ឲ្យលោក​គូ ប៊ុនទឹងផង និងបង់ឲ្យកូនចៅលោកគូ ប៊ុនទឹង ដែលត្រូវយកទៅថ្វាយ​លោកគូ ប៊ុនទឹងនោះផង ។ ប្រធានមន្ទីរកសិកម្មខេត្តកំពង់ធំ ក៏ដូចជា​អភិបាលខេត្តកំពង់ធំ មិនដែលខ្វល់ខ្វាយរឿងបញ្ហា​បទល្មើសនេសាទនេះទេ គឺផ្តល់លទ្ធភាព​ឲ្យលោកគូ ប៊ុនទឹង ជិះសេះលែងដៃតែម្តង ៕


ចែករំលែក៖